ရန်ကုန်တိုင်းအစိုးရ၏ အိမ်ရာများ ကျူးကျော်များအတွက် မထိရောက်

ရန်ကုန်တိုင်းအတွင်း ကျူးကျော်နေထိုင် သူများအတွက်ဟုဆိုကာ တိုင်းအစိုးရအနေဖြင့် အိမ်ရာများ ဆောက်လုပ် ရောင်းချခဲ့သော်လည်း ကျူးကျော်စင်စစ်များကို ရောင်းချခဲ့ခြင်း မဟုတ်သည့် အပြင် အဆိုပါ စီမံကိန်းများမှာလည်း မထိရောက်ကြောင်း တိုင်းဒေသကြီး လွှတ်တော်ကိုယ်စားလှယ် ဦးကျော်ဇေယျက ပြောသည်။

ဦးကျော်ဇေယျ က “တိုက်ခန်းတွေကို ဘယ်လိုပေးလိုက်လဲ။ အိုးအိမ်နဲ့ ပေါင်းပြီးတော့ ရောင်းချင်တာကို ရောင်းလိုက်တဲ့ သဘောရှိတယ် ကျူးကျော်တွေမှ မဟုတ်တာ။ ကျူးကျော် ဘယ်နှဦးပါလို့လဲ။ ကျူးကျော်စမတ်ကဒ် ထုတ်ပေးထားတာ ၂ သိန်းလောက် ရှိတယ် အခုကျူးကျော် ဘယ်လောက်ကို တင်လိုက်ပြီ ဘယ်မြို့နယ်က ကျူးကျော် ဘယ်လောက် လျော့သွားပြီ ဆိုတာကို ပြောမယ်ထင်လိုက်တာ မှန်းချက်နဲ့ နှမ်းထွက်လွဲနေတယ်” ဟု ပြောသည်။

ရန်ကုန်တိုင်း အတွင်းရှိ ကျူးကျော်အိမ်ရာနေ ပြည်သူများ နေထိုင်ရန်အတွက် ဆောက်လုပ်ပြီးစီးခဲ့သည့် တိုက်ခန်းပေါင်း ၂၂၀၈  ခန်းနှင့် ဆောင်လုပ်ဆဲတိုက်ခန်း ၈၀၀၀ အား မည်ကဲ့သို့ ဆက်လက်စီမံ ဆောင်ရွက်ထားသည်ကို သိရှိလိုကြောင်း မေးမြန်းမှုနှင့် ပတ်သက်၍ ရန်ကုန်တိုင်းဒေသကြီး အစိုးရ၏ ဖြေကြားမှုကို အပေါ် ဦးကျော်ဇေယျက ဝေဖန်ပြောကြားခဲ့ခြင်း ဖြစ်သည်။

ရန်ကုန်တိုင်းဒေသကြီးအတွင်း အိမ်ပိုင်မရှိသေးဘဲ အိမ်ငှားနေထိုင်ရသူများအတွက် အိမ်ရာလိုအပ်ချက်ကို ဖြည့်ဆည်း ပေးနိုင်ရန် တန်ဖိုးနည်းအိမ်ရာတိုက်ခန်းပေါင်း ၂၂၀၈ ခန်းကို ရန်ကုန်တိုင်းဒေသကြီး ပြည်သူ့အိမ်ရာစီမံကိန်းများ ရောင်းချရေး ကော်မတီက စိစစ်ရောင်းချပေးခဲ့ကြောင်း လျှပ်စစ်၊ စက်မှုလက်မှုနှင့် လမ်းပန်းဆက်သွယ်ရေး ဝန်ကြီး၊ ဒေါ်နီလာကျော်က လွှတ်တော်တွင် ဖြေကြားခဲ့သည်။

ယနေ့ကျင်းပသည့် ရန်ကုန်တိုင်းလွှတ်တော်တွင် အထက်ပါအတိုင်း ဖြေကြားခဲ့ခြင်းဖြစ်သည်။

ဝင်ငွေနည်းပါးသောမိသားစုများ ဝယ်ယူနိုင်စွမ်းရှိလာအောင် CHID Bank မှ အိမ်ဝယ် ချေးငွေထုတ်ချေးပေးသည့် စနစ်နှင့် ချိတ်ဆက်ရောင်းချ ပေးခဲ့ခြင်းဖြစ်ကြောင်း၊ ဘဏ်ချေးငွေအား ၁၅ နှစ်အရစ်ကျ ပေးဆပ်နိုင်ရန် စီစဉ်ထားရှိပြီး၊ ဝယ်ယူသူများကို အတိုးနှုန်း ၈ ဒသမ ၅ ရာခိုင်နှုန်းဖြင့် ပြန်လည် ထုတ်ချေးပေးခြင်းဖြစ်ကြောင်း ဒေါ်နီလာကျော်က ပြောသည်။

ကျူးကျော်များကို ဦးစားပေးပြီး တိုက်ခန်းများ ရောင်းချနေကြောင်းနှင့် တိုက်ခန်းဝယ်ယူနိုင်စွမ်း မရှိသူများအတွက်လည်း အိမ်ရာ ယူနစ်များ စီစဉ်နေကြောင်း ဒေါ်နီလာကျော်က ပြောသည်။

တွံတေးမြို့နယ်၊ ပဒါန်ရေကျော်ကွင်းမြေဧက ၂၄၀၀ ခန့် တွင် တန်ဖိုးနည်းအိမ်ရာ ၂၆၁၈၂ ယူနစ် ဆောက်လုပ်ပြီး လစဉ် အရစ်ကျပေး စနစ်ဖြင့် ကျူးကျော် အိမ်ရာနေပြည်သူများအား ဦးစားပေးပြီး တိုက်ခန်းရောင်းချ ပေးသွားရန် စီစဉ်ဆောင်ရွက်ခဲ့ကြောင်း ဒေါ်နီလာကျော်ကလွှတ်တော်တွင် ပြောကြားခဲ့သည်။

ထို့ပြင် တန်ဖိုးနည်းအိမ်ရာကျပ် ၆၆ သိန်းမှ ကျပ် ၁၄၅ သိန်းအတွင်း တန်ဖိုးရှိသော တိုက်ခန်းများဝယ်ယူရန် မိသားစုဝင်ငွေ သတ်မှတ်ချက် မပြည့်မီသူများ၊ အထူးသဖြင့် ကျူးကျော်အိမ်ရာများတွင် နေထိုင်သူများအတွက် နေအိမ်များကို နေရာချ ထားပေးသွားရန် အစီအမံများချမှတ်ထားကြောင်း ၎င်းက ပြောသည်။

Microfinance ချေးငွေဖြင့်ဆောင်ရွက်နေ သည့် ကျပ်သိန်း ၃၀ တန်အိမ်များကို ရွှေပြည်သာမြို့နယ်၊ သံဒင်း ၄၈  ရပ်ကွက်တွင် ၂၆၄ လုံး ဆောက်လုပ်ပြီးစီး၍ နေရာချထားပေးခဲ့ပြီး ရွှေပြည်သာ၊ လှိုင်သာယာ၊ ဒဂုံ(ဆိပ်ကမ်း)၊ ဒဂုံ(တောင်)၊ ဒဂုံ(အရှေ့) နှင့် ရွှေပေါက်ကံတို့တွင် အိမ်ရာယူနစ် ၁၀၀၀၀ စီ၊ စုစုပေါင်း အိမ်ရာယူနစ် ၆၀၀၀၀ အထိ ဆောင်ရွက်သွားနိုင်ရန် စီမံကိန်းရေးဆွဲထားကြောင်း ရန်ကုန်တိုင်းအစိုးရအဖွဲ့ထံမှ သိရသည်။

သို့သော် ဦးကျော်ဇေယျက “ကျူးကျော်အတွက် မျှော်လင့်ချက်က၊ မျှော်လင့်ချက်မဲ့နေတဲ့ အနေအထားရှိတယ်။ ခေါင်းစဉ်ကတော့ ကျူးကျော် သို့သော်လည်း သူတို့စီမံကိန်းက မထိရောက်ဘူး။ အန်ကယ်တို့ လိုချင်တဲ့ ရာနှုန်းပြည့်မပြောနဲ့ ၁၀၊ ၂၀ လောက်တောင် မရပါဘူး” ဟု ပြောသည်။

တန်ဖိုးနည်း အိမ်ရာများဆောက်လုပ်ရန် လွှတ်တော်မှ အတည်ပြုပေးခဲ့သည့် ငွေကျပ် ၆၄ ဘီလီယံအား ရန်ကုန်တိုင်း ဒေသကြီး  အစိုးရက  အခြားကဏ္ဍတွင် သုံးစွဲခဲ့ခြင်းမှာလည်း ဘဏ္ဍာရေး စည်းမျဉ်းစည်းကမ်းနှင့် မညီကြောင်း ၎င်းက ထောက်ပြခဲ့သည်။

အဆိုပါ ၆၄ ဘီလီယံအား မက်ထရိုပိုလီတန် ကုမ္ပဏီ တွင် ၅၄ ဘီလီယံ နှင့် ရန်ကုန်မြို့သစ်စီမံကိန်း ကုမ္ပဏီ NYDC တွင် ၁၀ ဘီလီယံ သုံးစွဲနေသည်ကို တွေ့ရှိရကြောင်း ထောက်ပြခဲ့ခြင်း ဖြစ်သည်။

ဧရာဝတီ