Wednesday, April 22, 2015

ဦးဝင်းတင်ကို ဒီမိုကရေစီရဲဘော် အဖြစ် ဒေါ်အောင်ဆန်းစုကြည် ဂုဏ်ပြု


လူတိုင်းအတွက် စံနမူနာယူထိုက်သူ ဟံသာဝတီ ဦးဝင်းတင်ကို ဒီမိုကရေစီ ရဲဘော်အဖြစ် ဂုဏ်ပြု လိုကြောင်း ဒေါ်အောင်ဆန်းစုကြည်က ပြောကြား လိုက်ပါတယ်။ ရန်ကုန်မြို့ တော်ဝင်နှင်းဆီခန်းမမှာ ဒီကနေ့ကျင်းပတဲ့ ဟံသာဝတီ ဦးဝင်းတင် ကွယ်လွန်ခြင်း၁ နှစ်ပြည့် အောက်မေ့ဖွယ်အခမ်းအနား မှာ ဒေါ်အောင်ဆန်းစုကြည်က အခုလို ပြောကြားခဲ့တာပါ။
"လူတိုင်းဟာ သတင်းစာဆရာကြီး ဖြစ်နိုင်မှာ မဟုတ် ပါဘူး၊ လူတိုင်းဟာလည်း ဆရာ့လို စာရေး ဆရာကြီး ဖြစ်နိုင်မှာမဟုတ်ပါဘူး၊ လူတိုင်းဟာလည်း ဆရာ့လောက် အနစ်နာခံနိုင်မှာ မဟုတ်ပါဘူး၊ သို့သော်ငြားလည်း ဆရာ့ရဲ့ စံနမူနာတွေကို ကြည့်ပြီးတော့ ကိုယ့်ကိုကိုယ် အကောင်းဆုံး ဒီမိုကရေစီ ရဲဘော်တစ်ယောက်ဖြစ်အောင်လို့ ကြိုးစားနိုင်တယ်လို့ ကျမထင်ပါတယ်၊ ဆရာကြီး ဦးဝင်းတင်ကို ဒီမိုကရေစီ ရဲဘော်တစ်ယောက်အနေနဲ့ ဂုဏ်ပြုချင်ပါတယ်၊ ခေါင်းဆောင်တစ်ယောက် အနေနဲ့ မဟုတ်ဘူး၊ ရဲဘော်တစ်ယောက်အနေနဲ့၊ ခေါင်းဆောင်နဲ့ ရဲဘော်ဆိုတာ မတူဘူး၊ ခေါင်းဆောင်ဆိုတာ အမိန့်ပေးမယ်၊ ထိပ်ကနေပြီးတော့လုပ်မယ်၊ ဦးဆောင်မယ်၊ ရဲဘော်ဆိုတာ နိစ္စဓူဝအလုပ်တွေကို အောက်ခြေ သိမ်းလုပ်နိုင်တဲ့ အရည်အချင်းရှိတဲ့ ပုဂ္ဂိုလ်တွေကို ကျမက ရဲဘော်တွေလို့ သတ်မှတ်ပါတယ်"

ဒါ့အပြင် ဦးဝင်းတင်ဟာ ဒီမိုကရေစီယဉ်ကျေးမှုဖြစ်တဲ့ သဘောထား မတိုက်ဆိုင်မှုတွေရှိတဲ့အခါ ညှိနှိုင်း ယူတတ် သူဖြစ်ကြောင်း၊ အဲဒီ့လို ဒီမိုကရေစီယဉ်ကျေးမှုကို အမျိုးသားဒီမိုကရေစီအဖွဲ့ချုပ်တင်မက တခြားနိုင်ငံရေး ပါတီတွေ၊ ပြည်သူတွေကလည်း လက်ခံကျင့်သုံးသင့်ကြောင်း ဒေါ်အောင်ဆန်းစုကြည် က ပြောခဲ့ပါတယ်။

ဟံသာဝတီ ဦးဝင်တင်ကို ၁၉၃၀ ပြည့်နှစ်က ပဲခူးတိုင်း ကြို့ပင်ကောက်မြို့ မှာ မွေးဖွားခဲ့ပါတယ်။ ဟံသာ ၀တီ သတင်းစာဆရာ စာရေးဆရာအဖြစ် နှစ်ပေါင်းများစွာ ရပ်တည်ခဲ့ပြီး ၁၉၈၈ခုနှစ် ဒီမိုကရေစီ အရေးတော်ပုံအတွင်း ဒေါ်အောင်ဆန်းစုကြည်၊ ဗိုလ်ချုပ်ကြီးဟောင်း သူရဦးတင်ဦးတို့နဲ့အတူ NLDအမျိုးသား ဒီမိုကရေစီအဖွဲ့ချုပ်ကို တည်ထောင်ခဲ့သူလည်း ဖြစ်ပါတယ်။

၁၉၈၉ခုနှစ်မှာ စစ်အစိုးရက ဦးဝင်းတင်ကို ဖမ်းဆီးပြီး၊ နှစ်ပေါင်း ၂၀နီးပါးအကြာ ၂၀၀၈ခုနှစ်မှာ ပြန်လည် လွတ်မြောက်လာခဲ့ပါတယ်။

သူဟာ ၂၀၀၈ဖွဲ့စည်းပုံ အခြေခံဥပဒေကို ဆန့်ကျင်သူဖြစ်ပြီး၊ အခြေခံဥပဒေ ပြုပြင်တာကို လက်မခံဘဲ အသစ်ပြန်လည်ရေးဆွဲရေးကိုသာ တစိုက်မတ်မတ် ပြောခဲ့သူဖြစ်ပါတယ်။

ဒီနေ့ကျင်းပတဲ့ ဦးဝင်းတင် အောက်မေ့ဖွယ်အခမ်းအနားကို NLD ပါတီဝင်တွေ၊ ၈၈ မျိုးဆက် ငြိမ်း ချမ်းရေးနဲ့ ပွင့်လင်းလူ့အဖွဲ့အစည်း၊ နိုင်ငံရေး အကျဉ်းသားဟောင်းတွေ၊ သတင်းစာဆရာတွေ၊ စာရေးဆရာတွေ အပါ အ၀င် လူတစ်ထောင်နီးပါး တက်ရောက်ခဲ့ပါတယ်။

RFA


No comments:

Post a Comment

My Blog List