ငါးဖမ်းလှေတွေ ပေါ်မှာ ကျွန်တွေလို ဖမ်းဆီးချုပ်နှောင်ပြီး အတင်းအဓမ္မ ခိုင်းစေခံခဲ့ရတဲ့ မြန်မာရွှေ့ပြောင်း အလုပ်သမား ၈၀၀ လောက် အင်ဒိုနီးရှား ကနေ မြန်မာပြည် ကို ပြန်ပို့ခဲ့ပြီးဖြစ်ပါတယ်။ အဲဒီထဲက အနှစ် ၂၀ ကျော် ငါးဖမ်းကျွန် ဘဝ နဲ့ လှုပ်ရှား ရှောင်တိမ်းခဲ့ရတဲ့ ကိုမြင့်နိုင်အကြောင်း အေပီ သတင်းဆောင်းပါး ကို အခြေခံပြီး ကိုငြိမ်းချမ်းက ပြောပြပါမယ်။
အင်ဒိုနီးရှားနိုင်ငံက ကျွန်းစုတွေပေါ်မှာ မြန်မာရေလုပ်သားတွေ အပါအဝင် အိမ်နီးချင်း နိုင်ငံက ရွှေ့ပြောင်း အလုပ်သမားတွေကို ကျွန်တွေလို ဖမ်းဆီးချုပ် နှောင်ပြီး အတင်းအဓမ္မ ခိုင်းစေထားတဲ့ သတင်းကို အေပီ သတင်းဌာန က ဖော်ထုတ်ပြီးတဲ့နောက်မှာ မြန်မာ ရေလုပ်သား ၈၀၀ နီးပါး လောက်ဟာ ကျွန်ဘဝက လွှတ်မြောက်ပြီး မြန်မာပြည်ကို ပြန်ရောက်လာကြပြီ ဖြစ်ပါ တယ်။
အဲ့ဒီ အထဲ က အနှစ် ၂၀ ကျော် လောက် ကျွန်ပြုတာနဲ့ အဲဒါကို ပုန်းရှောင်ခဲ့ တဲ့ ကိုမြင့်နိုင် အကြောင်းကို ပြောပြပါမယ်။ မြန်မာနိုင်ငံမှာ ဆင်းရဲကြပ်တည်းမှုကို ဖြေရှင်းဖို့ အတွက် ထိုင်းကို အလုပ်ရှာဖို့ ထွက်ခဲ့တဲ့ အသက် ၁၈ နှစ် အရွယ်ကို မြင့်နိုင်ဟာ ထိုင်းငါးဖမ်းလှေပေါ် ရောင်းစားခံရပြီး လခမပေးပဲ ကျွန်လို ခိုင်းခဲ့ရ တာပါ။ သူ့အတွေ့အကြုံကို အခုလို ပြောပါတယ်။
" အဲ့ဒီ့တော့ စဉ်းစားကြည့် အစ်ကို၊ နွားလောက်တောင် တန်ဖိုး မရှိဘူးဖြစ် သွားတာပေါ့။ လှိုင်းကြား လေကြားထဲမှာ စိုရွှဲနေတဲ့ အဝတ်အစားကို ပြန်ဝတ် ပြန်ခြောက် နဲ့ အအေးတွေ ဘာတွေ ပတ် ဖျားနာ အဲ့လိုဖြစ်တာပေါ့။ နောက်ပြီးတော့ အစားအသောက် ပုံမှန် မကျွေးဘူး။ ညဆိုလည်း မအိပ်ရဘူး။ နေ့ဆို လည်း မအိပ်ရဘူး။ "
ပထမအခေါက် ကျွန်ပြုခံခဲ့ရတာ ငါးနှစ်လောက်ကြာခဲ့ပြီး အဲဒီ လှေပေါ်က နေခုန်ချ ထွက်ပြေးခဲ့ပါတယ်။ အင်ဒိုနီးရှားက ကျွန်းစုတွေ ပေါ်မှာ ပုန်းအောင်းနေပြီး ငါးနှစ်အကြာမှာတော့ မြန်မာပြည်ကို ပြန်ခွင့်ရမလား ဆိုတဲ့ မျှော်လင့်ချက် နဲ့ အင်ဒိုနီးရှား ငါးဖမ်းလှေပေါ် ပြန်လိုက်ခဲ့ပါတယ်။ အဲဒီလှေပေါ်မှာလည်း ကျွန်လိုခိုင်း စေ နှိပ်စက်မှုတွေကို ၈ နှစ်လောက်ခံ ခဲ့ရပြီး သူကို အိမ်ပြန်ပို့ ဖို့ တောင်းပန်ခဲ့ပေမဲ့လည်း သဘောင်္ကပ္ပတိန် ကတော့ သူ့ကို သံကြိုးခတ်ပြီး ဖမ်းဆီးခဲ့တယ်လို့ ပြောပါတယ်။
" အကြိမ်ကြိမ်တောင်းပန်တာပေါ့ဗျာ။ ခြေသလုံးဖက်တယ်။ စကားမတတ် ဘူး။ စကားတတ်တဲ့သူကို ပြောခိုင်းတယ်။ ပေးပြန်ဖို့ပေါ့လေ။ ပိုက်ဆံ မပေး ရင် နေပေါ့လေ။ ထိုင်းပြန်ရောက်ရင် ကျေနပ်ပြီပေါ့။ ကျနော့် ကိုသံကြိုးခတ် ထားတယ်။ မိုးရေထဲမှာ သံကြိုးခတ်တယ်။ "
သံကြိုးအချုပ်အနှောင်ကို ရတဲ့ သံချောင်းလေးနဲ့ ဖွင့်ပြီး လွတ်မြောက်ဖို့အတွက် ပင်လယ်ထဲကို ခုန်ချခဲ့ပါ တယ်။ အဲဒီနောက် အင်ဒိုနီးရှားက ကျွန်းတွေပေါ်မှာ အခြား မြန်မာပြည်က ဘဝတူ ငါးဖမ်းကျွန်နှစ်ယောက် နဲ့ အတူ ဟင်းသီးဟင်းရွက်တွေ စိုက်ပြီး ပုန်းအောင်းနေခဲ့ပါတယ်။ အသီးအနှံ တွေ သွားရောင်းတဲ့ သူငယ် ချင်းတစ်ယောက်ကိုလည်း အင်ဒိုနီးရှားရဲကဖမ်းပြီး ငါးဖမ်းလှေတွေပေါ် ပြန်ရောင်းစားခဲ့လို့ အဲဒီသူငယ်ချင်း ကတော့ ငါးဖမ်းလှေပေါ်မှာ ပဲ ဖျားနာ သေဆုံးခဲ့ရပါတယ်။
ဒီလို နဲ့ နေလာလိုက်တာ တနေ့မှာ အေပီသတင်းကြောင့် အင်ဒိုနီးရှားအစိုးရက သူတို့လို ငါးဖမ်းလုပ်သား တွေကို ကယ်တင်ပြီး အိမ်ပြန်ပို့နေပြီ ဆိုတဲ့ သတင်းကို သူငယ်ချင်း တစ်ယောက်ဆီက ကြားခဲ့ပါတယ်။ အဲဒါ နဲ့ တာဝန် ရှိသူတွေ နဲ့ ဆက်သွယ်ပြီး ကိုယ်နိုင်ငံကိုယ် ပြန်ဖို့ လုပ်ဆောင်ခဲ့ တာပါ။ သူ့အနေနဲ့ အမေ နဲ့ ညီမကို ပြန်တွေ့ရတဲ့အတွက် ဝမ်းသာကြောင်း ပြောပါ တယ်။
VOA
No comments:
Post a Comment