Monday, October 06, 2014

ဆွေးနွေးပွဲများ၊ တိုက်ပွဲများနဲ့ မသေချာသေးတဲ့ ငြိမ်းချမ်းရေး



ပြီးခဲ့တဲ့ စက်တင်ဘာလအတွင်းက ရန်ကုန်မြို့မှာ ငါးရက်ကြာပြုလုပ်ခဲ့တဲ့ နိုင်ငံလုံးဆိုင်ရာအပစ်ရပ်စဲရေးညှိနှိုင်းမှု ဆွေးနွေးပွဲမှာ တိုးတက်တဲ့ရလဒ် မထွက်ပေါ်ခဲ့ပါဘူး။ အဲဒီဆွေးနွေးပွဲ အပြီးမှာတော့ တပ်မတော်နဲ့ တိုင်းရင်းသား လက်နက်ကိုင် အဖွဲ့တွေဖြစ်တဲ့ ကရင်အကျိုးပြု ဒီမိုကရေစီတပ်မတော် (DKBA)၊ တအာင်းအမျိုးသား လွတ်မြောက်ရေး တပ်မတော် (TNLA)၊ ရှမ်းပြည်တိုးတက်ရေးပါတီ (SSPP)၊ ကချင်လွတ်မြောက်ရေးတပ်မတော် (KIA) တို့အကြား တိုက်ပွဲများ ဖြစ်ပွားခဲ့ပါတယ်။ လက်ရှိအချိန်အထိလည်း စစ်ရေးတင်းမာမှုများ ရှိနေဆဲ အခြေအနေ ဖြစ်ပါတယ်။
အစိုးရနဲ့ တိုင်းရင်းသားလက်နက်ကိုင် အဖွဲ့တွေအကြား တစ်နိုင်ငံလုံး အပစ်အခတ်ရပ်စဲရေး ဆောင်ရွက်ဖို့ ဆွေးနွေး ညှိနှိုင်းနေတာ တစ်နှစ်နီးပါး ကြာမြင့်ခဲ့ပါပြီ။ အစိုးရဘက်က အစိုးရအဖွဲ့၊ လွှတ်တော်နဲ့ တပ်မတော်ကိုယ်စားလှယ်များ ပါဝင်တဲ့ ပြည်ထောင်စုငြိမ်းချမ်းရေးဖော်ဆောင်ရေး လုပ်ငန်းကော်မတီ (UPWC) နဲ့ တိုင်းရင်းသားလက်နက်ကိုင် အဖွဲ့အစည်း ၁၆ ဖွဲ့မှ ကိုယ်စားလှယ်များပါတဲ့ တစ်နိုင်ငံလုံး အပစ်ရပ်စဲရေးဆိုင်ရာ ညှိနှိုင်းရေးအဖွဲ့ (NCCT) တို့ဟာ တရားဝင်ဆွေးနွေးပွဲ ခြောက်ကြိမ်ပြုလုပ်ထားပြီး အလွတ်သဘော တွေ့ဆုံမှုတွေ များစွာပြုလုပ်ထားပါတယ်။

တိုင်းရင်းသားလက်နက်ကိုင် အဖွဲ့များရဲ့ တတိယအကြိမ်မြောက် ထိပ်သီးခေါင်းဆောင်များ အစည်းအဝေးအပြီး ပြုလုပ်ခဲ့တဲ့ UPWC နဲ့ NCCT တို့ရဲ့ ဩဂုတ်လဆွေးနွေးပွဲဟာ တိုးတက်မှုရလဒ်များစွာ ဖြစ်ပေါ်ခဲ့ပါတယ်။ NCCT ဘက်က အဆိုပြုတဲ့ ဖက်ဒရယ်ပြည်ထောင်စု တည်ဆောက်ရေးမူကို အစိုးရဘက်က လက်ခံပေးခဲ့သလို တည်ဆဲ ဥပဒေနဲ့ ၂ဝဝ၈ ဖွဲ့စည်းပုံအခြေခံဥပဒေအောက်က ဆွေးနွေးရမယ်ဆိုတဲ့ အချက်ကိုလည်း အစိုးရဘက်က ပယ်ဖျက်ပေး ခဲ့တယ်လို့ NCCT ခေါင်းဆောင်များက ပြောပါတယ်။ ဩဂုတ်ဆွေးနွေးပွဲ အပြီးမှာတော့ ဆွေးနွေးရန်အချက် အနည်း ငယ်သာ ကျန်ရှိတော့ပြီး ၂ဝ၁၄ ခုနှစ်အတွင်း တစ်နိုင်ငံလုံး အပစ်အခတ်ရပ်စဲရေး ဆောင်ရွက်နိုင်မယ်လို့ နှစ်ဖက် ကိုယ်စားလှယ်များက ဆိုပါတယ်။

အပစ်ရပ်စာချုပ်မူကြမ်းပါ အချက်တွေအားလုံး အပြီးသတ် သဘောတူညီမှု ရရှိမယ်လို့ အများကမျှော်လင့်ထားတဲ့ UPWC နဲ့ NCCT တို့ရဲ့ စက်တင်ဘာဆွေးနွေးပွဲမှာတော့ နှစ်ဖက်ကိုယ်စားလှယ်များဟာ ပြောနေကျဖြစ်တဲ့ နှစ်ဖက်အကြား ဆွေးနွေးမှုအားကောင်းတယ်၊ ဆွေးနွေးရတာ အဆင်ပြေတယ် ဆိုတာမျိုးတောင် မပြောနိုင်တဲ့အထိ မပြေလည်မှုတွေ ဖြစ်ခဲ့ပါတယ်။

UNFC ရဲ့လှုပ်ရှားမှုများနဲ့ ပတ်သက်ပြီး ထွက်ပေါ်လာတဲ့ ကောလာဟလများအပေါ် တပ်မတော်ဘက်က စိုးရိမ်မှုများ ရှိခဲ့ခြင်းသည် ဆွေးနွေးပွဲ အဆင်မပြေဖြစ်ရခြင်းရဲ့ အကြောင်းရင်းတစ်ခုဖြစ်တယ်လို့ အစိုးရနဲ့နီးစပ်တဲ့ ပုဂ္ဂိုလ်တစ်ဦးက ပြောပြပါတယ်။

ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ (UNFC) ရဲ့ ညီလာခံကို ဩဂုတ် ၂၅ ရက်ကနေ စက်တင် ဘာ ၂ ရက်အထိ မြန်မာ-ထိုင်း နယ်စပ်တစ်နေရာမှာ ပြုလုပ်ခဲ့ပါတယ်။ ယင်းညီလာခံသို့ UNFC အဖွဲ့ဝင် တိုင်းရင်း သားလက်နက်ကိုင်အဖွဲ့ ၁၂ ဖွဲ့၊ အဖွဲ့ဝင်မဟုတ်တဲ့ တိုင်းရင်းသားလက်နက်ကိုင် အဖွဲ့ငါးဖွဲ့တို့ တက်ရောက်ခဲ့တဲ့အပြင် ညီလာခံကျင်းပနေစဉ် အမျိုးသားဒီမိုကရေစီအဖွဲ့ချုပ်၊ ၈၈ မျိုးဆက် ငြိမ်းချမ်းရေးနှင့် ပွင့်လင်းလူ့အဖွဲ့အစည်း အပါအဝင် ပြည်တွင်းအဖွဲ့အစည်းများလည်း တက်ရောက်ခဲ့ပါတယ်။ တိုင်းရင်းသားလက်နက်ကိုင် အဖွဲ့များနဲ့ ပြည်တွင်းအဖွဲ့ အစည်းများရဲ့ ပူးတွဲကြေညာချက်တစ်စောင်လည်း ထုတ်ပြန်ခဲ့ပါတယ်။ UNFC အဖွဲ့ဝင်ဖြစ်တဲ့ ကရင်အမျိုးသားအစည်း အရုံး (KNU) ဟာ ညီလာခံကျင်းပနေစဉ် အတွင်းမှာပဲ UNFC အဖွဲ့ဝင်အဖြစ်ပါဝင်မှု ယာယီရပ်ဆိုင်းကြောင်း ကြေညာ ချက် ထုတ်ပြန်ခဲ့ပါတယ်။ ညီလာခံအပြီးမှာ UNFC က ညီလာခံကြေညာချက်တစ်စောင် ထုတ်ပြန်ခဲ့တယ်။

UPWC နဲ့ NCCT တို့ရဲ့ စက်တင်ဘာဆွေးနွေးပွဲ မကျင်းပမီ ရက်အနည်းငယ်အလို စက်တင်ဘာ ၁၉ ရက်နေ့မှာ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က နိုင်ငံတော်ကာကွယ်ရေး တက္ကသိုလ်မှာ မိန့်ခွန်းပြောကြားခဲ့ရာ ငြိမ်းချမ်းရေးကို အကြောင်းပြု၍ ပြည်ပနိုင်ငံများနှင့် နယ်စပ်ဒေသများမှ လက်နက်ကိုင်အဖွဲ့အချို့ ပြည်တွင်းကို ပြန်လည်ဝင်ရောက်၍ ရှင်သန်ရပ်တည် လှုပ်ရှားခွင့်များ ရရှိခဲ့ကြောင်း၊ အချို့အဖွဲ့များအနေဖြင့် ပြည်တွင်းပြည်ပနှင့် အဖွဲ့အစည်းအချို့၏ အကူအညီ အထောက်အပံ့ ရယူ၍ နိုင်ငံရေးနှင့် အခြားအင်အား တည်ဆောက်မှုများ၊ တောင်းဆိုမှုများ ပြုလုပ်လာသည်ကို တွေ့မြင်ရကြောင်း၊ မကြာသေးမီက ကြေညာချက်များ ထုတ်ပြန်ခဲ့သည့် UNFC ၏ လုပ်ဆောင်ချက်များသည် ငြိမ်းချမ်းရေးဆောင်ရွက်ရာတွင် အခက်အခဲများ ဖြစ်လာနိုင်သည်ကို သတိထားရန်လိုကြောင်း ထည့်သွင်းပြောကြားခဲ့ပါတယ်။

UNFC အဖွဲ့ ဒုတိယဥက္ကဋ္ဌ(၁)ဖြစ်ပြီး NCCT အဖွဲ့ခေါင်းဆောင်လည်းဖြစ်တဲ့ နိုင်ဟံသာက UNFC အနေနဲ့ အပစ်ရပ်စဲရေးနဲ့ ငြိမ်းချမ်းရေးဆွေးနွေးပွဲကို ထိခိုက်စေလိုသည့် သဘောထား လုံးဝမရှိဘူးဆိုပြီး တုံ့ပြန်ခဲ့ပါတယ်။

တပ်မတော်ကာကွယ်ရေးဦးစီးချုပ်ရဲ့ မိန့်ခွန်းဟာ နိုင်ငံလုံးဆိုင်ရာ အပစ်ရပ်စဲရေး ဆွေးနွေးမှုကို သက်ရောက်မှုရှိခဲ့တယ်လို့ NCCT ခေါင်းဆောင်များက ဆိုပါတယ်။ NCCT အဖွဲ့မှာ UNFC အဖွဲ့ဝင် လက်နက်ကိုင်အဖွဲ့အစည်း အားလုံးက ကိုယ်စားလှယ်များ ပါဝင်နေပါတယ်။

UPWC နဲ့ NCCT တို့ရဲ့ ခြောက်ကြိမ်မြောက်ဆွေးနွေးပွဲဟာ မပြေလည်မှုများနဲ့ စတင်ခဲ့သလို ယခင်သဘောတူညီပြီးသား အချက်များကို ပြန်လည်ဆွေးနွေးခဲ့ရပြီး ဆွေးနွေးပွဲအပြီးမှာ နှစ်ဖက်သဘောတူညီမှုရရှိဖို့ ကျန်နေတဲ့ အချက်တွေ ယခင်ကထက် ပိုများလာပါတယ်။

အောက်တိုဘာ ၁ ရက်က ပြည်သူများကို ပြောကြားခဲ့တဲ့ သမ္မတရဲ့ ရေဒီယိုမိန့်ခွန်းမှာ တစ်နိုင်ငံလုံး အတိုင်းအတာ ပစ်ခတ်တိုက်ခိုက်မှု ရပ်စဲရေး သဘောတူညီချက်စာချုပ် ချုပ်ဆိုနိုင်ရေး ကြိုးပမ်းဆောင်ရွက်မှုကို ပိုမိုအားထည့်ဆောင်ရွက်ဖို့၊ နိုင်ငံရေးအင်အားစုများ၏ သဘောထားကြီးမှု၊ စိတ်ရှည်သည်းခံမှုနဲ့ အလေးအနက်ထား ပါဝင်ကြိုးပမ်း အားထုတ်မှုတို့ အထူးလိုအပ်တယ်ဆိုပြီး ထည့်သွင်းပြောကြားခဲ့သလို တစ်နိုင်ငံလုံး အတိုင်းအတာ အပစ်ရပ်စဲရေးဆောင်ရွက်ပြီး နိုင်ငံရေးဆွေးနွေးပွဲများ စတင်နိုင်မှသာ ၂ဝ၁၅ ရွေးကောက်ပွဲ အောင်မြင်စွာ ကျင်းပနိုင်မှုနှင့် ညင်သာသည့် နိုင်ငံရေးအသွင်ကူးပြောင်းမှုများကို သေချာစေမည်ဆိုပြီးတော့လည်း နိုင်ငံတော်သမ္မတက သတိပေးစကား ပြောကြားခဲ့ပါတယ်။ နှစ်ပေါင်းရှည်ကြာစွာ ဖြစ်ပွားခဲ့တဲ့ လက်နက်ကိုင်ပဋိပက္ခများကြောင့် တိုင်းပြည်ဟာ ဖွံ့ဖြိုးတိုးတက်မှု နောက်ကျနေပြီး . . . . . 
ဆွေးနွေးပွဲအပြီး ဖြစ်ပွားခဲ့တဲ့ တိုက်ပွဲတွေဟာ ဆွေးနွေးပွဲရလဒ်နဲ့ သက်ဆိုင်နေသလားဆိုပြီး မေးခွန်းတွေရှိလာတယ်။ တကယ်တော့ နှစ်ဖက်တပ်တွေ ရောထွေးနေတဲ့ နယ်မြေမှာ ထိတွေ့ပစ်ခတ်မှုတွေဖြစ်တာ မဆန်းပါဘူး။ ဒါပေမဲ့ တိုက်ပွဲတွေဖြစ်တိုင်း နှစ်ဖက်တပ်သားတွေ၊ ဒေသခံတွေ အထိနာပါတယ်။ တိုက်ပွဲဖြစ်ပွားရတဲ့ အကြောင်းအရင်းတွေ၊ သေဆုံးဒဏ်ရာရရတဲ့ သတင်းတွေကို တိုင်းရင်းသားလက်နက်ကိုင် အဖွဲ့တွေဘက်က သတင်းထုတ်ပြန်မှုတွေ ရှိပေမယ့် တပ်မတော်ဘက်ကတော့ သတင်းထုတ်ပြန်တာ မတွေ့ရပါဘူး။ တပ်မတော်ဘက်က ထိုးစစ်ဆင်မှုတွေကြောင့် တိုက်ပွဲတွေဖြစ်တာလို့ တိုင်းရင်းသားလက်နက်ကိုင် အဖွဲ့များရဲ့ ပြောကြားမှုနဲ့ ပတ်သက်ပြီး တပ်မတော်ဘက်ကို မေးမြန်းဖို့ ဆက်သွယ်ခဲ့သော်လည်း အဆက်အသွယ် မရခဲ့ပါဘူး။

အောက်တိုဘာ ၂ ရက်က ရှမ်းပြည်တောင်ပိုင်း ကျေးသီးမြို့နယ် တာ့ဖာဆောင်ဒေသမှာ ဖြစ်ပွားခဲ့တဲ့ တပ်မတော်နဲ့ ရှမ်းပြည်တိုးတက်ရေးပါတီ/ရှမ်းပြည်တပ်မတော် (SSPP/SSA) တို့ရဲ့ တိုက်ပွဲဟာ ပြင်းထန်မှုရှိပြီး နှစ်ဖက်တပ်သားများ ထိခိုက်သေဆုံးမှု များပြားခဲ့ပါတယ်။ SSPP/SSA ခေါင်းဆောင်များဟာ ပြီးခဲ့တဲ့ ဩဂုတ်လကုန်ပိုင်းက နိုင်ငံတော်သမ္မတ၊ တပ်မတော်ကာကွယ်ရေး ဦးစီးချုပ်တို့နဲ့ နေပြည်တော်မှာ တွေ့ဆုံဆွေးနွေးမှု ပြုလုပ်ခဲ့ပါတယ်။ အဲဒီလိုဆွေးနွေးအပြီး တစ်လကျော်လောက်ကာလမှာ နှစ်ဖက်အကြား ပြင်းထန်တဲ့တိုက်ပွဲတွေ ဖြစ်တယ်ဆိုတာကတော့ သိပ်မကောင်းလှဘူး။

တပ်မတော်နဲ့ SSPP/SSA တို့ရဲ့ တိုက်ပွဲကိစ္စနဲ့ ပတ်သက်ပြီး ရှမ်းပြည်ပြန်လည်ထူထောင်ရေးကောင်စီ/ရှမ်းပြည်တပ်မတော် (RCSS/SSA) က တိုင်းရင်းသားလက်နက်ကိုင် အဖွဲ့များအနေဖြင့် ယနေ့လက်ရှိ တပ်မတော်၏ စစ်မက်လုပ်ဆောင်ချက်များအပေါ် ပြန်လည်သုံးသပ်သင့်ကြောင်း သဘောထားထုတ်ပြန်ခဲ့သလို ငြိမ်းချမ်းရေးတည်ဆောက်မှုလုပ်ငန်းစဉ် အောင်မြင်ရေး ကြိုးပမ်းနေချိန်မှာ မလိုလားအပ်သော ပစ်ခတ်တိုက်ခိုက်မှုများ အမြန်ဆုံး ရပ်တန့်စေနိုင်ရေးနဲ့ နိုင်ငံရေးပြဿနာကို နိုင်ငံရေးနည်းလမ်းအားဖြင့် ဖြေရှင်းနိုင်ရေးအတွက် နိုင်ငံတော်သမ္မတက တာဝန်ယူဆောင်ရွက်ပေးရန်လည်း ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD)၊ ရှမ်းတိုင်းရင်းသားများ ဒီမိုကရက်တစ်ပါတီ (SNDP), RCSS, SSPP တို့က ပူးပေါင်းတိုက်တွန်းခဲ့ပါတယ်။

မြန်မာနိုင်ငံမှာ ငြိမ်းချမ်းရေးရရှိရေးအတွက် အင်အားစုအားလုံး ပါဝင်ဆောင်ရွက်ဖို့ နိုင်ငံတော်သမ္မတ ဦးသိန်းစိန်က ၂ဝ၁၁ ခုနှစ် ဩဂုတ်လက ဖိတ်ခေါ်ခဲ့တာပါ။ သမ္မတရဲ့ ဖိတ်ခေါ်မှု သုံးနှစ်ပြည့်တဲ့အချိန်မှာ စစ်မှန်တဲ့ငြိမ်းချမ်းရေးကို ဖော်ဆောင်နိုင်ဖို့ အစပြုတဲ့ နိုင်ငံလုံးဆိုင်ရာ အပစ်ရပ်စဲရေး ဆွေးနွေးညှိနှိုင်းမှု အဆင့်တစ်ခုကို ရောက်ရှိနေပြီဖြစ်ပေမယ့် အောင်မြင်အောင် ဆောင်ရွက်နိုင်ဖို့ဆိုတာကတော့ မသေချာသေးပါဘူး။ 

အောက်တိုဘာ ၁ ရက်က ပြည်သူများကို ပြောကြားခဲ့တဲ့ သမ္မတရဲ့ ရေဒီယိုမိန့်ခွန်းမှာ တစ်နိုင်ငံလုံး အတိုင်းအတာ ပစ်ခတ်တိုက်ခိုက်မှု ရပ်စဲရေး သဘောတူညီချက်စာချုပ် ချုပ်ဆိုနိုင်ရေး ကြိုးပမ်းဆောင်ရွက်မှုကို ပိုမိုအားထည့်ဆောင်ရွက်ဖို့၊ နိုင်ငံရေးအင်အားစုများ၏ သဘောထားကြီးမှု၊ စိတ်ရှည်သည်းခံမှုနဲ့ အလေးအနက်ထား ပါဝင်ကြိုးပမ်း အားထုတ်မှုတို့ အထူးလိုအပ်တယ်ဆိုပြီး ထည့်သွင်းပြောကြားခဲ့သလို တစ်နိုင်ငံလုံး အတိုင်းအတာ အပစ်ရပ်စဲရေးဆောင်ရွက်ပြီး နိုင်ငံရေးဆွေးနွေးပွဲများ စတင်နိုင်မှသာ ၂ဝ၁၅ ရွေးကောက်ပွဲ အောင်မြင်စွာ ကျင်းပနိုင်မှုနှင့် ညင်သာသည့် နိုင်ငံရေးအသွင်ကူးပြောင်းမှုများကို သေချာစေမည်ဆိုပြီးတော့လည်း နိုင်ငံတော်သမ္မတက သတိပေးစကား ပြောကြားခဲ့ပါတယ်။

နှစ်ပေါင်းရှည်ကြာစွာ ဖြစ်ပွားခဲ့တဲ့ လက်နက်ကိုင်ပဋိပက္ခများကြောင့် တိုင်းပြည်ဟာ ဖွံ့ဖြိုးတိုးတက်မှု နောက်ကျနေပြီး နိုင်ငံသားတစ်ဦးချင်းစီရဲ့ဘဝကို သက်ရောက်မှုရှိနေတယ်ဆိုတာ နိုင်ငံတော်သမ္မတရော၊ တပ်မတော်ကာကွယ်ရေး ဦးစီးချုပ်ရော၊ လွှတ်တော်ခေါင်းဆောင်များရော၊ နိုင်ငံရေးပါတီ ခေါင်းဆောင်များရော၊ တိုင်းရင်းသားလက်နက်ကိုင် အဖွဲ့ခေါင်းဆောင်များပါ သိရှိထားပြီး ငြိမ်းချမ်းရေးကို အမှန်တကယ် ရချင်ပါတယ်လို့ ပြောကြားထားကြပေမယ့် လက်ရှိအချိန်အထိ ငြိမ်းချမ်းရေးတည်ဆောက်မှု လုပ်ငန်းစဉ် အောင်မြင်မှုရရှိဖို့ဆိုတာ သေချာတဲ့အခြေအနေ မဟုတ်ပါဘူး။

ဒီအောက်တိုဘာလထဲမှာ ပြုလုပ်ဖို့ စီစဉ်ထားတဲ့ UPWC နဲ့ NCCT တို့ရဲ့ဆွေးနွေးပွဲမှာ အပစ်ရပ်မူကြမ်းကို အပြီးသတ် သဘောတူညီမှုရရှိအောင် ကြိုးစားသွားပြီး တစ်နိုင်ငံလုံး အပစ်ရပ်စဲရေး အမြန်ဆုံးဆောင်ရွက်သွားမယ်လို့ UPWC အဖွဲ့ဝင်ခေါင်းဆောင်များက ပြောကြားထားပေမယ့် နှစ်ဖက်အကြားမှာ သံသယတွေ မယုံကြည်မှုတွေ အသာစီးရယူလိုမှုတွေ ရှိနေသ၍ ငြိမ်းချမ်းရေးလုပ်ငန်းစဉ်ဟာ အောင်မြင်မှုမရ ဖြစ်နေဦးမှာပါ။

ငြိမ်းချမ်းရေးတည်ဆောက်မှု လုပ်ငန်းစဉ်တွေဖြစ်တဲ့ တစ်နိုင်ငံလုံး အပစ်အခတ်ရပ်စဲရေးနဲ့ နိုင်ငံရေးဆွေးနွေးပွဲများ အောင်မြင်စွာ ဖြစ်ပေါ်လာဖို့ဆိုတာ အစိုးရ၊ လွှတ်တော်၊ တပ်မတော်၊ တိုင်းရင်းသားလက်နက်ကိုင် အဖွဲ့များနဲ့ နိုင်ငံရေးပါတီ ခေါင်းဆောင်များရဲ့ သဘောထားများအပေါ် မူတည်နေပါတယ်။

စစ်ပွဲတွေကြောင့် ဒုက္ခသည်စခန်းတွေမှာ နေထိုင်နေကြရဆဲဖြစ်တဲ့ သိန်းချီတဲ့ပြည်သူတွေ အပါအဝင် သန်း ၅ဝ ကျော်သော မြန်မာပြည်သူများကတော့ မသေချာသေးတဲ့ ငြိမ်းချမ်းရေးကို မျှော်လင့်နေရင်း ခေါင်းဆောင်အသီးသီးရဲ့ ပြည်သူများအပေါ်ထားတဲ့ စိတ်ရင်းစေတနာ၊ ဥာဏ်အမြှော်အမြင်ကြီးမှု၊ တိုင်းပြည်ရဲ့ အနာဂတ်ကို ကြည့်မှုတွေကို စောင့်ကြည်အကဲဖြတ်ကြပါစို့။

eleven

No comments:

Post a Comment

My Blog List