ဒီမိုကရေစီလမ်းကြောင်းကို လျှောက်လှမ်းရာမှာ စည်းကမ်းပြည့်ဝတဲ့ ဒီမိုကရေစီဖြစ်ဖို့လည်း အရေးကြီးသလို လူကြားကောင်းရုံ ပရမ်းပတာ ဒီမိုကရေစီဖြစ်လို့ မရဘူးလို့ တပ်မတော်သား ပြည်သူ့လွှတ်တော်ကိုယ်စားလှယ် ဒုတိယဗိုလ်မှုးကြီး ကျော်မိုးအောင်က ပြောပါတယ်။
မနေ့က နေပြည်တော်မှာ ကျင်းပတဲ့ အပြည်ပြည်ဆိုင်ရာ ဒီမိုကရေစီနေ့ အခမ်းအနားမှာ တပ်မတော်သား လွှတ်တော် ကိုယ်စားလှယ်များ အစုအဖွဲ့ကိုယ်စား စာတမ်းဖတ်ကြားရာမှာ ပြောသွားတာပါ။
“ဒီမိုကရေစီဆိုတဲ့ အသုံးအနှုန်းကို ခံတွင်းတွေ့နေရုံမဟုတ်ဘဲ ဒီမိုကရေစီယဉ်ကျေးမှုတွေ၊ နိုင်ငံရေးအသိတွေ မြင့်မားနေကြဖို့လည်း လိုပါတယ်။ ဒီမိုကရေစီဆိုတာ ပါတီ နိုင်ငံရေး မဟုတ်ပါဘူး။ အားလုံးနဲ့ သက်ဆိုင်တဲ့ နိုင်ငံရေး ဖြစ်ပါတယ်။ ဒီမိုကရေစီလမ်းကြောင်းကို လျှောက်လှမ်းရာမှာ စည်းကမ်းပြည့်ဝတဲ့ ဒီမိုကရေစီဖြစ်ဖို့လည်း အရေးကြီးပါတယ်။ လူကြားကောင်းရုံ ပရမ်းပတာ ဒီမိုကရေစီဖြစ်လို့ မရပါဘူး။”လို့ ဒုတိယဗိုလ်မှုးကြီး ကျော်မိုးအောင်က ပြောပါတယ်။
ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ ဗဟိုကော်မတီဝင် ဒေါ်ယဉ်မင်းမြင့်ဆွေကတော့ မြန်မာနိုင်ငံရဲ့ ဒီမိုကရေစီဟာ အရမ်းနုသေးတဲ့အတွက် လိုအပ်ချက် အများကြီးရှိနေသေးတယ်လို့ ပြောပါတယ်။
“ဒီမိုကရေစီကတော့ အခုမှ သက်တမ်းက အရမ်းနုပါသေးတယ်။ ပထမ ရှေ့ ပြည်ခိုင်ဖြိုးအစိုးရလက်ထက် ၅ နှစ်သက် တမ်း၊ အခု ၃ နှစ်ကျော်သက်တမ်း ဆိုတော့ ၈ နှစ်ကျော်သက်တမ်းဆိုတော့ အရမ်းနုသေးတယ်။ အရမ်းနုသေးတယ်ဆို တော့ လိုအပ်ချက်တွေကတော့ အများကြီးရှိနေသေးတာပဲ။ တခုရှိတာက ဒီမိုကရေစီလို့ ပြောရင် စည်းလွတ်ဘောင်လွတ် ဒီမိုကရေစီမျိုးနဲ့ စည်းကမ်းပြည့်ဝသော ဒီမိုကရေစီဆိုတာ ပြည်ခိုင်ဖြိုးလက်ထက်မှာ စည်းကမ်းပြည့်ဝသော ဒီမိုကရေစီဆိုတဲ့ဟာ အခြေခံဥပဒေမှာပါ ထည့်သွင်းပြဋ္ဌာန်းပြီးတော့ လိုက်တာကျင့်သုံးခဲ့တယ်။ စည်းနဲ့ ဘောင်နဲ့ပေါ့နော်။ ဒီမိုကရေစီဆိုရင် လူ့အခွင့်အရေးကို ရှေ့တန်းတင်ကြတယ်။ အဲတော့ ဒီအစိုးရလက်ထက်မှာ အထိုက်အလျောက် ကတော့ ဒီမိုကရေစီစံချိန်စံညွန်းကနေ အနည်းငယ်သွေဖီပြီးတော့ နည်းနည်းအခက်အခဲလေးတွေ ရှိနေတဲ့ ကိစ္စမျိုးတွေ ဥပမာ ငြိမ်းစုစီဥပဒေပြင်ဆင်တာမျိုးတွေ၊ ၆၆(ဃ) ကိုလိုသလို အသုံးပြုတဲ့ ကိစ္စမျိုးတွေ ဒီလိုမျိုးဟာလေးတွေ ရှိနေတဲ့အတွက်တော့ အနည်းငယ်တော့ ဒီမိုကရေစီနဲ့ နည်းနည်းလေးတော့ လိုအပ်ချက်တွေ ရှိနေသေးတယ်လို့ မြင်ပါတယ်။”
အပြည်ပြည်ဆိုင်ရာ ဒီမိုကရေစီနေ့ အခမ်းအနားကို စက်တင်ဘာ ၁၆ ရက်မနက်က နေပြည်တော်ရှိ ပြည်ထောင်စုလွှတ်တော် သဘင်ဆောင်မှာ ကျင်းပတာ ဖြစ်ပြီး ဒါနဲ့ဆိုရင် ၉ ကြိမ်မြောက်ပြီ ဖြစ်ပါတယ်။
DVB
No comments:
Post a Comment