မြန်မာ့ရုပ်မြင်သံကြား (MRTV) နဲ့ HOME Media တို့ ပူးပေါင်း ထုတ်လွှင့်ပြ သမယ့် ဖျော်ဖြေရေး အစီအ စဉ်တွေအကြောင်း အသိပေး အခမ်းအနားကို ဒီနေ့ မေ ၆ ရက်နေ့မှာ ရန်ကုန် Central Hotel မှာ ကျင်းပ ပြုလုပ်ခဲ့ပါတယ်။
ထုတ်လွင့်မှု အပိုင်းနဲ့ပတ်သတ်ပြီး မြန်မာ့အသံနဲ့ ရုပ်မြင်သံကြားက ဒုတိယညွှန်ကြားရေးမှူး ဦးကြည်ထွန်း က “ကျနော်တို့က ပြည်သူလူထုအတွက် Channel အသစ်တွေ ထုတ်လွှင့်ပေးပြီး တင်ဆက်နေပါတယ်။ ဒီလို ထုတ်လွှင့် ပေးတဲ့ နေရာမှာ ကျနော်တို့ ဌာနအတွက် အစီအစဉ် အသစ်တွေလည်း လိုအပ်ပါတယ်။ ဒါကြောင့် ဌာနတွင်း အစီအစဉ်များသာမက၊ အပြင်က ပုဂ္ဂိုလ်၊ ဌာနများနဲ့ ပူးပေါင်းပြီး ကျွမ်းကျင်တဲ့ အနု ပညာရှင်များက တီထွင်ဖန်တီးတဲ့ ဆန်းသစ်တဲ့ ပြကွက်၊ သရုပ်ဆောင်ချက်များကို ကျနော်တို့ ရုပ်မြင်သံကြား က ထုတ်လွှင့်ပေးနိုင်ရင် မိဘပြည်သူများရဲ့ စိတ်ကျေနပ်မှုကို အပြည့်အဝ ပုံဖော်ဖြည့်စွမ်း ပေးနိုင်မယ်လို့ ယုံကြည်ပါတယ်” လို့ ရှင်းလင်းတင်ပြခဲ့ပါတယ်။
ရိုက်ကူးတင်ဆက်မယ့် အစီအစဉ်လေးခုထဲက မြန်မာအငြိမ့်သဘင် ရေစီးကြောင်း အစီအစဉ်မှာ အငြိမ့်နဲ့ ပတ်သက်ပြီး အငြိမ့်ဆိုတာ ဘာလဲ၊ ဘယ်ကစလဲ စတဲ့ အကြောင်းအရာတွေကို လူရွှင်တော် ဇာဂနာနဲ့ အရိုင်းတို့က ဦးစီးကာ အငြိမ့်မင်းသမီး နန်းခင်မွှေး၊ ချောစုမျိုး၊ ရွှေရည်ဝင်း၊ စန်းနီလာဝင်း တို့နဲ့အတူ လူရွှင်တော်များစွာ ပါဝင်ပြီး တင်ဆက် ရိုက်ကူးထားတယ်လို့ သိရပါတယ်။
တမ်းတမ်းတတဖြစ်ခဲ့ရသော ရုပ်ရှင်သီချင်းများ အစီအစဉ်မှာတော့ မြန်မာ့ရုပ်ရှင်သီချင်းတွေထဲမှာ ပရိ သတ် နှစ်ခြိုက် အားပေးမှု ရရှိခဲ့တဲ့ ဟိုးအရင် မြန်မာရုပ်ရှင် ဇာတ်ကားတွေထဲက ရုပ်ရှင်တေးတွေ ၊ အောင်မြင်ခဲ့တဲ့ ဇာတ်ဝင်တေး သီချင်းတွေကို ပြန်လည်သီဆို ထုတ်လွှင့်မှာဖြစ်ပြီး ရင်တွင်းရေးပြဿနာ ဇာတ်လမ်းတွဲကတော့ အောင်မြင်တဲ့ စီးပွားရေး လုပ်ငန်းရှင်တဦးရဲ့ ငယ်ဘဝကနေ ကြီးလာတဲ့အထိ ဖြတ် သန်းခဲ့တဲ့ ဘဝ၊ ပြဿနာပေါင်းစုံကို တင်ဆက် ရိုက်ကူးပုံဖော်ထားတာ ဖြစ်ပါတယ်။
Channel zero ဇာတ်လမ်းတွဲကတော့ Channel zero Channel တင်ဆက်သူတွေရဲ့ အတွင်းရေးတွေကို ရယ်စရာအဖြစ် ရိုက်ကူးထားတာဖြစ်ပြီး ပျော်ရွှင်ဖွယ်ရာများကို လူရွှင်တော်များစွာနဲ့ ဇာတ်လမ်းတွဲအဖြစ် ရိုက်ကူးတင်ဆက်မှာဖြစ်တယ်လို့ စီစဉ်တင်ဆက်မှုကို တာဝန်ယူထားသူတွေက ပြောကြပါတယ်။
ဇာတ်လမ်းတွဲတွေမှာ ပါဝင်သရုပ်ဆောင်ကြမယ့် သရုပ်ဆောင်တွေ၊ ဇာတ်ညွှန်းရေး ဆရာတွေက အသက် သုံးဆယ်မပြည့်သေးတဲ့ လူငယ်များဖြစ်ကြပြီး အဓိက လူငယ်တွေကိုနေရာပေး၊ ဦးစားပေးချင်တဲ့ အတွက်ကြောင့် အခုလို စီစဉ်တာလို့ လူရွှင်တော် ဇာဂနာက ဆိုပါတယ်။
“ဒါက မြန်မာရုပ်မြင်သံကြားနဲ့ ပထမဆုံး ပူးပေါင်းတင်ဆက်တဲ့ ဖျော်ဖြေရေး အစီအစဉ်လို့ ပြောလို့ရပေမယ့် တကယ့်တကယ် ပြောရမယ်ဆိုရင် ကျနော်တို့ကို မွေးထုတ်ပေးလိုက်တာဟာ မြန်မာ့ရုပ်မြင်သံကြားက ပါပဲ။ ကျနော်တို့က အငြိမ့်သမားဖြစ်တဲ့အတွက် အငြိမ့်ကို ဦးစားပေး တင်ဆက်ဖြစ်တာပါ။ ကျနော်တို့ မြန်မာ လူမျိုးတွေရဲ့ အမျိုးသားရေး လက္ခဏာဆိုတာ အငြိမ့်မှာပဲ ရှိပါတော့တယ်။ အဲဒီအငြိမ့်ကို မြန်မာ့ ရုပ်မြင်သံ ကြားကနေ တနိုင်ငံလုံးကို ပြသတဲ့အခါ အားလုံးသိပါလိမ့်မယ်။ အထူးသဖြင့် ဒီမှာ ကျနော်တို့ လူငယ်တွေ ကို နေရာပေးထား ပါတယ်။ လူငယ်တွေကို ခေါင်းပေါ်တင်ထားပါတယ်” လို့ သူက ပြောပါတယ်။
အထက်ပါ အစီအစဉ်တွေကို မြန်မာ့ရုပ်မြင်သံကြားကနေ ဇူလိုင်လအတွင်းမှာ တင်ဆက်သွားမယ်လို့ သိရပါတယ်။
ဧရာဝတီ
No comments:
Post a Comment