အိပ်ခ်ျအိုင်ဗွီပိုး ကူးစက်ခံထားရသူများ၏ ကိုယ်ခံအားစနစ်ကို စစ်ဆေးပေးသည့် CD4 တိုင်းတာရေးစက်များကို လိုအပ်ချက်နှင့်အညီ တိုင်းဒေသကြီးနှင့် ပြည်နယ်များတွင် တိုးချဲ့တပ်ဆင် ပေးမည်ဖြစ်ကြောင်း ကျန်းမာရေး ဦးစီးဌာန၊ အမျိုးသား ခုခံကျ/ကာလသားရောဂါ တိုက်ဖျက်ရေး စီမံကိန်းမှ သိရသည်။ လက်ရှိ တိုင်းဒေသကြီးနှင့် ပြည်နယ်အချို့တွင် အိပ်ခ်ျအိုင်ဗွီပိုး ရှိ၊ မရှိ စစ်ဆေးပေးသည့် HIV Testkits များ ပြတ်လပ်နေခြင်းနှင့် CD4 စက်များ မရှိခြင်းတို့ကြောင့် အခက်အခဲများ ကြုံတွေ့နေရကြောင်း သိရသည်။လက်ရှိတွင် ကျန်းမာရေး ၀န်ကြီးဌာန အနေဖြင့် CD4 စက်အလုံး၄၀ခန့်မှာယူထားပြီးယင်းစက်များ ရောက်ရှိသည်နှင့်တစ်ပြိုင်နက်တိုင်းဒေသကြီးနှင့် ပြည်နယ်များရှိ လိုအပ်နေသည့် နေရာများတွင် တိုးချဲ့တပ်ဆင် ပေးသွားမည်ဖြစ်ကြောင်း သိရသည်။
"HIV Testkits တွေက မနှစ်ကဆိုရင် ကြားကာလမှာ Global Fund က ပံ့ပိုးနေတာတွေ ရှိတယ်။ အဲဒီမှာ UNICEF, UNFPA, Global Fund ကနေပြီးတော့ ရတယ်။ အခု နိုင်ငံတကာက ပေးတာသာမက အစိုးရက ၀ယ်ယူတာမျိုးတွေလည်း ရှိလာပါပြီ။ အခုဆိုရင် အမျိုးသား ဓာတ်ခွဲခန်းကို ပေးတာတွေလည်း ပိုပေးလာနိုင်တယ်။ အရင်က တစ်ခါမှ မပေးဖူးတဲ့ ကျန်းမာရေး ၀န်ကြီးဌာနရဲ့ ဖြန့်ဝေမှုအနေနဲ့ Testkits အရေအတွက် ၁၀ သိန်းကို ပေးထားတယ်။ Testkits တွေလည်း လုံလုံလောက်လောက် ဖြန့်ဖြူးဖို့ ရှိပါတယ်။ သက်ဆိုင်ရာ ပြည်နယ်တိုင်းတွေကနေ အေအာတီ ပေးနေတဲ့ နေရာတွေကိုဖြန့်ပြီး သူကမှတစ်ဆင့် သင်တန်းပေးပြီးရင် လုံလုံလောက်လောက် ဖြန့်ဖြူးပေးသွားမှာပါ။ နောက်နှစ်တွေမှာ လိုအပ်ချက် ပြည့်မီအောင် မှာယူမှာ ဖြစ်တဲ့အတွက် ဒီအခက်အခဲတွေ အဆင်ပြေမှာပါ" ဟု အမျိုးသား ခုခံကျ/ကာလသားရောဂါ တိုက်ဖျက်ရေး စီမံကိန်းမှ ဒေါက်တာမျိုးသန့်က ပြောကြားသည်။
ထို့ပြင် ကျန်းမာရေး ၀န်ကြီးဌာန အနေဖြင့် အေအာတီ ဆေးဝါးလို အပ်နေသည့် အိပ်ခ်ျအိုင်ဗွီ/အေအိုင်ဒီအက်စ် ဝေဒနာရှင်များအနက် ခြောက်သောင်းကျော် (၄၈ ဒသမ ၅ ရာခိုင်နှုန်း) ကို ဆေးပေးလျက်ရှိပြီး လာမည့် ၂၀၁၆ ခုနှစ်တွင် ဝေဒနာရှင် တစ်သိန်းကျော် (၈၅ ရာခိုင်နှုန်း) အထိ တိုးမြှင့်ပေးသွားရန် လျာထားကြောင်းနှင့် မြန်မာနိုင်ငံတွင် ခန့်မှန်းတွက်ချက်မှု များအရ အိပ်ခ်ျအိုင်ဗွီ/အေအိုင်ဒီအက်စ် ဝေဒနာရှင်ပေါင်း ၁၂၀၀၀၀ ကျော်ခန့်ရှိကြောင်း သိရသည်။
အိပ်ခ်ျအိုင်ဗွီ/အေအိုင်ဒီအက်စ် ဝေဒနာရှင်များကို အေအာတီ ဆေးဝါးဖြင့် ကုသပေးနေသည့် ရန်ကုန်တိုင်းဒေသကြီး မင်္ဂလာဒုံမြို့နယ်ရှိ မင်္ဂလာဒုံ အထူးကုဆေးရုံ အေအာတီစင်တာကို ၂၀၀၇ ခုနှစ်က စတင်ဖွင့်လှစ်ခဲ့ခြင်းဖြစ်ပြီး ၂၀၁၃ ခုနှစ် ပထမလေးလအထိ ရရှိထားသည့် စာရင်းများအရ ကလေးလူနာ ၄၁၁ ဦး အပါအ၀င် ဝေဒနာရှင် စုစုပေါင်း ၃၈၄၁ ဦးအား အေအာတီ ဆေးဝါးများ ထောက်ပံ့ပေးလျက်ရှိကြောင်း သိရသည်။
အေအာတီဆေးဝါး သောက်သုံးပြီး တစ်နှစ်ပြည့် လူနာများအား ကိုယ်ခံအားစနစ် တိုးတက်မှု ရှိ၊ မရှိ သိရှိနိုင်ရန်အတွက် ပိုးကောင်ရေ စစ်ဆေးခြင်း (Viral Load Testing) နှင့် ခြောက်လတစ်ကြိမ် CD4 အရေအတွက် စစ်ဆေးပေးခြင်းများ လုပ်ဆောင်ပေးလျက်ရှိကြောင်း သိရသည်။
 |
| အိပ်ခ်ျအိုင်ဗွီ/အေအိုင်ဒီအက်စ် ဝေဒနာရှင်များအား ပြုစုစောင့်ရှောက်မှု ပေးနေသည့် နေရာတစ်ခုတွင် ဆေးကုသမှု ခံယူနေသူများ |
Eleven Media Group
No comments:
Post a Comment