Thursday, April 02, 2015

ကရင်လက်နက်ကိုင် ၅ ဦးကို မြောင်းမြရဲ ဖမ်းဆီးစစ်ဆေး


ဗိုလ်ချုပ်ကြီး စောဌေးမောင် ခေါင်းဆောင်တဲ့ ကေအန်ယူ၊ ကေအန်အယ်လ်အေ (ငြိမ်းချမ်းရေးကောင်စီ) အဖွဲ့က ဒု-ဗိုလ်အဆင့်ရှိသူ ၁ ဦး အပါအ၀င် ၅ ဦးကို ဧရာဝတီတိုင်း မြောင်းမြရဲစခန်းမှာ ဖမ်းဆီးစစ်ဆေးနေ ပါတယ်။
သေနတ်နဲ့ ခြိ်မ်းခြောက်ငွေတောင်းယူသွားတယ်ဆိုတဲ့ တိုင်ကြားချက်အရ ရဲတပ်ဖွဲ့က သွားရောက် ဖမ်းဆီး အရေးယူခဲ့တာလို့ မြောင်းမြခရိုင် အိမ်မဲမြို့နယ် လူခေါင်းကျွန်း ရဲစခန်းက ရဲအုပ် ဌေးဝင်းက ပြောပါတယ်။

“မတ်လ ၃၀ ရက်နေ့ ည ၁၁ နာရီ အချိန်လောက်က ကြာတန်းကျေးရွာအုပ်စု ယိုးဒယားကုန်းကျေးရွာမှာ ရှိတဲ့ နေအိမ်တစ်အိမ်ကိုလာပြီးတော့  ပြောက်ကျား ၀တ်စုံ ၀တ်ဆင်ထားတဲ့ လူတွေကနေ သေနတ်နဲ့ချိန် တယ်၊ ကြိုးတွေနဲ့တုပ် တယ်၊ သူ့ဆီမှာပါတဲ့ လေလံပွဲအတွက် အသုံးပြုဖို့ ပေးထားတဲ့ ငွေကျပ်သိန်း ၆၀ ကိုလည်း ယူသွားတယ်ဆိုပြီး ပြောတာပေါ့။  သူ့စက်လှေကို မောင်းတဲ့ စက်လှေသမားကိုပါ ကြိုးတုပ်ပြီး ထွက်သွားတဲ့ အတွက်ကြောင့် အဲဒါနဲ့ပတ်သက်ပြီး အရေးယူပေးဖို့  စခန်းကို တိုင်လာတယ်” လို့ ပြောပါ တယ်။

မြောင်းမြရဲစခန်းမှာ စစ်ဆေးရာမှာ ဖမ်းဆီးရမိသူတွေဟာ ရန်ကုန်တိုင်း ပန်းလှိုင်  အခြေစိုက် ကေအန်ယူ ၊ ကေအန်အယ်လ်အေ ငြိမ်းချမ်းရေး ကောင်စီ  ဆက်ဆံရေးရုံး အဖွဲ့ဝင်တွေဖြစ်ကြောင်း ထွက်ဆိုကြ တယ်လို့ သူက ရှင်းပြပြီး ထွက်ဆိုချက်နဲ့ ပတ်သက်လို့ ရဲအရာရှိက အသေးစိတ်ဖြေကြားခြင်း မရှိပါဘူး။

ဒီဗွီဘီက သီးခြားမေးမြန်းချက်တွေအရ ဒီဖြစ်စဉ်ဟာ  ငွေရေးကြေးရေးဆိုင်ရာ ကိစ္စတွေနဲ့ ရှုပ်ထွေးသလို စကားအပြောအဆိုကြမ်းတမ်းမှုတွေဟာလည်း အကြောင်းတချက်အနေနဲ့ ပါဝင်နေတာ တွေ့ရပါတယ်။

ကေအန်ယူ၊ ကေအန်အယ်လ်အေ ငြိမ်းချမ်းရေးကောင်စီအဖွဲ့က ဗဟိုသတင်းနဲ့ ပြန်ကြားရေးဌာက စော မင်းဝေကို ဒီဗွီဘီက ဆက်သွယ် မေးမြန်း ခဲ့ရာမှာ  ဓားပြတိုက်တာ လုံးဝမဟုတ်ကြောင်း၊ ဒီဖမ်းဆီးမှုဟာ အဖြစ်မှန်နဲ့ လွဲနေတယ်လို့ ပြောပါတယ်။

“ဖြစ်စဉ်က ကိုယ့်ပိုက်ဆံကိုယ်သွားယူတာ။ ယူတဲ့အချိ်န်မှာ ဟိုဘက်က ကျနော်တို့ အဖွဲ့အစည်းကို လည်း စော်ကားမော်ကားစကားလုံးသုံးတယ်။ ပြီးတော့ သူတို့က လူမိုက်ဆန်တဲ့ စကားလုံးရပ်တွေလည်း သုံးတယ်။ ကျနော်တို့ ပိုက်ဆံ ၁၀ သိန်းကို ၆ သိန်းပဲပေးနိုင်တယ်ဆိုပြီး ကျနော်တို့ ပြန် လည်း ယူလာရော သူ့တို့ဆီကနေ သိန်း ၆၀ ဓားပြတိုက်ပါတယ်ဆိုပြီး ဟိုတိုင်ဒီတိုင်လုပ်တာပေါ့။”

ဒီဖြစ်ရပ်နဲ့ပတ်သက်လို့ ဓားပြမှုနဲ့ စွပ်စွဲချက်ဟာ အဖွဲ့အစည်းကို ထိခိုက်နစ်နာစေတဲ့အတွက် တန်ပြန်တရား စွဲဆိုဖို့ ပြင်ဆင်နေတယ်လို့ ဆိုပါတယ်။

ရဲက  ဖမ်းဆီးထားသူတွေကို    ပြစ်မှုဆိုင်ရာဥပဒေပုဒ်မ ၃၉၅ ဓားပြမှုနဲ့ အမှုဖွင့်ထားပြီး  အတူပါလာတဲ့ ပစ္စတိုသေနတ်ပုံစံကော်သေနတ် ၁ လက်၊ လေးခွ ၂ လက်၊ ကုံးသီး၊ ဓားတို ၁ ချောင်း၊ အရှည် ၁ ချောင်းနဲ့  ကား ၁ စီးကိုလည်း  ရှာဖွေပုံစံနဲ့ သိမ်းဆည်းထားပါတယ်။

ဖမ်းထားသူတွေကို ဆက်လက်စစ်ဆေးနိုင်ဖို့ ဧပြီလ ၁ ရက်နေ့က မြောင်းမြမြို့ နယ်တရားရုံးမှာ ရမန်ရယူ ကာ မြောင်းမြအကျဉ်းထောင်မှာ  ပြောင်းရွှေ့ထိန်း သိမ်းထားပါတယ်။

DVB

No comments:

Post a Comment

My Blog List