Thursday, June 04, 2015

ကိုယ့်ဖဲကိုယ်ချိုး ပြည်ခိုင်ဖြိုး



မေလ ၂၇ ရက်၌ ပြုလုပ်သည့် ပြည်ထောင်စုလွှတ်တော်တွင် ဖုန်းဘီလ်မှ အခွန် ၅ ရာခိုင်နှုန်းကောက်ခံရေးကို ယခုဘဏ္ဍာရေးနှစ်အတွင်း မကောက်ခံရေး ဆိုင်းငံ့ရန်အဆိုအား အတည်ပြုလိုက်သည်။ ၂၀၁၅ ရွေးကောက်ပွဲကျင်းပရန် လပိုင်းမျှသာလိုတော့သည့် အချိန်တွင် အစိုးရအဖွဲ့က ဖုန်းဘီလ်များပေါ်တွင် အခွန်ကောက်ခံရန် ဆုံးဖြတ်ခဲ့ခြင်းဖြစ်သည်။ သို့သော် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ လွှတ်တော်ကိုယ်စားလှယ် ဦးအေးမောက်က ယခုဘဏ္ဍာနှစ်အတွင်း ကောက်ခံခြင်းမပြုဘဲ ဆိုင်းငံ့ရန် လွှတ်တော်သို့ တင်သွင်းခဲ့သည်။ 
ပြည်ခိုင်ဖြိုးပါတီဝင်ဟောင်းများဖြင့် ဖွဲ့စည်းထားသည့် အစိုးရ၏ လုပ်ရပ်ကို ပြည်ခိုင်ဖြိုးပါတီဝင် လွှတ်တော်ကိုယ်စားလှယ်က ကန့်ကွက်သဖြင့် လွှတ်တော်တွင် အနိုင်ရရှိခဲ့ခြင်းသည် မိုဘိုင်းဖုန်းခွန်ဖြတ်တောက်ရန် အစီအစဉ် ယာယီဆိုင်းငံ့ပြီးနောက် ပြည်သူများ၏ တုံ့ပြန်မှုမှာ နှစ်မျိုးဖြစ်သည်။ ကျေးဇူးတင်ခြင်းနှင့် ရွေးကောက်ပွဲနီး၍ နိုင်ငံရေးကစားကွက်ဟု ဝေဖန်ခြင်းဖြစ်သည်။ စစ်မှန်သည့် ဒီမိုကရေစီနိုင်ငံတစ်ခုတွင် မဏ္ဍိုင်သုံးခုသည် နိုင်ငံ၏ အဓိက မောင်းနှင်အားပင် ဖြစ်သည်။ အုပ်ချုပ်ရေးမဏ္ဍိုင်၊ ဥပဒေပြုရေးမဏ္ဍိုင်၊ တရားစီရင်ရေးမဏ္ဍိုင် စသည့် မဏ္ဍိုင်ကြီးသုံးခုသည် တစ်ခုနှင့်တစ်ခု အပြန်အလှန်ထိန်းညှိကာ နိုင်ငံဖွံ့ဖြိုးရေးတိုးတက်ရန် လက်တွဲညီညီဆောင်ရွက်ကြရသည်။ မြန်မာနိုင်ငံသည်လည်း ဒီမိုကရေစီလမ်းကြောင်းတွင် လျှောက်လှမ်းနေပြီဟု ဆိုကြသည်။ မဏ္ဍိုင်သုံးရပ်လည်း ပေါ်ထွက်လာပြီဖြစ်သည်။ သို့သော် ထိုမဏ္ဍိုင်သုံးရပ်သည် အမှန်တကယ်လွတ်လပ်၍ အမှီအခိုကင်းသည်လား ဆိုသည်ကတော့ မေးခွန်းထုတ်စရာပင်။ 

လွှတ်တော်နှင့် အစိုးရအဖွဲ့ သီးခြားရပ်တည်သည် ဆိုသော်လည်း ပြည်သူများ၏ အမြင်တွင် စစ်ဗိုလ်ချုပ်များ ယူနီဖောင်းချွတ်ကာ လူခွဲ၍ နိုင်ငံကို ဆက်လက်အုပ်ချုပ်နေကြဆဲဟု ထင်မြင်နေကြသည်။ ပြီးခဲ့သည့် ၂၀၁၀ ရွေးကောက်ပွဲတွင် စစ်ဗိုလ်ချုပ်ဟောင်းများဖြင့် အဓိကဖွဲ့စည်းထားသည့် ပြည်ခိုင်ဖြိုးပါတီက အပြတ်အသတ် (မည်သည့်နည်းနှင့်ဖြစ်ဖြစ်) အနိုင်ရကာ အစိုးရဖွဲ့နိုင်ခဲ့သည်။ ထို့အပြင် လွှတ်တော်တွင်လည်း စစ်ဗိုလ်ချုပ်ဟောင်းများ၊ အများအပြားပါဝင်သည့် ပြည်ခိုင်ဖြိုးပါတီကပင် အင်အားကြီးပါတီအဖြစ် ရပ်တည်လျက်ရှိသည်။ 

၂၀၁၂ ကြားဖြတ်ရွေးကောက်ပွဲမတိုင်မီ အချိန်များက လွှတ်တော်တွင် အဓိက အတိုက်အခံပါတီဟူ၍ လက်ညှိုးထိုးပြစရာပင် မရှိသလောက်ဖြစ်သည်။ ထို့ကြောင့် ပြည်ခိုင်ဖြိုးပါတီဝင်ဟောင်းများဖြင့် ဖွဲ့စည်းထားသည့် အစိုးရအဖွဲ့၏ လုပ်ရပ်များကို ပြည်ခိုင်ဖြိုးပါတီဝင် လွှတ်တော်ကိုယ်စားလှယ်များက ဝေဖန်ပိုင်းခြားသုံးသပ်စိစစ်၍ ခွင့်ပြုတန်ခွင့်ပြု၍၊ ကန့်ကွက်တန်ကန့်ကွက်ကြသည်။ သို့သော် ပြည်သူများ၏ အမြင်တွင်တော့ ပြည်ခိုင်ဖြိုးပါတီဝင်ဟောင်း၊ အစိုးရအဖွဲ့ဝင် စစ်ဗိုလ်ချုပ်ဟောင်းများနှင့် ပြည်ခိုင်ဖြိုးပါတီဝင် စစ်ဗိုလ်ချုပ်ဟောင်း လွှတ်တော်ကိုယ်စားလှယ်များအား ခွဲခြားမြင်နိုင်ရန် ခဲယဉ်းနေပေသေးသည်။ နိုင်ငံတိုင်းတွင်တော့ အာဏာရပါတီသည် အစိုးရဖွဲ့နိုင်ပြီး လွှတ်တော်တွင်လည်း လူများစု ဖြစ်သဖြင့် နိုင်ငံရေးအား မိမိတို့အလိုရှိရာကို ကြိုးဆွဲနိုင်သည့် အခွင့်အရေးအနည်းအများရကြသည်ချည်းဖြစ်သည်။ 

မြန်မာနိုင်ငံတွင်လည်း ပြည်ခိုင်ဖြိုးပါတီသည် အာဏာရပါတီဖြစ်သဖြင့် နိုင်ငံရေးကစားကွက်ကို လိုသလိုပုံဖော်နိုင်သည့် အခွင့်အရေးရရှိထားသည်။ ကိုယ့်ဖဲကိုယ်ချိုးနိုင်သည့် အခွင့်အရေးရရှိထားသည်ဟု နိုင်ငံရေးလေ့လာသူများက သုံးသပ်ကြသည်။ 

ပြည်ခိုင်ဖြိုးပါတီ၏ ကိုယ့်ဖဲကိုယ်ချိုးသည့် လုပ်ရပ်ဆန်ဆန်များသည် အစိုးရသစ်သက်တမ်းတစ်လျှောက် အများအပြားရှိခဲ့သော်လည်း အခြေခံဥပဒေပြင်ဆင်ရေး၊ ၀န်ထမ်းလစာတိုးရေး၊ မြေယာပြဿနာဖြေရှင်းရေး၊ မီတာခတိုးမြှင့်ကောက်ခံရေးနှင့် ယခု ဖုန်းဘီလ်ပေါ်တွင် အခွန်ငါးရာခိုင်နှုန်းကောက်ခံခြင်းတို့မှာ လူထုသတိထားမိသည့် အချက်များပင်။ နိုင်ငံတွင်းဖြေရှင်းရန် ခက်ခဲသည့် မြေယာပြဿနာများ၊ အခြေခံဥပဒေပြင်ဆင်ရေး ပြဿနာများ အစရှိသည့် ပြဿနာများတွင် ထိုကိစ္စများကို အမြန်ဆုံးပြေလည်အောင် ဖြေရှင်းပေးရန် အစိုးရအဖွဲ့အား တိုက်တွန်းသူများမှာ ပြည်ခိုင်ဖြိုးပါတီဝင် ကိုယ်စားလှယ်များပင်။ သို့သော် ထိုပြဿနာများသည် လက်ရှိအစိုးရသက်တမ်း နိဋ္ဌိတံလုနီးအချိန်ထိပင် ကောင်းမွန်ပြေလည်စွာ ဖြေရှင်းနိုင်ခြင်းမရှိသေးသည်ကို တွေ့ရသည်။ အဆိုပါပြဿနာများကို တခြားနိုင်ငံရေးပါတီတစ်ခုခုမှ တင်သွင်းပါက အခြေအနေသည် တစ်မျိုးဖြစ်နိုင်မည်ဖြစ်သော်လည်း ပြည်ခိုင်ဖြိုးပါတီက လက်ဦးမှုရယူကာ တင်သွင်းခဲ့ပြီး ပါတီဝင်ဟောင်းအစိုးရအဖွဲ့၏ အကောင်အထည်ဖော်မှုအပိုင်းတွင်တော့ အားရစရာမရှိသည်ကို တွေ့ရသည်။ မြေယာပြဿနာသည်လည်း ဖြေရှင်းလာသည်မှာ သုံးနှစ်ကျော်ခဲ့ပြီဖြစ်သော်လည်း မပြေလည်နိုင်သေးသည့်အပြင် တောင်သူတစ်ဦး ကိုယ့်ကိုယ်ကိုယ် မီးရှို့သတ်သေဆန္ဒပြသည်အထိ ဆိုးရွားလာနေသည်။ 

သို့သော် အဆိုပါ မြေယာပြဿနာများကို ဖြေရှင်းပေးရန် အဓိကအဆိုတင်သွင်းသူမှာ ပြည်ခိုင်ဖြိုးထိပ်ပိုင်းခေါင်းဆောင်တစ်ဦးဖြစ်သည့် ဦးတင်ထွတ်ပင်။

ဦးတင်ထွတ် တင်သွင်းပြီးနောက် လွှတ်တော်တွင်း ယင်းအဆိုကို ဆွေးနွေးသူများဖြင့် စည်ကားခဲ့ပြီး ဦးတင်ထွတ်ကိုပင် မြေယာကော်မတီ၏ ဥက္ကဋ္ဌအဖြစ် တာဝန်ပေးကာ ဆောင်ရွက်စေခဲ့သည်။ အလားတူ အခြေခံဥပဒေပြင်ဆင်ရေးတွင်လည်း တကြော်ကြော် ကြွေးကြော်ခဲ့သည်က အမျိုးသားဒီမိုကရေစီအဖွဲ့ချုပ်ဖြစ်သော်လည်း တကယ်တမ်းပြင်ရန် အဆိုတင်သွင်းလိုက်သူက ထိပ်ပိုင်းခေါင်းဆောင်တစ်ဦးဖြစ်သူ သူရဦးအေးမြင့်။ မည်သုိ့မျှ ထင်မထားသူက တင်သွင်းလိုက်သည့်အတွက် ပြည်သူများ မျက်စိလည်ကုန်ကြသည်။ ပြည်ခိုင်ဖြိုးတွင် အမှန်တကယ် ပြောင်းလဲလိုသူများ ရှိသည်ဟု ထင်မှတ်သွားကြသည်။ သို့သော် အခြေခံဥပဒေပြင်ဆင်မှုသည် ပြည်သူများလိုလားချက်ကို သိရှိပြီးဖြစ်သော်လည်း အဆုံးမသတ်နိုင်သေးသည့် အခန်းဆက်ဝတ္ထုရှည်တစ်ပုဒ်ပင်

‘‘ပြည်ခိုင်ဖြိုးက တော်တော်များခွဲကစားပြီး ရန်ဖြစ်သလို လုပ်ထားတာ။ ပြဿနာတွေကိုလည်း Pending (ဆိုင်းငံ့)ထားတာကို တွေ့ရတယ်’’ဟု နိုင်ငံရေးဆောင်းပါးရှင် ဒေါက်တာရန်မျိုးသိမ်းက ပြောသည်။ 

အလားတူ နိုင်ငံ့ဝန်ထမ်းများ လစာတိုးမြှင့်ရေးတွင်လည်း ပြည်သူ့လွှတ်တော်ဥက္ကဋ္ဌကိုယ်တိုင်က မည်သို့မည်ပုံ တိုးမြှင့်ပေးရန် လိုအပ်သည်ကို ပြောဆိုလာပြီး အစိုးရအဖွဲ့အား တိုက်တိုက်တွန်းတွန်း ပြောဆိုမှုများရှိလာသဖြင့် နိုင်ငံ့ဝန်ထမ်းအများစု၏ လက်ခုပ်သံများဖြင့် စီညံနေခဲ့သည်။ 

သို့သော် တကယ်တမ်း လစာတိုးမြှင့်ချိန်တွင် ၀န်ထမ်းများမျှော်လင့်သလို ဖြစ်မလာခဲ့။ စသည့် ဖြစ်ရပ်များသည် ပြည်ခိုင်ဖြိုးပါတီဝင်ဟောင်း အစိုးရအဖွဲ့ဝင်များအား ပြည်ခိုင်ဖြိုးပါတီဝင် လွှတ်တော်ကိုယ်စားလှယ်များက တိုက်တွန်းခဲ့မှုများပင်။ အလားတူ မီတာခများ တိုးမြှင့်ကောက်ခံခြင်းကိစ္စများ၊ ဖုန်းဘီလ်တွင် အခွန်ဆောင်ရန် ကိစ္စရပ်များသည်လည်း အစိုးရအဖွဲ့က ကြေညာခဲ့ပြီး ပြည်ခိုင်ဖြိုးကပင် ကန့်ကွက်ကြောင်း၊ ဆိုင်းငံ့သင့်ကြောင်း အဆိုတင်ခဲ့သည်။ ထိုနည်းဖြင့် ပြည်သူများထံမှ လက်ခုပ်သံများခြွေယူခဲ့သည်ပင်။

‘‘တယ်လီဖုန်းခွန်နဲ့ပတ်သက်ပြီးတော့လည်း ရွေးကောက်ပွဲနီးမှ ဒီလိုလုပ်တယ်ဆိုတာ ပြည်ခိုင်ဖြိုးက အရပ်စကားနဲ့ပြောရရင် ကိုယ့်ဖဲကိုယ်ချိုးတဲ့သဘောပဲ’’ဟု ရခိုင်အမျိုးသားပါတီ ဗဟိုအလုပ်အမှုဆောင် ဦးအေးသာအောင်ကပြောသည်။ 

နယ်ဒေသများတွင်လည်း လမ်းဖောက်ခြင်း၊ တံတားဆောက်ခြင်း၊ ဖွံ့ဖြိုးရေးလုပ်ငန်းများလုပ်ခြင်း စသည့်လုပ်ငန်းများတွင် ပြည်ခိုင်ဖြိုးကိုယ်စားလှယ်များနှင့် ပါတီဝင်ဟောင်း အစိုးရအဖွဲ့ဝင်များက ပြည်ခိုင်ဖြိုးက လုပ်ပေးသယောင် ပြည်သူများအား ထင်ယောင်ထင်မှားဖြစ်စေရန် ပြောကြားမှုများရှိနေသည်ဟု ဦးအေးသာအောင်က ဆက်လက်ပြောကြားသည်။ 

‘‘ရွေးကောက်ပွဲမှာ ပြည်သူတွေကို အလုပ်လုပ်ပေးပါ့မယ်လို့ ကတိခံတယ်။ ကိုယ်စားလှယ်ဖြစ်လာတယ်။ ကိုယ်စားလှယ်ကမှတစ်ဆင့် ၀န်ကြီးဖြစ်လာတယ်ဆိုရင်လည်း လုပ်တဲ့အလုပ်တွေကို အကုန်တာဝန်ယူရမှာပဲ။ မကောင်းရင်လည်းခံရမှာပဲ။ လုပ်ပေးရမယ့် တာဝန်ကိုရှိလာတာ။ ဒါကို လုပ်ပေးနေပါတယ်လို့ ပြောလို့မရဘူး’’ဟု ဦးအေးသာအောင်ကပြောသည်။ 

ယခုကဲ့သို့ အာဏာရပါတီ ကိုယ့်ဖဲကိုယ်ချိုးနိုင်သည့် အခွင့်အရေးရရှိနေခြင်းမှာလည်း အတိုက်အခံအားနည်းခြင်းကြောင့်ဟု နိုင်ငံရေးလေ့လာသူများက သုံးသပ်သည်။ အတိုက်အခံဘက်မှ အစိုးရ၏ လုပ်ရပ်များကို သွက်သွက်လက်လက်ဖြင့် ဝေဖန်ပိုင်းခြားနိုင်မည်ဆိုပါက အာဏာရပါတီ၏ လုပ်ကွက်များကို အနည်းငယ်ထိန်းချုပ်နိုင်မည်ဟု ဆိုကြသည်။ 

‘‘ဒီမှာက ခွဲကစားပြီး လူထုအကြိုက်ကို ထိန်းထားလိုက်တဲ့ သဘောဖြစ်နေတယ်။ ခက်တာက အတိုက်အခံက အားမကောင်းတော့လည်း အလုပ်လုပ်တာ ကိုယ့်ဖဲကိုယ်ချိုးသလိုဖြစ်သွားတာပေါ့။ အတိုက်အခံက ပြင်းပြင်းထန်ထန်ကန့်ကွက်ဖို့လိုတာတွေရှိတယ်’’ဟု ဒေါက်တာရန်မျိုးသိမ်းကပြောကြားသည်။ 

ထိုကဲ့သို့သော အခြေအနေများကြောင့် ရိုးသားသည့် အခြေခံလူတန်းစားများသည် ဆင်ထားသည့် အကွက်ဝင်သွားနိုင်ဖွယ်ရှိကြောင်း လေ့လာသူများကပြောသည်။ ထိုသို့ဖြစ်လာ၍ နောင်ရွေးကောက်ပွဲတွင် ပြည်ခိုင်ဖြိုးပင် အနိုင်ရသွားမည်ဆိုပါက နိုင်ငံအခြေအနေသည် ယခုပုံစံအတိုင်းပင်ဖြစ်နေမည်ဟု ဦးအေးသာအောင်က သုံးသပ်သည်။

‘‘ပြည်ခိုင်ဖြိုးက လေးနှစ်ကျော်၊ ငါးနှစ်ဖြစ်တော့မယ်။ ကျွန်တော်တို့ဖြစ်စေချင်တာ ဘာမှမဖြစ်ခဲ့ဘူး။ သာမန်ပြည်သူ၊ လက်လုပ်လက်စားလယ်သမားတွေရဲ့ ဘ၀လူနေမှုအဆင့်အတန်း သိသိသာသာတိုးတက်လာတာ မတွေ့ရဘူး။ ထိထိရောက်ရောက်လုပ်တာ မတွေ့ဘူး’’ဟု ဦးအေးသာအောင်ကပြောသည်၊

7day







No comments:

Post a Comment

My Blog List