ရန်ကုန်တိုင်း ဒေသကြီးအတွင်း ပဋိပက္ခ ဖြေရှင်းနိုင်ရေး အတွက် ရဲအင်အား ၅၀၀ ခန့် ဖွဲ့စည်းထားရှိမည် ဖြစ်ကြောင်း ရန်ကုန် တိုင်း ဒေသကြီး တိုင်းဦးစီးဌာနမှ သိရသည်။ “ရန်ကုန်တိုင်း ဒေသကြီးမှာ လူစုလူဝေး ထိန်းဖို့ အကူအနေနဲ့ ထပ်ပြီးဖွဲ့လိုက်တာပါ။ ထိန်းသိမ်းရေးတပ်ခွဲ စတာတွေနဲ့ လုပ်ဆောင် နေပါတယ်၊ အနီးစပ်ဆုံး ထားတာပါ”ဟု ရန်ကုန်တိုင်း ဒေသကြီး တိုင်းဦးစီး ဌာနမှ ရဲမှူးက ပြောသည်။
ရန်ကုန်တိုင်း ဒေသကြီး မင်္ဂလာတောင်ညွှန့် မြို့နယ်တွင် ရဲတပ်ဖွဲ့ဝင်များ၏ လုပ်ငန်းတာဝန်များကို ပြည်သူ များ နားလည်စေရန်အတွက် မေ ၂၅ ရက်က မင်္ဂလာတောင်ညွှန့် ရဲစခန်းတွင် ပြုလုပ်သည့် ပြည်သူများသို့ ရှင်းလင်းပွဲ (Open Day)၌ ၎င်းက ထိုသို့ ပြောဆိုခြင်း ဖြစ်သည်။
ပဋိပက္ခ ဖြေရှင်းနိုင်ရေးအတွက် ဖွဲ့စည်းထားသော အဖွဲ့မှာ ပဋိပက္ခ ထိန်းသိမ်းရန်မဟုတ်ဘဲ ကျန်ရှိသည့် ရဲလုပ်ငန်း တာဝန်များကိုပါ လုပ်ဆောင်မည် ဖြစ်ပြီး သီးခြားတာဝန်တခုအနေဖြင့်သာဖွဲ့ထားခြင်း ဖြစ်ကြာင်း သိရသည်။
“ရဲ တာဝန်တွေရှိပါတယ်၊ ဥပမာ လှည့်ကင်းလဲ လုပ်ရမယ်၊ မူခင်းလဲစစ်ရမယ်၊ အကုန်လုပ်ရမှာပါ။ ဒီတာဝန် တခုတည်းကို သီးခြားယူမှာတော့ မဟုတ်ပါဘူး”ဟုလည်း ရန်ကုန်တိုင်း ဒေသကြီး တိုင်းဦးစီးဌာနမှ ရဲမှူး က ပြောဆိုသည်။
လက်ရှိတွင် အဆိုပါ ရဲအဖွဲ့များကို ဥရောပ သမဂ္ဂနိုင်ငံများ(EU) နှင့် ပေါင်းပြီး လူစုလူဝေး ထိန်းသိမ်းရန် အတွက် သင်တန်းများ ပေးလျက် ရှိကြောင်း၊ သင်တန်းသား ဦးရေ ၃၀၀၀ ခန့် ကို သင်တန်းပေးပြီး ဖြစ်ကြောင်း သိရသည်။
“သင်တန်းက ခုဆို အပတ်စဉ် ၅ ရောက်ပါပြီ၊ သင်တန်းက ၄ အထိ ဆင်းပြီးပါပြီ၊ မှုခင်းတွေ တအားများတဲ့ သန်လျင်တို့ လှိုင်သာယာတို့မှာလည်း သင်တန်းတွေ ဖွင့်မယ်။ သင်တန်းဆင်းပြီးတာနဲ့ သက်ဆိုင်ရာ ဌာနတွေမှာ ပြန်ပြီး တာဝန်ယူမှာပါ”ဟု အထက်ပါ တိုင်းဦးစီးဌာန ရဲမှူးက ပြောသည်။
လက်ရှိတွင် လုံခြုံရေး တာဝန်များနှင့် ပဋိပက္ခ ဖြေရှင်းရာတွင် အဆင့် ၃ ဆင့် ခွဲကာ တာဝန်ယူထားသည်ဟု သိရပြီး၊ ပထမ အဆင့်တွင် ဒိုင်းကာ မပါ နံပါတ်တုတ် ကိုင်ဆောင် တာဝန်ယူသည့် အဆင့်၊ အဆိုပါ အဆင့်မှ လူစုလူဝေး ပိုများလာပါက ဒုတိယ အဆင့် အဖြစ် ဒူးကာ၊ ခေါင်းကာ၊ ဒိုင်းကာ စသည့်ဖြင့် ဒုတိယ အဆင့် ဖြစ်ပြီး၊ နောက်ဆုံး အဆင့် သတ်မှတ်ချက်မှာ ဒူးကာ၊ ဒိုင်းကာ၊ ခေါင်းကာ စသည့် ပစ္စည်း ၅ မျိုးပါ အကာအကွယ် ဝတ်စုံပြည့်ဖြင့် ကာကွယ်သည့် အဆင့်သို့ အဆင့်ဆင့် တာဝန်ယူမည် ဖြစ်ကြောင်း သိရသည်။
“လူအုပ် ပမာဏနဲ့ ပြောရတာက ပထမ အဆင့် လူစုလူဝေးက ဘာလက်နက်မှ မပါရင် ကျနော်တို့က ပထမ အဆင့် ဘာ အကာအကွယ်မှ မပါတဲ့ ထိန်းသိမ်းမှုနဲ့ ထိန်းပါမယ်။ ဒီကနေတဆင့် လူစုလူဝေးများ လာတယ်၊ နောက်လက်နက်တွေ ပါရင် ဒုတိယ အဆင့်ကို သုံးပါမယ်၊ နောက်ဆုံး လူစုလူဝေးက လက်နက် အားကိုးလာရင် ဆူပူလာရင် နောက်ဆုံးအဆင့် သုံးမှာပါ၊ နောက်တခုက နိုင်ငံတကာ စံနှုန်းအတိုင်းပဲ ကျနော်တို့ ထိန်းသိမ်းမှာပါ။ လူစုလူဝေးပဲ ဘာမှအန္တရာယ် မရှိဘူး ဆိုရင် ကျနော် တို့က ပထမအဆင့်ပဲနဲ့ ထိန်းမှာပါ”ဟု တပ်ဖွဲ့ခွဲမှုး မြန်မာနိုင်ငံ ရဲတပ်ဖွဲ့ခွဲ အမှတ်(၈)မှ ဒုရဲအုပ် ကြည်ဇော်ထွေးက ဆိုသည်။
လက်ရှိတွင် မြန်မာနိုင်ငံ ရဲတပ်ဖွဲ့နှင့် EU ပူးပေါင်းကာ သင်တန်း ပေးခြင်း၊ အကာကွယ် ပစ္စည်းများ ထောက်ပံ့ခြင်း တို့ကို လုပ်ဆောင် ပေးလျက် ရှိကြောင်း၊ လှည့်ကင်း ဆောင်ရွက်ရာတွင် ယခင် ခြေလျင်ထက် စက်ဘီးဖြင့် လှည်ပတ်နိုင်ရေး အတွက် EU မှ ထောက်ပံ့ ပေးထားကြောင်း သိရသည်။
“စမ်းချောင်းနဲ့ မင်္ဂလာတောင်ညွှန့် စတဲ့ စခန်း တခုကို သူတို့က စက်ဘီး (၂၀) ထောက်ပံ့တယ်၊ စုစုပေါင်း လေ့ကျင့်တာနဲ့ ဆို သူတို့ဘက်က အစီး ၆၀ ထုတ်ပေး ထားပါတယ်၊ မြန်မာနိုင်ငံ ရဲတပ်ဖွဲ့ကလည်း ထပ်ပြီး မှာယူထားတာ ရှိပါတယ်။ ကျနော်တို့ဆီကို ဒိုင်းကာတွေလည်း အီးယူဘက်က အခု ၄၀၀ ထောက်ပံ့ ထားပါတယ်”ဟု ရန်ကုန်တိုင်း ဒေသကြီး တိုင်းဦးစီး ဌာနမှ ရဲမှူးက ဆက်ပြောသည်။
လက်ရှိဖြစ်ပေါ်ခဲ့သည့် ပဋိပက္ခများတွင် ရဲတပ်ဖွဲ့မှ ဖြေရှင်း ကိုင်တွယ်မှု အားနည်းလျက် ရှိကြောင်း ဝေဖန်မှုများ ရှိသလို ရဲ တပ် ဖွဲ့ စွမ်းဆောင်ရည်ပိုင်းကို ပြည်သူများက စိတ်ချ ယုံကြည်နိုင်ဖွယ် မရှိသေးကြောင်း သုံးသပ်မှုများလည်း ရှိသည်။
“ပြည်သူတွေ အတွက် လုပ်နေတယ်၊ သင်တန်းတွေ ပေးနေတယ် ဆိုပေမယ့် သူတို့ ပြောင်းလဲသလား မေးရင် ပြောရ ခက် သေးတယ်၊ အားကိုးထိုက်တဲ့ အနေအထားတော့ မရောက်သေးပါဘူး။ လူစုလူဝေး ဖြစ်ရင် ရဲက နောက်မှ ရောက်တယ်။ အပြစ်မဲ့ ပြည်သူတွေ ခံရတာတွေက များနေသေးတယ်။ အခုချိန်ထိ ကျနော်တို့ စိတ်ထဲမယုံနိုင်သေးဘူး၊ အခုလို နိုင်ငံတကာစံနဲ့အညီ လုပ်ဆောင်နေတာတော့ ကောင်းပါ တယ်”ဟု မင်္ဂလာတောင်ညွှန့် မြို့နယ်တွင် နေထိုင်သူ ဦးဝင်းဇော်လတ်က ပြောသည်။
ယခုအချိန်ထိ မြန်မာနိုင်ငံတွင် ရဲတပ်ဖွဲ့ဝင်တဦးလျှင် ပျမ်းမျှ လူ ၁၀၀၀ ခန့်ကို တာဝန်ယူ စောင့်ရှောက် နေရကြောင်း သိရသည်။ ယင်းအခြေအနေကို မြန်မာနိုင်ငံရဲတပ်ဖွဲ့ တိုင်းဒေသကြီးမှ တိုင်းဒေသ လွှတ်တော် တွင်တင်ပြထားပြီး ထိန်းသိမ်းမှုလုပ်ငန်းများတွင် ထိရောက်သည့်ထိန်းသိမ်းမှုလုပ်နိုင်ရန် အားနည်းနေ ကြောင်း ရန်ကုန်တိုင်း ဒေသကြီး နယ်စပ်ရေးရာနှင့် လုံခြုံရေးဝန်ကြီး ဒုဗိုလ်မှူးကြီး တင်ဝင်းက တိုင်းဒေ သကြီး လွှတ်တော်တွင် ပြောဆိုခဲ့သည်။
“လုံခြုံရေးပိုင်း အတွက် ကျနော်တို့ လူအင်အား စုဆောင်းမှုတွေ လုပ်နေပါတယ်၊ တဆက်တည်း အကောင်း ဆုံး လုပ်ဆောင်နိုင်ဖို့ကိုလည်း သင်တန်း ပေးပါတယ်။ လူအင်အားက လက်ရှိထိန်းနိုင်ထိန်းသင့်တဲ့ ပမာဏ ထက် လျော့နည်း နေသေးပေမယ့် ကြိုးစားလုပ်ဆောင် နေပါတယ်။ လုံခြုံရေးပိုင်းကို အကောင်းဆုံး လုပ်ဆောင် နေပါတယ်”ဟု ၎င်းက ပြောသည်။
ယင်းသို့ ရဲအင်အား မလုံလောက်ခြင်းသည် ရဲတပ်ဖွဲ့သို့ ဝင်ရောက်ရာတွင် အခြေခံ ခံစားခွင့်ရရှိမှု နည်းခြင်း၊ ပြည်သူများဘက်မှ ယုံကြည်မှု ရရှိရန် ဆောင်ရွက်မှု မရှိခြင်းတို့ကြောင့် ဖြစ်ကြောင်း ပြောဆိုမှုများလည်း ရှိသည်။
“ရဲတယောက် ထိခိုက်ပြီဆို ရလာတဲ့ဟာက မလုံလောက်ဘူးလေ၊ နောက်တခုက တချို့သော တပ်ဖွဲ့ဝင် တွေကြောင့် လူတွေက ရဲ ဆို အမြင်မကြည်ဘူး၊ ငိုစားရယ်စား အလုပ်ဆိုပြီး တော်ရုံ မလုပ်ချင်ကြဘူး၊ ရဲဝန်ထမ်း သားသမီးတောင် ရဲအလုပ်ကို မကြိုက်တာတွေ ရှိနေတယ်”ဟု လုံခြုံရေး တပ်ခွဲ တခုမှ ရဲအရာရှိ တဦးက ပြောဆိုသည်။
ဧရာဝတီ
No comments:
Post a Comment