အရှေ့တောင် အာရှဒေသတွင်းနိုင်ငံတွေ ကမ်းခြေတွေကို လှေစီးပြေးဒုက္ခသည်တွေ ပြီးခဲ့တဲ့ တလလောက် အတွင်း ထောင်နဲ့ချီ ရောက်လာပြီး တဲ့နောက် ဒီကိစ္စနဲ့ ပတ်သက်ပြီး နိုင်ငံတကာ ကလည်း ၀ိုင်းဝန်းကူညီ ဖြေရှင်းကြဖို့ လိုအပ်ကြောင်း ကုလသမဂ္ဂ လုံခြုံရေးကောင်စီမှာ အလှည့်ကျ ဥက္ကဋ္ဌအဖြစ် လက်ရှိ တာဝန် ထမ်းဆောင်နေတဲ့ မလေးရှား နိုင်ငံခြားရေး ၀န်ကြီး Anifah Aman က တိုက်တွန်း ပြောကြားလိုက်ပါတယ်။
“ ဒါကြောင့်လည်း မလေးရှားနိုင်ငံအနေနဲ့ မြန်မာနိုင်ငံက တရားမ၀င် ရောက် လာကြတဲ့ ရိုဟင်ဂျာတွေကို လက်ခံထားပါတယ်။ ကျနော်တို့ဆီ ရောက်လာသူ အားလုံးကိုတော့ လက်ခံမထားနိုင်ပါဘူး။ အခုဆိုရင် မလေးရှားနိုင်ငံက တရားဝင်လက်ခံထားတဲ့ ရိုဟင်ဂျာ ၂၀၀,၀၀၀ လောက် ရှိပါတယ်။ ပင်လယ်ပြင်ထဲ မျောနေတဲ့ ဒုက္ခသည်တွေကို လူသားချင်း စာနာထောက်ထားတဲ့ အနေနဲ့ မလေးရှားနဲ့ အင်ဒိုနီးရှားတို့က လက်ခံထားဖို့ ဆုံးဖြတ်လိုက်တာပါ။
ဒါပေမယ့် ကျနော်တို့ ပြောခဲ့သလိုပါဘဲ၊ ဒီကိစ္စဟာ ကမ္ဘာလုံးဆိုင်ရာ ပြဿနာဖြစ်တဲ့ အတွက် အကူအညီ လိုအပ်တဲ့အချိန်၊ လိုအပ်တဲ့နေရာမှာ နိုင်ငံတကာ အသိုင်းဝိုင်း က ၀ိုင်းဝန်း ကူညီပေးကြဖို့ လိုပါတယ်။ ကျနော်တို့ လက်ခံထားတယ် ဆိုတာက ရေတို ဖြေရှင်းတဲ့ နည်းလမ်းပါ။ ကျနော်တို့ အနေနဲ့ သူတို့ကို တနှစ်လောက် လက်ခံထားလို့ ရပါတယ်။ ဒါပေမယ့် နိုင်ငံတကာ အသိုင်းဝိုင်းကလည်း ဒီဝန်ထုပ်ဝန်ပိုးကို မျှဝေ တာဝန်ယူကြဖို့ လိုပါတယ်။”
ဒီဒုက္ခသည်တွေအရေးအတွက် အမေရိကန်ပြည်ထောင်စုကလည်း ဒေါ်လာ သန်းပေါင်းများစွာ အကူအညီ တွေ ပေးပြီးဖြစ်သလို တချို့ကိုလည်း အမေရိကန်နိုင်ငံ အတွင်း ပြန်လည် နေရာချထားပေးပြီး ဖြစ်တယ်လို့ အမေရိကန်နိုင်ငံခြားရေးဌာနမှာ မကြာသေးခင်က ပြုလုပ်ခဲ့တဲ့ သတင်းစာ ရှင်းလင်းပွဲအတွင်း ပြောခွင့်ရ အမျိုးသမီး Jen Psaki က ပြောကြားခဲ့ပါတယ်။
VOA
No comments:
Post a Comment