ဧရာဝတီတိုင်း မြောင်းမြခရိုင် အိမ်မဲမြို့မ ရဲစခန်းမှ အချုပ်သားများ ထွက်ပြေးမှုနှင့် ပတ်သက်ပြီး အိမ်မဲ ရဲစခန်းမှ တပ်ကြပ်ကြီး အဆင့်ရှိသူ တဦးအပါအ၀င် ရဲတပ်ဖွဲ့ဝင် ၇ ဦးအား ဖမ်းဆီး စစ်ဆေးနေကြောင်း သိရသည်။
အိမ်မဲမြို့မ ရဲစခန်းတွင် ချုပ်ထားသည့် အချုပ်သား ၃ ဦးသည် စက်တင်ဘာလ ၁၄ ရက် နံနက်ပိုင်းက အချုပ်ခန်းတံခါးရှိ သံတိုင် ၂ ချောင်းကို သံဖြတ်လွှဖြင့် ဖြတ်တောက် ထွက်ပြေးသွားခဲ့ပြီးနောက် စက်တင် ဘာ ၁၅ ရက်တွင် ၎င်းအချုပ်သားများကို ပြန်လည် ဖမ်းမိခဲ့သည်ဟု ဆိုသည်။ တဦးကို အိမ်မဲမြို့နယ် ၀ဲကြီးဝ ကျေးရွာတွင် ဖမ်းဆီးနိုင်ခဲ့ပြီး ကျန် ၂ ဦးကို ကမန်းတောင် ကျေးရွာအနီး တွင် ပြန်လည်ဖမ်းမိခဲ့ကြောင်း သိရသည်။
ထိုအချုပ်သား ၃ ဦး ထွက်ပြေးမှုနှင့် ပတ်သက်ပြီး အချုပ်ခန်း စောင့်ကြပ်သည့် ရဲတပ်ဖွဲ့ဝင်များအား တာဝန် ပေါ့လျော့မှုဖြင့် ၀ါးခယ်မမြို့နယ် ရဲမှူးဦးဆောင်သည့် စုံစမ်းစစ်ဆေးရေး အဖွဲ့က ဖမ်းဆီးစစ်ဆေးနေကြောင်း အိမ်မဲမြို့နယ် ရဲတပ်ဖွဲ့မှူးရုံးမှ တာဝန်ကျတဦးက ပြောသည်။
“လောလောဆယ်တော့ စခန်းအဖွဲ့ ၇ ယောက်ကို ဖမ်းဆီးစစ်ဆေး ဆောင်ရွက် နေပါတယ်။ ၀ါးခယ်မ မြို့နယ် ရဲတပ်ဖွဲ့ ဦးဆောင်တဲ့ စစ်ဆေးရေးအဖွဲ့နဲ့ စစ်ဆေးနေတုန်းပါ”ဟု အိမ်မဲမြို့နယ် ရဲတပ်ဖွဲ့မှူးရုံးမှ တာဝန်ရှိသူတဦးက ပြောသည်။
အချုပ်သား ထွက်ပြေးမှုနှင့် ပတ်သက်ပြီး အချုပ်ခန်းစောင့်သူ ရဲဝန်ထမ်းများသာမက အိမ်မဲမြို့မ စခန်းမှူး ဒုရဲမှူး မင်းဆွေနှင့် ရဲ တပ်ဖွဲ့ဝင် ၃၀ ကျော်ကို စုံစမ်းစစ်ဆေးရေး ခုံရုံးဖြင့် စစ်ဆေးနေကြောင်း သိရသည်။
“အိမ်မဲမြို့မ စခန်းမှူး အပါအ၀င် ကျန်တဲ့ တပ်ဖွဲ့ဝင်တွေပါ အစစ်ဆေးခံ နေရပါတယ်။ အစစ်ခံနေရသူ လူပေါင်း ၃၀ ကျော်လောက် ရှိတယ်။ တိုင်းဒ/န (ဒုစရိုက် နှိမ်နင်းရေးအဖွဲ့) တွေပါ အစစ်ခံရတဲ့ အထဲမှာ ပါတယ်”ဟု အိမ်မဲမြို့မ ရဲစခန်းမှ ရဲအရာရှိ တဦးက ဧရာဝတီကို ပြောသည်။
အချုပ်ခန်းအား ဖောက်ထွင်း ထွက်ပြေးသူများမှာ ခိုးမှု၊ တပ်ပြေးအမှု၊ ရဲဘက်ပြေး အမှုတို့ဖြင့် ဖမ်းဆီးခံထား ရသူများ ဖြစ်ကြောင်း သိရသည်။
အိမ်မဲမြို့မ ရဲစခန်းမှူး ဒုရဲမှူး မင်းဆွေက “အိမ်မဲမြို့ပေါ်မှာ လမ်းဘေးက လေလွင့် ကလေးငယ်တွေကို စခန်းကို ခေါ်ယူ စစ်ဆေး ထိန်းသိမ်းထားပေးပြီး စာရိတ္တ ပြင်ပေးနေတယ်။ အဲဒီကလေးကို သူတို့က ပိုက်ဆံ ၅၀၀ ပေးပြီး သံဖြတ်လွှ တချောင်း ၀ယ်ခိုင်း လိုက်တာ။ ကလေးကလည်း မုန့်ဖိုးရတာရယ်၊ မသိတဲ့ အနေအထားရယ်ကြောင့် ၀ယ်လာပေးတော့ အခုလို ကိစ္စတွေ ဖြစ်သွားတာ” ဟု ပြောသည်။
အချုပ်ခန်း ဖောက်ထွင်း ထွက်ပြေးသည့် အချုပ်သား ၃ ဦးအား ယခင်ပုဒ်မများ အပြင် ပြစ်မှု အမှတ် ၉၅/ ၂၀၁၄၊ ပြစ်မှုဆိုင်ရာ ပုဒ်မ ၂၂၄ ဖြင့် အိမ်မဲ ရဲစခန်းက ထပ်မံအမှုဖွင့် အရေးယူထားကြောင်း သိရသည်။
ဧရာဝတီ
No comments:
Post a Comment