ရန်ကုန်-နေပြည်တော်-မန္တလေးတို့တွင် ဆီးဂိမ်းပြိုင်ပွဲအတွက် ဟိုတယ်အလုံးပေါင်း ၈၆ လုံးမှ အခန်းပေါင်း ၇၀၀၀ ကျော် ထားရှိမည်

Sunday, September 29, 2013
ရန်ကုန်-နေပြည်တော်-မန္တလေးတို့တွင် ဆီးဂိမ်းပြိုင်ပွဲအတွက် ဟိုတယ်အလုံးပေါင်း ၈၆ လုံးမှ အခန်းပေါင်း ၇၀၀၀ ကျော် ထားရှိမည်ဖြစ်ကြောင်း ဟိုတယ်နှင့် ခရီးသွားလာရေး ၀န်ကြီးဌာနမှ တာဝန်ရှိသူ တစ်ဦး၏ ပြောကြားချက်အရ သိရသည်။ကြိုတင်ပြင်ဆင်ထားရှိသော အခန်းပေါင်း ၇၀၀၀ ကျော်တွင် ဆီးဂိမ်းပြိုင်ပွဲဝင်မည့် နိုင်ငံများမှ လာရောက်မည့် VIP၊ ဒိုင်များနှင့် အားကစား အဖွဲ့ဝင်များ အတွက်ဖြစ်ကြောင်း၊ ယင်းအပြင် လာရောက်ကြည့်ရှုမည့် နိုင်ငံခြားသားများ အတွက်ပါ အရန်ဟိုတယ်များ ထည့်သွင်းပြင်ဆင်ထားကြောင်း သိရသည်။"အခုနောက်ဆုံး အခြေအနေမှာတော့ နေပြည်တော်၊ ရန်ကုန်ကို အဓိကထားပြီးတော့ အခန်းတွေကို ကြိုတင်ပြင်ဆင်ထားတယ်။ မန္တလေးမှာတော့ သိပ်ပြီးတော့ အခက်အခဲ မတွေ့ကြုံနိုင်ဘူး။ ငွေဆောင်မှာဆိုလည်း ရွက်လှေအားကစား တစ်ခုပဲ ရှိတာဆိုတော့ ဟိုတယ်အတွက် သိပ်ပြီးတော့ အခက်အခဲ မရှိပါဘူး" ဟု ဟိုတယ်နှင့် ခရီးသွားလာရေး လုပ်ငန်းဝန်ကြီးဌာနမှ ညွှန်ကြားရေးမှူး ဦးကောင်းထွဋ်က ပြောကြားသည်။
ဆီးဂိမ်းပြိုင်ပွဲ ဟိုတယ်အခန်းရေ အဓိက အခက်အခဲ ကြုံတွေ့နိုင်သော နေပြည်တော်တွင် ဟိုတယ် ၅၃ လုံးနှင့် အခန်းအရေအတွက် ၂၁၁၆ ခန်း ရှိမည်ဖြစ်ပြီး အရန်အခန်းမှာ ၂၀၂၉ ခန်းပါ ထားရှိသွားမည်ဖြစ်ကြောင်း၊ ရန်ကုန်တွင် Sedona, Trader ဟိုတယ်များ အပါအ၀င် ဟိုတယ်အလုံးပေါင်း ၃၃ လုံးရှိ အရန်အခန်းများ အပါအ၀င် ၁၀၂၆ ခန်း ထားရှိမည်ဖြစ်ကြောင်း သိရသည်။

မန္တလေးတွင်မူ နိုင်ငံတစ်နိုင်ငံ ချင်းစီအလိုက် ဟိုတယ်လုံးချင်းအလိုက် စီစဉ်ထားပြီး အရန်အခန်းအဖြစ် ၂၅၀ ကျော် ရှိမည်ဖြစ်ကြောင်း ဟိုတယ်နှင့် ခရီးသွားလာရေးလုပ်ငန်း ၀န်ကြီးဌာနမှ ထုတ်ပြန်ခဲ့သည်။
ယင်းအပြင် ဆီးဂိမ်းပြိုင်ပွဲအတွင်း နိုင်ငံခြားသားများတည်မည့် ဟိုတယ်များကို အဆင့်မြှင့်တင်ရန်အတွက် စစ်ဆေးမှုများ ပြုလုပ်နေကြောင်း မြန်မာနိုင်ငံ ဟိုတယ်လုပ်ငန်းရှင်များ အသင်းမှ သိရသည်။ မြန်မာနိုင်ငံရှိ ဟိုတယ်အများစု၏ အခန်းခ မြင့်တက်နေမှုကို ဆီးဂိမ်းကာလအတွင်း လျှော့ချမှုများ ပြုလုပ်ရန် ထုတ်ပြန်ထားပြီး နိုင်ငံခြားသား ခရီးသွား ဧည့်သည်တစ်ဦးလျှင် တစ်နေ့အခန်းခ ဒေါ်လာ ၅၀ နှုန်းသာ ကောက်ခံရန် အသိပေးထားသည်။

eleven media group