မြန်မာနိုင်ငံ စီးပွားရေး အခြေအနေအပေါ် သုံးသပ်ချက်များ ပါဝင်သည့် စာတမ်း(White paper ) တစောင်ပြုစု၍ နိုင်ငံတော် အဆင့် အထိ တင်ပြနိုင်ရန် စီစဉ်နေကြောင်း မြန်မာနိုင်ငံ စီးပွားရေး တက္ကသိုလ် ဘွဲ့ရများအသင်း ဥက္ကဋ္ဌ ဦးတင်ဝင်းအောင် က ပြောသည်။ ထိုစာတမ်းကို နိုင်ငံတော်အဆင့်ရှိ စီးပွားရေးပညာရှင်များ၊ ပြည်ပရောက် မြန်မာ စီးပွားရေးပညာရှင်များ နှင့် ပြည်တွင်း စီးပွားရေး ပညာရှင်များ၏ ဆွေးနွေးချက်၊ အကြံပြုချက်များကို စုစည်း၍ ပြုစုသွားမည်ဟုလည်း ဆိုသည်။
မြန်မာ့ နိုင်ငံရေး အသွင်ကူးပြောင်းဆဲ ကာလကြောင့် ပေါ်ပေါက်လာသည့် အခြေအနေ၊ ရွေးချယ်သွားနိုင်မည့် လမ်းကြောင်းတို့ကို ချပြကြမည့် ဆွေးနွေးပွဲတခု လာမည့် နိုဝင်ဘာ ၃၀ ရက်တွင် ပထမဆုံးအကြိမ်အဖြစ် ပြုလုပ်၍ ပညာရှင်များ၏ ဆွေနွေးချက်များရယူသွားမည် ဖြစ်ကြောင်း သိရသည်။
အဆိုပါ ဆွေးနွေးပွဲနှင့် အတူ လာမည့် ခြောက်လနှင့် တနှစ်အတွင်း ဆက်နွယ်သော ဆွေးနွေးပွဲများ ဆက်လက် ဆောင်ရွက်သွားမည်ဖြစ်၍ ထိုဆွေးနွေးပွဲများမှ ရလဒ်များ ပူးပေါင်း၍ ပြီးပြည့်စုံသော စာတမ်း(White paper) ကို ထုတ်ပြန်သွားမည်ဖြစ်သည်ဟု ဦးတင်ဝင်းအောင် က ပြောပြသည်။
“မြန်မာနိုင်ငံရဲ့ အခြေအနေအတွက် သုံးသပ်တင်ပြမယ့် White paper ဖြစ်ပါတယ်။ ပညာရှင်တွေရဲ့ တင်ပြချက်တွေ ဖြစ်ပါတယ်” ဟု လည်း ၎င်းက ဆိုသည်။
နိုဝင်ဘာလ ၃၀ရက် ဆွေးနွေးပွဲတွင် ပါမောက္ခ ဒေါက်တာ လှမြင့်၊ သမ္မတ၏ စီးပွားရေးအကြံပေး ဒေါက်တာ ဦးမြင့်၊ သမ္မတ၏ ပညာရေး အကြံပေး ဒေါက်တာ ရင်ရင်နွယ် နှင့် အမျိုးသား စီးပွားရေးနှင့် လူမှုရေး အကြံပေး ကောင်စီ မှ ဥက္ကဋ္ဌ ဦးတင်ထွဠ်ဦး စသော ပညာရှင်များက ဆွေးနွေး အကြံပြုသွားမည် ဖြစ်ကြောင်း သိရသည်။
“သူတို့တွေကို တနေကုန် တွေ့ရဖို့က မလွယ်ဘူး။ ဆွေးနွေးတဲ့ဆီကနေ တခုခု ရသွားဖို့ မျှော်လင့်တယ်”ဟု မြန်မာနိုင်ငံ အထည်ချုပ် လုပ်ငန်းရှင်များ အသင်း အတွင်းရေးမှုး ဒေါ်ခိုင်ခိုင်နွယ် က ပြောသည်။
လက်ရှိ မြန်မာနိုင်ငံအခြေအနေသည် အသွင်ကူးပြောင်းဆဲ ကာလဖြစ်၍ အခက်အခဲများစွာရှိပြီး ဖွံ့ဖြိုးတိုးတက်မှုရှိသကဲ့သို့ ရည်မှန်း ချက် မပြည့်မြောက်မှု များစွာကျန်ရှိနေသေးသည်ဟုလည်း ဆိုသည်။
ရန်ကုန် စီးပွားရေး တက္ကသိုလ် စီးပွားရေး ပညာဌာန ပါမောက္ခ ဒေါက်တာ နီလာမြင့်ထူးက“ဒီပွဲမှာ ထူးခြားတာက တက္ကသိုလ်တွေပါလာတာ၊ အရင်က သိပ်မပါခဲ့ရဘူး။ နိုင်ငံခြားမှာရောက်နေတဲ့ ပညာရှင်တွေရော မြန်မာနိုင်ငံက စီးပွားရေး ပညာရှင်တွေ ပါတယ်” ဟု ပြောသည် ။
ဆွေးနွေးပွဲကို ပြည်ထောင်စု မြန်မာနိုင်ငံ ကုန်သည်များနှင့် စက်မှုလက်မှု လုပ်ငန်းရှင်များ အသင်းချုပ်(UMFCCI)ရှိ မင်္ဂလာခန်းမ တွင် နံနက် ၉ နာရီမှ ညနေ ၅ နာရီအထိ ပြုလုပ်သွားမည်ဟု ဆိုသည်။
ထိုဆွေးနွေးပွဲ ဖြစ်မြောက်ရန် UMFCCI ၊ ရန်ကုန် စီးပွားရေး တက္ကသိုလ် နှင့် မြန်မာနိုင်ငံ စီးပွားရေး တက္ကသိုလ်များ အသင်းတို့မှ ပူးပေါင်း ဆောင်ရွက်ခြင်း ဖြစ်ကြောင်း သိရသည်။
ဧရာဝတီ
No comments:
Post a Comment