ကွမ်ရှီးကျွမ့်ကိုယ်ပိုင်အုပ်ချုပ်ခွင့်ရဒေသ၊ ပိုင်ဆဲ့မြို့၊ ထျန်းတုန်းစီရင်စုရှိ စစ်ဆေးရေး ဂိတ်တစ်ခုတွင် မြန်မာနိုင်ငံသား အများအပြားပိတ်မိနေကြောင်း သတင်းပေးချက်အရ နန်နင်းမြို့၊ မြန်မာကောင်စစ်ဝန်ချုပ်ရုံးမှ ကောင်စစ်ဝန်ချုပ် ဦးစိုးသက်နောင်သည် သက်ဆိုင်ရာမြို့ အစိုးရအဖွဲ့များ၊ ပိုင်ဆဲ့မြို့နိုင်ငံခြားရေးရုံး၊ ပြည်သူ့လုံခြုံရေးဦးစီးဌာနတို့နှင့် ဆက်သွယ်ကာ အဆိုပါပိတ်မိနေသော မြန်မာနိုင်ငံသားဟုဆိုသူများအား နိုင်ငံသားကာကွယ်စောင့်ရှောက်ရေးလုပ်ငန်းများနှင့် မြန်မာနိုင်ငံသား မှန်ကန်မှု ရှိ-မရှိ စိစစ်ခြင်းလုပ်ငန်းများကို ဆောင်ရွက်ပေးခဲ့ပြီးနောက် တရုတ်-မြန်မာ နယ်စပ် ရွှေလီမြို့အထိ ဘေးကင်းစွာပြန်လည် ပို့ဆောင်ပေးခဲ့ပါသည်။
အဆိုပါ ပိတ်မိနေသော မြန်မာနိုင်ငံသားအရေအတွက် စုစုပေါင်းမှာ(၁၉၇)ဦးဖြစ်ပြီး ကျား (၁၃၄)ဦး၊ ကိုယ်ဝန်ဆောင် (၁)ဦးနှင့် (၂၃)ရက်သား မိန်းကလေးငယ်တစ်ဦးအပါအဝင် မ (၆၃ ) ဦးတို့ ဖြစ်ပါသည်။ ၎င်းတို့သည် ကွမ်တုန်းပြည်နယ်အတွင်းရှိ စက်ရုံများတွင် တရားမဝင် အလုပ်လုပ်ကိုင်နေခဲ့ပြီးနောက် တရုတ်နှစ်သစ်ကူးပိတ်ရက်ကာလအတွင်း ကားကြီး(၃)စီး ငှားရမ်းကာ မြန်မာနိုင်ငံသို့ ပြန်လာခဲ့ရာ လမ်းခုလတ်ရှိ ကွမ်ရှီးကျွမ့်ကိုယ်ပိုင်အုပ်ချုပ်ခွင့်ရဒေသ၊ ပိုင်ဆဲ့မြို့၊ ထျန်းတုန်းစီရင်စုရှိ စစ်ဆေးရေးဂိတ်၌ ကားပေါ်တွင် လူအလွန်အကျွံ လိုက်ပါလာသောကြောင့် စစ်ဆေးမေးမြန်းစဉ် ထိန်းသိမ်းခံရခြင်းဖြစ်ပါသည်။
ယင်းသတင်းအားရရှိသည်နှင့်တစ်ပြိုင်နက် နန်နင်းမြို့၊ မြန်မာကောင်စစ်ဝန်ချုပ်ရုံးသည် သက်ဆိုင်ရာ ပိုင်ဆဲမြို့အစိုးရ၊ ပိုင်ဆဲ့မြို့နိုင်ငံခြားရေးဌာနနှင့် ပြည်သူ့လုံခြုံရေးဦးစီးဌာနတို့နှင့် ဆက်သွယ် ညှိနှိုင်းခဲ့ကာ ၂၁-၁-၂၀၂၀ ရက်နေ့မှစ၍ ၎င်းတို့အတွက် ကျန်းမာရေးစောင့်ရှောက်မှု၊ နေထိုင်စားသောက်မှုကိစ္စအဝဝအား စီစဉ်ဆောင်ရွက်ပေးနိုင်ခဲ့ပြီး ၂၂-၁-၂၀၂၀ ရက်နေ့တွင် မြန်မာကောင်စစ်ဝန်ချုပ်၊ ဦးစိုးသက်နောင်နှင့်အဖွဲ့သည် ၎င်းတို့ပိတ်မိနေသည့်နေရာသို့ သွားရောက်ကာ နိုင်ငံသားစိစစ်ခြင်းလုပ်ငန်းများကို ဆောင်ရွက်ပေးခဲ့ပြီးနောက် သက်ဆိုင်ရာ ထျန်းတုန်းစီရင်စု အုပ်ချုပ်ရေးမှူး၊ ပိုင်ဆဲ့မြို့နိုင်ငံခြားရေးရုံး ညွှန်ကြားရေးမှူးနှင့် သက်ဆိုင်ရာတာဝန်ရှိသူများ၏ ပူးပေါင်းကူညီမှုဖြင့် ဒေသစံတော်ချိန် နေ့လည် (၃:၃၀) အချိန်တွင် မြန်မာနိုင်ငံသား (၁၉၇)ဦးအား ဘတ်စ်ကား (၅)စီး၊ ရဲကားတစ်စီး၊ ခရီးစဉ်တစ်လျှောက် ကျန်းမာရေးကိစ္စများ ကူညီဆောင်ရွက် ပေးနိုင်ရန်အတွက် ဆေးအဖွဲ့ပါဝင်သည့် အုပ်ချုပ်မှုယာဉ်တစ်စီးတို့နှင့်အတူ တရုတ်-မြန်မာ နယ်စပ်မြို့ ဖြစ်သော ရွှေလီမြို့အထိ ပို့ဆောင်ပေးနိုင်ခဲ့ပါသည်။ ခရီးစဉ်ကြာမြင့်ချိန်မှာ ၁၆ နာရီခန့်ဖြစ်ပြီး မြန်မာနိုင်ငံသား (၁၉၇)ဦးသည် ၂၃-၁-၂၀၂၀ ရက်နေ့ ညနေပိုင်းတွင် ရွှေလီမြို့မှတဆင့် မြန်မာနိုင်ငံ မူဆယ်မြို့သို့ ပြန်လည်ရောက်ရှိမည်ဖြစ်ကြောင်း သိရှိရပါသည်။
နိုင်ငံခြားရေး
No comments:
Post a Comment