တပ်မတော်သားလွှတ်တော်ကိုယ်စားလှယ်တစ်ဦး၏ ဆွေးနွေးချက်ထဲ ပါတီကြီးတစ်ခုအပေါ် ပုတ်ခတ်စွပ်စွဲမှုများပါလာ၍ မှတ်တမ်းမှပယ်ဖျက်ပေးရန် NLDလွှတ်တော်ကိုယ်စားလှယ်ဦးအောင်ကြည်ညွှန့်တောင်းဆို ယခင်ကတက်ကြွစွာဆွေးနွေးခဲ့ကြသည့် ပါတီကြီးတစ်ခုမှ ကိုယ်စားလှယ်များ ယခုထူးဆန်းစွာဖြင့် တိတ်ဆိတ်နေဟု တပ်ကိုယ်စားလှယ်ဝေဖန်ပြောဆို

တပ်မတော်သားလွှတ်တော်ကိုယ်စားလှယ်တစ်ဦး၏ ဆွေးနွေးချက်ထဲ ပါတီကြီးတစ်ခုအပေါ် ပုတ်ခတ်စွပ်စွဲမှုများပါလာ၍ မှတ်တမ်းမှပယ်ဖျက်ပေးရန် NLDလွှတ်တော်ကိုယ်စားလှယ်ဦးအောင်ကြည်ညွှန့်က လွှတ်တော်နာယက ဦးတီခွန်မြတ်ကို တောင်းဆိုလိုက်သည်။

ကြံ့ခိုင်ရေးအမတ်ဦးစိုင်းသန်းနိုင်တင်သွင်းထားသည့် ခြေဥပြင်ရေးဥပဒေမူကြမ်းအပေါ် ဗိုလ်မှူးကျော်စိုးဦးဆွေးနွေးစဉ် ဆွေးနွေးချက်ထဲ ပုတ်ခတ်သည့်စကားများပါလာ၍ ဦးအောင်ကြည်ညွှန့်က ထိုစကားရပ်များ ပယ်ဖျက်ပေးရန် တောင်းဆိုလိုက်ခြင်းဖြစ်သည်။

ဗိုလ်မှူးကျော်စိုးဦးက လွှတ်တော်ကိုယ်စားလှယ် ၅ဦး ဦးဆောင်တင်သွင်းထားသည့် ခြေဥပြင်ရေးဥပဒေမူကြမ်း ၅ရပ်သည် ယနေ့ခေတ်၊ယနေ့အချိန်အခါအရ သင့်တော်သည့် မူကြမ်းများဖြစ်ပြီး၊လွှတ်တော်တင်ကာ ဆွေးနွေးဆုံးဖြတ်သင့်ကြောင်း၊၄၅ဦးကော်မတီထဲ ထည့်သွင်းဆောင်ရွက်ခြင်းက မသင့်တော်ကြောင်း၊ပြီးခဲ့သည့် ပထမအကြိမ်ခြေဥပြင်ဆင်ချိန် ပါတီကြီးတစ်ခု(အမျိုးသားဒီမိုကရေစီအဖွဲ့ချုပ်ကို ဆိုလိုခြင်းဖြစ်သည်)မှ ကိုယ်စားလှယ်များ တက်ကြွစွာဆွေးနွေးခဲ့ကြသည့် အချက်များ ယခုတင်ထားသည့် မူကြမ်းထဲ ပါနေသော်လည်း ယခုအခါ ထူးဆန်းစွာဖြင့် တိတ်ဆိတ်နေကြောင်း၊ထိုစဉ်အချိန်က တိုင်းရင်းသားများကို မျှော်လင့်ချက်ပေးခဲ့သည့်အကြောင်း၊လက်ရှိတွင် ကိုယ်နှင့်မဆိုင်သကဲ့သို့ နေနေကြောင်း စသည်ဖြင့် ပြောဆိုကာ တစ်အုပ်လုံးမဟုတ်ဘဲ အချက်ချင်းစီအလိုက် ပြင်ဆင်ခဲ့ကြသည့် အမေရိကန်၊အိန္ဒိယ စသည့် နိုင်ငံများ၏ ဖွဲ့စည်းပုံပြင်ဆင်ရေးကို အတုယူလိုကြောင်း ထောက်ပြခဲ့သည်။

အမျိုးသားလွှတ်တော်ကိုယ်စားလှယ်ဦးအောင်ကြည်ညွှန့်က “အကြိမ်ကြိမ်ထကန့်ကွက်နေရသည့်အတွက် အင်မတန်စိတ်မကောင်းကြောင်း“ အစချီကာ “နိုင်ငံရေးပါတီကြီးအနေနဲ့ အရင်တုန်းကဘယ်လို အခုဘယ်လိုစတဲ့ ပါတီကြီးတစ်ရပ်ရဲ့ ဆောင်ရွက်ချက်တွေအပေါ်အများ အမြင်အထင် လွဲမှားစေနိုင်လောက်တဲ့ အသုံးအနှုန်းတွေ ဒီနေ့ ထည့်သွင်းဆွေးနွေးသွားတာတွေ့ရပါတယ်။ဆက်ဆိုင်ခြင်းမရှိတဲ့ ကိစ္စရပ်တွေဖြစ်သလို ပါတီကြီးတစ်ခုရဲ့ဆောင်ရွက်ချက်တွေ အပေါ်မှာ ပုတ်ခတ်စွပ်စွဲချက်တွေ ပါလာတဲ့စကားရပ်မျိုးတွေကို လွှတ်တော်မှတ်တမ်းထဲက ပယ်ဖျက်ပေးဖို့ တောင်းဆိုအပ်ပါတယ်“ဟု လွှတ်တော်ကို တင်သွင်းခဲ့သည်။

ယင်းအပေါ် တပ်မတော်သားလွှတ်တော်ကိုယ်စားလှယ်ဗိုလ်မှူးကျော်စိုးဦးက ၎င်းသည်

အစီရင်ခံစာ ၇၅ကို ကိုးကားပြီးပြောဆိုဆွေးနွေးခဲ့သည်ဟု ပြန်လှန်တုန့်ပြန်ခဲ့သည်။

ပယ်ဖျက်ပေးရန်တောင်းဆိုမှု၊ပြောဆိုဆွေးနွေးမှုများက ကိုးကားချက်သာ ဖြစ်ကြောင်း နှစ်ဖက်ပြောဆိုမှုအပေါ် လွှတ်တော်နာယက က လုံးကောက်ကိုစီစစ်ပြီးဆောင်ရွက်သွားမည်ဟု ပြောဆိုခဲ့ကြောင်းသိရသည်။

ကိုမင်း/Myanmar Harp