စကော့တလန်နိုင်ငံက ဗြိတိန်နိုင်ငံကနေ ခွဲထွက်သင့်သလား မသင့်ဘူးလားဆိုတဲ့ ကိစ္စနဲ့ ပတ်သက်ပြီး ဒီကနေ့မှာ လူထုဆန္ဒခံယူပွဲ ကျင်းပမှာ ဖြစ်တဲ့အတွက် နိုင်ငံရေးသမားတွေက အစွမ်းကုန် မဲဆွယ်စည်းရုံး မှုတွေ လုပ်ခဲ့ကြပါတယ်။
အခုလောလောဆယ် ကြိုတင်စစ်တမ်းမှာ ပြသချက်အရ ဗြိတိန်နိုင်ငံကနေ မခွဲထွက်လိုသူတွေ အနည်းငယ် ပိုများနေကြောင်း ပြသထားပါတယ်။
စကော့တလန်နိုင်ငံက ဗြိတိန်နိုင်ငံကနေ ခွဲထွက်သွားမှာကို စိုးရိမ်တဲ့ ဗြိတိန် ဝန်ကြီးချုပ်ဟောင်း Gordon Brown ကတော့ စကော့တလန်နိုင်ငံကို မျိုးချစ်ပုဂ္ဂိုလ်တွေ မပိုင်ဆိုင်ဘူးလို့ ပြောပါတယ်။
စကော့တလန်နိုင်ငံ၊ စကော့တလန် အလံ၊ ရိုးရာဓလေ့နဲ့ စကော့တလန် လမ်းတွေကို ဒီမျိုးချစ် ပုဂ္ဂိုလ်တွေ မပိုင်တဲ့အကြောင်း စကော့တလန်နိုင်ငံဟာ လူတိုင်းရဲ့ နိုင်ငံ၊ လူတိုင်းရဲ့ အလံ၊ လူတိုင်းရဲ့ ရိုးရာဓလေ့နဲ့ လူတိုင်းရဲ့ လမ်းတွေ ဖြစ်တယ်လို့ ပြောပါတယ်။
ခွဲထွက်ရေးကို လိုလားနေတဲ့ စကော့တလန်အမျိုးသား ပါတီခေါင်းဆောင် Alex Salmond ကတော့ မဲပေးမယ့် ပြည်သူတွေကို အိတ်ဖွင့်ပေးစာ ပေးပို့ခဲ့ပြီး ခွဲထွက်ရေးအတွက် Yes လို့ မဲပေးကြဖို့ တိုက်တွန်း ထားပြီး ဒါဟာ စကော့တလန် ပြည်သူတွေအနေနဲ့ ကိုယ်ရဲ့ စွမ်းရည်ကို ပြသနိုင်ဖို့ အကောင်းဆုံးအချိန် ဖြစ်တယ်လို့ ပြောဆိုထားကြောင်း အေဘီစီ သတင်းထောက် Barbara Miller က Edinburgh မြို့ကနေ သတင်းပေးပို့ထားပါတယ်။
ABC
No comments:
Post a Comment