ပိုလျှံငွေ ကျပ် ၁၃ ဘီလီယံ ပြည်ထောင်စုအစိုးရထံ ပြန်အပ်

ပြီးခဲ့တဲ့၂၀၁၃-၂၀၁၄ ဘဏ္ဍာရေးနှစ်အတွင်း ရခိုင်ပြည်နယ်ဖွံ့ဖြိုးရေးအတွက် ပြည်ထောင်စု အစိုးရက ချပေး ထားတဲ့ ဘဏ္ဍာငွေကျပ် ၁၀၉ ဘီလီယံထဲက ပိုလျှံတဲ့ ၁၃ ဘီလီယံကျော်ကို ပြည်ထောင်စုအစိုးရထံ ပြန်လည်ပေးအပ်လိုက်တယ်လို့ သိရပါတယ်။

အဲ့ဒီ ပိုလျှံလို့ ပြန်အပ်တဲ့ ဘတ်ဂျက်ငွေကိစ္စနဲ့ပတ်သက်ပြီး ရခိုင်ပြည်နယ် ဘဏ္ဍာရေးနဲ့ အခွန်ဝန်ကြီးဌာနက ရခိုင်ပြည်နယ်လွှတ်တော်ထံ အစီရင်ခံစာ တင်သွင်းခဲ့တာ ဖြစ်ကြောင်း ပြည်နယ်လွှတ်တော်ကိုယ်စားလှယ် ဦးအောင်မြကျော်က ပြောပါတယ်။

"အဓိကကတော့ ၂၀၁၃၊ ၂၀၁၄ မှာ ကျနော်တို့ ရခိုင်ပြည်နယ် အစိုးရအဖွဲ့မှာ ပါဝင်ရေး ကျနော်တို့ ဝန်ကြီးဌာန ၂၅ ခုရှိပါတယ်၊ အဲ့ဒီ ၂၅ ခုရဲ့ အသုံးစရိတ် အနေနဲ့ တစ်နှစ်ပတ်လုံး အတွက်နေပြီး ပြည်ထောင်စု အစိုးရက ၁၀၉ ဘီလီယံ ခွင့်ပြုချက်ကျပါတယ်၊ ဒီ ၁၀၉ ဘီလီယံ အတွင်းက အဲ့လို အသုံးစရိတ် အသုံးကျတဲ့အချိန်မှာ ပိုလျှံလာတဲ့ငွေတွေပါ၊ ၁၃.၁၈ ဘီလီယံ ကို ပြည်ထောင်စုအစိုးရကို ပြန်အပ်လိုက်ရတဲ့ သဘောမျိုး ဖြစ်ပါတယ်"

ပြည်ထောင်စုအစိုးရထံ ပြန်အပ်လိုက်ရတဲ့အထဲမှာ ပြည်နယ်လမ်းပန်း ဆက်သွယ်ရေးဝန်ကြီးဌာန လက်အောက်မှာရှိတဲ့ လမ်းတံတားပြုပြင်ရေးဦးစီး ဌာနရဲ့ ပိုလျှံငွေက အများဆုံးဖြစ်ပြီး ကျပ်ငွေ ၁၁ ဘီလျံအထိရှိခဲ့ကြောင်း သိရပါတယ်။

ရခိုင်ပြည်နယ်အစိုးရရဲ့ တစ်နှစ်တာ ဘဏ္ဍာငွေသုံးစွဲမှုနဲ့ ပတ်သက်တဲ့ အစီရင်ခံစာကို ဒီနှစ်မှာ ပထမဆုံးအကြိမ်အဖြစ် ပြည်နယ်လွှတ်တော်မှာ တင်သွင်းခဲ့တာဖြစ်ပါတယ်။

ကျပ်ငွေ ၁၃ ဘီလျံအထိ ပိုလျံခဲ့တာဟာ ပြည်ထောင်စုအစိုးရက ဘတ်ဂျက်ချထားပေးတဲ့ အချိန်နောက်ကျခြင်းကြောင့်ဖြစ်ကြောင်း ပြည်နယ်ဘဏ္ဍာရေးနဲ့ အခွန်ဝန်ကြီးဌာန ဝန်ကြီးက ရခိုင်ပြည်နယ်လွှတ်တော်အစည်းအဝေးမှာ ဖြေရှင်းချက်ပေးခဲ့တယ်လို့လည်း လွှတ်တော်ကိုယ်စားလှယ်တွေက ဆိုပါတယ်။

ဒါ့အပြင် ပြီးခဲ့တဲ့ ၂၀၁၂-၂၀၁၃ ဘဏ္ဍာရေးနှစ်ကလည်း ရခိုင်ပြည်နယ် ဖွံ့ဖြိုးရေး အတွက် ပြည်ထောင်စုအစိုးရကနေ ချပေးထားတဲ့ ဘတ်ဂျက်ထဲက ကျပ်ငွေ ၄ ဘီလျံလောက်ကို ပြန်လည်အပ်နှံခဲ့ရတယ်လို့လည်း သိရပါတယ်။

RFA Burmese