သြစတြေးလျနိုင်ငံ ကာကွယ်ရေးဝန်ကြီးနဲ့ ဂျပန်နိုင်ငံ ကာကွယ်ရေးဝန်ကြီးတို့ တိုကျိုမြို့မှာ တွေ့ဆုံကြပြီး နောက် နှစ်နိုင်ငံ ကာကွယ်ရေးနဲ့ လုံခြုံရေးတိုးမြှင့် လုပ်ဆောင်ဖို့ သဘောတူခဲ့ကြပါတယ်။ ဒါ့အပြင် သြစတြေးလျ ကာကွယ်ရေးဝန်ကြီး David Johnston က ဂျပန်နိုင်ငံက ရေငုတ်သင်္ဘောတွေကို ဝယ် ယူ လိုကြောင်း ပြောသွားခဲ့တယ်လို့ အေဘီစီ သတင်းထောက် Matthew Carney က ပြောပါတယ်။
ဂျပန် ကာကွယ်ရေးဝန်ကြီး Akinori Eto နဲ့ ပထမဆုံး တွေ့ဆုံမှုအတွင်း သြစတြေးလျ ကာကွယ်ရေးဝန်ကြီး Johnston က ဂျပန်နိုင်ငံဆီက ရေငုတ်သင်္ဘော ဝယ်ယူလိုကြောင်း တရားဝင် ပြောကြားခဲ့ပါတယ်။
သြစတြေးလျနိုင်ငံမှာ အသုံးပြုနေတဲ့ Collins ရေငုတ်သင်္ဘောတွေကို ပိုပြီးခေတ်မှီတဲ့ ဂျပန်နိုင်ငံထုတ် Soryu ရေငုတ်သင်္ဘောနဲ့ အစားထိုးဖို့ စဉ်းစားနေတာ ဖြစ်ပါတယ်။
ဂျပန်ဝန်ကြီးကတော့ ဒီရောင်းဝယ်မှုက နှစ်နိုင်ငံစလုံးကို ဘယ်လို အကျိုးပြုမလဲ ဆိုတာကို ကြိုတင်လေ့လာ ပြီးမှ ဆောင်ရွက်လိုကြောင်း တုန့်ပြန်ထားပါတယ်။
သြစတြေးလျအစိုးရကတော့ ဒီကိစ္စကို နောက်တစ်နှစ်ကြာတဲ့အထိ စဉ်းစားနေပြီး ဂျာမနီနိုင်ငံ၊ ပြင်သစ်နဲ့ ဆွီဒင်နိုင်ငံက ရေငုတ်သင်္ဘော ဝယ်ယူဖို့ကိုလည်း စဉ်းစားနေတဲ့အကြောင်း Matthew Carney က တိုကျို မြို့ကနေ သတင်းပေးပို့ထားပါတယ်။
ABC
No comments:
Post a Comment