Tuesday, January 06, 2015

တစ်နိုင်ငံလုံး ပစ်ခတ်တိုက်ခိုက်မှုရပ်စဲရေးဆိုင်ရာ သဘောတူစာချုပ် မကြာခင်ချုပ်ဆိုနိုင်တော့မည်







ပြည်ထောင်စုမပြိုကွဲရေး၊ တိုင်းရင်းသားစည်းလုံးညီညွတ်မှု မပြိုကွဲရေးနှင့် အချုပ်အခြာအာဏာတည်တံ့ခိုင်မြဲရေးတို့ကို တိုင်းရင်းသားအားလုံး မျက်ခြည်မပြတ် ထိန်းသိမ်းကာကွယ်ရေး၊ ပြည်ထောင်စုတိုင်းရင်းသားအားလုံး ပြည်ထောင်စုကြီး အတွင်း၌ ဥမကွဲသိုက်မပျက်အတူတကွ ရာသက်ပန် ပူးပေါင်းနေထိုင်ရေး၊ လက်နက်ကိုင် ပဋိပက္ခချုပ်ငြိမ်းပြီး ရေရှည် တည်တံ့သည့် စစ်မှန်သောထာဝရငြိမ်းချမ်းရေးရရှိအောင် တိုင်းရင်းသားအားလုံး ပူးပေါင်းပါဝင်ဆောင်ရွက်ရေး၊ ခေတ်မီ ဖွံ့ဖြိုးတိုးတက်သော စည်းကမ်းပြည့်ဝ သည့် ဒီမိုကရေစီနိုင်ငံတော်သစ်ကို ပြည်သူ့စွမ်းအားဖြင့် ကြိုးပမ်း အကောင်အထည်
ဖော်ဆောင်ရွက်ရေး ဦးတည်ချက်များဖြင့် (၆၇)နှစ်မြောက် လွတ်လပ်ရေးနေ့ နိုင်ငံတော်အလံတင် အခမ်းအနားနှင့် ဗိုလ်ရှုခံအခမ်းအနားကို ဇန်နဝါရီ ၄ ရက် နံနက်ပိုင်းက နေပြည်တော်တွင် စည်ကားသိုက်မြိုက်စွာ ကျင်းပခဲ့ရာ ထိုအခမ်း
အနားသို့ တိုင်းရင်းသားလက်နက်ကိုင် အဖွဲ့အစည်းများဖြစ်ကြသည့် KNU၊ KNU/KNLA(PC)၊ DKBA၊ UWSA၊ NDAA၊ NMSP၊ ALP၊ SSPP/SSA၊ RCSS/SSA၊ NSCN(K)၊ ABSDF ၊ PNLO တို့မှ အဖွဲ့ ခေါင်းဆောင်များလည်း တက်ရောက်
ခဲ့ကြသည်။

ဗိုလ်ရှုခံအခမ်းအနားအပြီး ဇန်နဝါရီ ၅ ရက်နံနက်ပိုင်းတွင် နိုင်ငံတော် သမ္မတကြီးနှင့် တိုင်းရင်းသားလက်နက်ကိုင်အဖွဲ့ ခေါင်းဆောင်များ မြန်မာအပြည်ပြည်ဆိုင်ရာကွန်ဗင်းရှင်း ဗဟိုဌာန(၂)တွင် တွေ့ဆုံခဲ့ကြရာ တိုင်းရင်းသား လက်နက်ကိုင် အဖွဲ့ ခေါင်းဆောင်အချို့နှင့် တွေ့ဆုံမေးမြန်း နိုင်ခဲ့သည်များကို ပြန်လည်ရေးသားတင်ပြလိုက်ပါသည်။
-----------------------------------------------------------------------------------
ဒေါ်စောမြရာဇာလင်း
ဗဟိုအလုပ်အမှုဆောင်ကော်မတီဝင်
ရခိုင်ပြည်လွတ်မြောက်ရေးပါတီ
တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးဆိုင်ရာ သဘောတူစာချုပ်ဟာ ခိုင်မာတဲ့ သဘောတူဆုံးဖြတ်ချက် တစ်ခုခုရမှသာ ကျွန်မတို့တိုင်းပြည်ရဲ့ အပြောင်းအလဲဟာ ခိုင်မာမှုရှိလာမယ်ဆိုတဲ့ အပေါ်မှာတော့ သဘောတူစာချုပ်ကို တိုင်းရင်းသား လက်နက်ကိုင်အဖွဲ့အစည်းများ အားလုံးနဲ့အစိုးရက နှစ်ဖက်သဘောတူညီပြီး လက်မှတ်ထိုးဖို့ လိုအပ်ပါတယ်။ အဲဒါကြောင့် ကျွန်မတို့တိုင်းပြည်ရဲ့ အနာဂတ်အတွက် ဒီစာချုပ်ဟာ အင်မတန်အရေးကြီးတယ် ဆိုတဲ့အကြောင်း ပြောချင်ပါတယ်။ ဒီနေ့ တွေ့ဆုံပွဲမှာ နိုင်ငံတော်သမ္မတကြီး ပြောသွားတဲ့အချက် (၄) ချက်ကို သတိထား မိပါတယ်။ အဲဒါတွေက ပြည်တွင်းငြိမ်းချမ်းရေး ရရှိရေး၊ ပစ်ခတ်တိုက်ခိုက်မှုရပ်စဲရေး၊ နိုင်ငံရေး သဘောတူညီချက်များကို ခိုင်မာစေရေးနဲ့ ၂ဝ၁၅ ရွေးကောက်ပွဲ ပွင့်လင်းမြင်သာမှု ရှိရေးအတွက် အားလုံးဝိုင်းဝန်းကူညီဖို့ လိုတယ်ဆိုတဲ့ အချက်တွေအပေါ် အခြေခံပြီး သမ္မတကြီးက မိန့်ကြားသွားတာ ဖြစ်ပါတယ်။
ကျွန်မတို့တိုင်းရင်းသားတွေ အားလုံးမျှော်မှန်းတာကလည်း နိုင်ငံရေးအပြောင်းအလဲ တစ်ခုကို လုပ်မယ်ဆိုရင် ဒီပစ်ခတ်တိုက်ခိုက်မှုကိုမရပ်ဘဲ ကျွန်မတို့လိုချင်တဲ့ အပြောင်းအလဲကို ရဖို့ဆိုတာ မလွယ်ကူပါဘူး။ အဲဒါကြောင့် ကျွန်မတို့အားလုံး ပစ်ခတ်တိုက်ခိုက်မှုကို ရပ်ကိုရပ်ဖို့ လိုအပ်တယ်ဆိုတဲ့ သဘောတူညီချက်အပေါ်မှာ အားလုံးနားလည် သဘောပေါက်ကြပြီး နိုင်ငံရေးပြဿနာကို နိုင်ငံရေးနည်းနဲ့ပဲ ဖြေရှင်းရမယ်ဆိုတဲ့ သဘောတူညီချက်ကတော့ အားလုံးမှာ အမြင်ရှိကြပါတယ်။ ကျွန်မတို့တိုင်း ရင်းသားအားလုံးမျှော်မှန်းနေတဲ့ ဖက်ဒရယ်ပြည်ထောင်စုကြီး ပေါ်ပေါက်လာဖို့ရာအတွက် ဒီစာချုပ်ဟာအင်မတန် အရေးကြီးတဲ့စာချုပ်အဖြစ် မှတ်ယူပါတယ်။ ဒီသဘောတူ စာချုပ်ကြီး အမြန်ဆုံး အကောင်အထည်ဖော်ပြီး လက်မှတ် ထိုးနိုင်ဖို့အတွက် ကျွန်မတို့အားသွန်ခွန်စိုက် ကြိုးစားနေကြတာဖြစ်ပါတယ်။ ပြည်ထောင်စုနေ့မှာ လက်မှတ်ရေးထိုးမယ် ဆိုတာနဲ့ ပတ်သက်ပြီး သမ္မတကြီးရဲ့ မိန့်ခွန်းမှာ ကြားလိုက်ရတာက ပြည်ထောင်စုဆိုတာ ကျွန်မတို့ တိုင်းရင်းသားအားလုံးရဲ့ စည်းလုံးညီညွတ်မှုကိုပြတဲ့ သင်္ကေတ ဖြစ်တယ်၊
ရက်ထူးရက်မြတ်လည်းဖြစ်တယ်ပေါ့။ အခုလည်း ပိုပြီးခိုင်မာတဲ့ ပြည်ထောင်စုကြီးကို တိုင်းရင်းသားအားလုံးနဲ့ ထပ်ဆင့်ပြီးခိုင်မာအောင်လုပ်တဲ့သဘောနဲ့ ပြည်ထောင်စုနေ့မှာ ဒီစာချုပ်ကို လက်မှတ်ရေးထိုးမယ်ဆိုတဲ့ သမ္မတကြီးရဲ့ အာသီသကို ဖွင့်ပြောသွားတာလည်းရှိပါတယ်။
ငြိမ်းချမ်းရေးဆိုတာ တစ်ဖက်ကပဲ လိုချင်လို့မရပါဘူး။ အားလုံးလိုချင်မှရပါမယ်။ အဓိကကတော့ မိမိကိုယ်တိုင်က ငြိမ်းချမ်းရေးမှာ ပါဝင်ပတ်သက်ဖို့လိုတယ်။ ကိုယ်ကိုယ်တိုင်ကလည်း ငြိမ်းချမ်းရေးရဖို့လိုတဲ့အခြေခံအပေါ်မှာ အားလုံးဝိုင်းဝန်းကြိုးပမ်းဖို့လိုပါတယ်။ ပြည်သူလူထုတစ်ရပ်လုံးရဲ့ ထောက်ခံအားပေးမှုဟာ အင်မတန်အရေးကြီးတယ်ဆိုတာ ပြောချင်ပါတယ်။
------------------------------------------------------------------------------------
ဦးခွန်ဥက္ကာ
နာယက
ပအိုဝ်းအမျိုးသားလွတ်မြောက်ရေးအဖွဲ့ချုပ်
ငြိမ်းချမ်းရေးလုပ်ငန်းစဉ်ရဲ့ အစဖြစ်တဲ့ တစ်နိုင်ငံလုံး အပစ်အခတ်ရပ်စဲရေး သဘောတူစာချုပ်ချုပ်နိုင်ဖို့ တွေ့ဆုံညှိနှိုင်း တာဟာ ထူးခြားချက်တစ်ခုပါ။ လက်ရှိပြည်ထောင်စုအစိုးရက ဦးဆောင်ပြီးခေါ်ယူတဲ့ ငြိမ်းချမ်းရေး ဆွေးနွေးပွဲတွေကနေ ပြည်နယ်အဆင့် ပြည်ထောင်စုအဆင့်အဖွဲ့ ၁၆ ဖွဲ့ ပါဝင်လက်မှတ်ရေးထိုးတာရှိတယ်။ သို့သော်လည်း တစ်နိုင်ငံလုံး ယေဘုယျအားဖြင့် လွှမ်းခြုံတဲ့ အပစ်အခတ်ရပ်စဲရေးရရှိအောင် ကျွန်တော်တို့ ညှိနှိုင်းရေးတွေ လုပ်ကြပါတယ်။ အဲလိုလုပ်တဲ့နေရာမှာ ပြည်ထောင်စုအစိုးရက ဆွေးနွေးတဲ့အဖွဲ့ဖွဲ့သလို ကျွန်တော်တို့ တိုင်းရင်းသားလက်နက်ကိုင် ၁၆ ဖွဲ့ကလည်း ဆွေးနွေးရေးအဖွဲ့ကို ဖွဲ့ပါတယ်။ ဒါကို ကျွန်တော်တို့က NCCT လို့ ခေါ်ပါတယ်။ NCCT နဲ့ UPWC ဆွေးနွေးမှုဟာလည်း သဘောတူညီချက်တွေရဖို့ လက်တစ်ကမ်းပဲ လိုတော့တယ်လို့ ပြောလို့ရပါတယ်။
-----------------------------------------------------------------------------------
ပဒိုစောကွယ်ထူးဝင်း
အထွေထွေအတွင်ရေးမှူး
ကရင်အမျိုးသားအစည်းအရုံး(KNU)
ဒီနှစ် ဖေဖော်ဝါရီ ၁၂ ရက်နေ့မှာ လက်မှတ်ရေးထိုးဖို့ ဖြစ်စေချင်တဲ့ ဆန္ဒရှိပါတယ်။ ကျွန်တော်တို့ မြန်မာနိုင်ငံရဲ့သမိုင်းမှာ ပြည်ထောင်စုနေ့ဆိုတာ ဖေဖော်ဝါရီလ ၁၂ ရက်နေ့မှာ စတင်လက်မှတ်ရေးထိုးပြီး ပြည်ထောင်စု သမ္မတမြန်မာနိုင်ငံဆိုတာ ပေါ်ပေါက်လာတာပါ။ ကျွန်တော်တို့ ညှိနှိုင်းရေးအဖွဲ့ နှစ်ဖွဲ့စလုံးက တစ်နိုင်ငံလုံး အပစ်အခတ်ရပ်စဲရေး သဘောတူညီချက် ကို အမြန်ဆုံးရရှိနိုင်ဖို့ ကြိုးစားဆောင်ရွက်နေတာဖြစ်တယ်။ ကျွန်တော်တို့ ဆွေးနွေးပွဲမှာ သဘောတူညီချက် အတော်တော် များများ ရရှိခဲ့တယ်။ အချက်အလက် အနည်းငယ်ပဲကျန်ရှိပြီး ဖေဖော်ဝါရီ ၁၂ ရက်မတိုင်မီ ကာလအတွင်းမှာ ညှိနှိုင်း လုပ်ဆောင်နိုင်မယ်ဆိုရင် အကုန်လုံးသဘော တူညီနိုင်တဲ့အတွက် ကျွန်တော် ပြောတာ ဖြစ်ပါတယ်။ ဒါကတော့ ဆန္ဒရှိ တာပါ။ နောက်တစ်ခုကတော့ နှစ်ဖွဲ့ရဲ့ ဆွေးနွေးမှုအပေါ်မှာလည်း မူတည်ပါတယ်။
သဘောထားအပေါ်မှာလည်း မူတည်ပါတယ်။
ပြည်ထောင်စုနေ့ဆိုတာက ကျွန်တော်တို့ နိုင်ငံရဲ့ သမိုင်းဝင်နေ့ရက် ဖြစ်တယ်။ ကျွန်တော်တို့ ပြည်ထောင်စု စတင်ပေါ်ပေါက်လာတာကလည်း ဖေဖော်ဝါရီ ၁၂ ရက် ပင်လုံသဘောတူညီချက်ကနေ ပေါ်ပေါက်လာတဲ့အတွက်ကြောင့် ဖြစ်ပါတယ်။ အဲဒီနေ့မှာ တစ်နိုင်ငံလုံး အပစ်အခတ်ရပ်စဲရေး လက်မှတ်ရေးထိုးနိုင်ခဲ့မယ်ဆိုရင် ဒုတိယသမိုင်းဝင် နေ့ရက်တစ်ရက်ဖြစ်မယ်လို့ ခံယူတဲ့အတွက်၊ ဆန္ဒရှိတဲ့အတွက် လက်မှတ်ရေးထိုးလိုတာ ဖြစ်ပါတယ်။
-----------------------------------------------------------------------------------
ပြည်ထောင်စုဝန်ကြီးဦးအောင်မင်း
သမ္မတရုံးဝန်ကြီးဌာန
ကျွန်တော်တို့ နောက်ဆုံး ဒီဇင်ဘာ ၂၂ ရက် ၂၃ ရက်မှာ ရန်ကုန်မှာ ငြိမ်းချမ်းရေးဖော်ဆောင်ရေးလုပ်ငန်း ကော်မတီနဲ့ NCCT အဖွဲ့တွေ တွေ့ဆုံခဲ့ပါတယ်။ စာချုပ်ထဲမှာပါတဲ့ အချက် ၁ဝ၃ ချက်ထဲက ဆွေးနွေးရန် ကျန် ၈ ချက်ကို ဆွေးနွေးခဲ့ကြပါတယ်။ ဆွေးနွေးတဲ့နေရာမှာလည်း အားလုံးကို ဆွေးနွေးနိုင်တယ်လို့ ပြောလို့ရပါတယ်။ ဒီဆွေးနွေးချက်တွေကို သက်ဆိုင်ရာ ခေါင်းဆောင်တွေကို ပြန်ပြီးတင်ပြရမှာ ဖြစ်ပါတယ်။ ကျွန်တော်တို့ကတော့ နိုင်ငံတော်သမ္မတကြီးကို တင်ပြပြီးဖြစ်ပါတယ်။ သူတို့ ဘက်ကလည်းတင်ပြပြီး သဘောတူညီတယ်ဆိုရင် ဒီစာချုပ် တစ်စောင်လုံးကို သဘောတူသွားပြီလို့ ပြောလို့ရပါတယ်။
ဒီနေရာမှာလည်း တိုင်းရင်းသားတွေဘက်က မြန်မြန်သွားချင်တဲ့သူရှိသလို ဖြည်းဖြည်းသွားချင်တဲ့သူတွေလည်း ရှိပါတယ်။ မြန်မြန်သွားချင်တဲ့ တိုင်းရင်းသားတွေက ဒီဇင်ဘာ ၂၂ ရက် ၂၃ ရက်ဆွေးနွေးပွဲမှာ ပြည်ထောင်စုနေ့မှာ လက်မှတ်ရေးထိုးကြရအောင်လို့ ပြောခဲ့တာလည်း ရှိပါတယ်။ ပြည်ထောင်စုနေ့မှာ လက်မှတ်ရေးထိုးနိုင်ဖို့ ကြားထဲမှာ ကြိုတင်ပြင်ဆင်မှုတွေ အများကြီးလိုပါတယ်။ ဒါကြောင့် နိုင်ငံတော် သမ္မတကြီးနဲ့လည်း တွေ့သင့်ပါတယ်။ ဒါကြောင့်မို့ နှစ်ပေါင်းအတော်ကြာမှ ပြန်လည်ကျင်းပနိုင်ခဲ့တဲ့ ဗိုလ်ရှုခံအခမ်းအနားကို တိုင်းရင်းသားခေါင်းဆောင် တွေ ဖိတ်လိုက်ပါ တယ်။ ကျွန်တော်တို့နဲ့ ဆွေးနွေးနေတဲ့ တိုင်းရင်းသား လက်နက် ကိုင် ၁၆ ဖွဲ့ရှိတဲ့အထဲက ၁၆ ဖွဲ့ စလုံးကို ဖိတ်ပါတယ်။ အဲဒီထဲမှာ အကြောင်းအမျိုးမျိုးကြောင့် ၄ ဖွဲ့ မတက်နိုင်ပါဘူး။
မတက်နိုင်တဲ့အကြောင်းကိုလည်း ကျွန်တော်တို့ဆီ စာတွေလာပါတယ်။ သူတို့ ပြင်ဆင်ချိန်မရလို့ပါ၊ ဝေးနေလို့ပါ၊ ဥက္ကဋ္ဌတွေ ခရီးထွက်နေလို့ပါဆိုတဲ့ ပြန်စာတွေလာပါတယ်။ အဲဒီအဖွဲ့တွေက KIA ရယ် TNLA ရယ် KNPP ရယ် CNF ရယ်ဖြစ်ပါတယ်။ ကျန်တဲ့အဖွဲ့ ၁၂ ဖွဲ့စလုံးက လာရောက်ပါတယ်။
ဒီကိုလာရောက်ပြီး လူကြီးတွေတွေ့ပြီး ဆွေးနွေးမှ ယုံကြည်မှု ပိုမိုတည်ဆောက် နိုင် မှာ ဖြစ်ပါတယ်။ ယခုဆွေးနွေးပွဲမှာလည်း တိုင်းရင်းသားခေါင်းဆောင်များ က သူတို့လိုချင်တဲ့အချက်တွေ သမ္မတကြီးကို တင်ပြပါတယ်။
သမ္မတကြီးကလည်း သူပြောနိုင်တာမှန်သမျှ ပြောပြခဲ့ပါတယ်။ သူတို့ ကိုယ်တိုင်လည်း သမ္မတကြီးကိုယ်တိုင် ပြောတာကြား သွားပြီ။ သမ္မတကြီးက လည်း အချို့ကိစ္စတွေ တာဝန်ယူထားတာ ဖြစ်တဲ့အတွက် ပိုပြီးတော့ ယုံကြည်မှု တည်ဆောက်နိုင်တယ်လို့ ပြောလို့ရပါတယ်။ ငြိမ်းချမ်းရေးဖြစ်စဉ်ကြီးဟာ ရှေ့ကိုတဖြည်းဖြည်းတိုးနေတယ်လို့ ပြောလို့ရပါ တယ်။ ဘယ်နေ့ လက်မှတ်ထိုးနိုင်တယ်ဆိုတာ တိတိကျကျ မပြောနိုင်သော်လည်း မကြာခင်မှာ ထိုးနိုင်ဖို့ကို နှစ်ဖက်ပြင်ဆင်နေတယ်။ ကြိုးစားနေပါတယ်။

Ref : MOI Webportal
Yangon Media Group

No comments:

Post a Comment

My Blog List