တနိုင်ငံလုံးအတိုင်းအတာနဲ့ အပစ်ခတ်ရပ်လက်မှတ်ရေးထိုးနိုင်ရေး၊ နိုင်ငံရေးဆွေးနွေးပွဲတွေ စတင်နိုင်ရေး အတွက် မြန်မာငြိမ်းချမ်းရေးစင်တာက ကိုယ်စားလှယ်တွေနဲ့ အာစီအက်စ်အက်စ် (ရှမ်းပြည်ပြန်လည် ထူထောင်ရေး ကောင်စီ)ရှမ်းပြည်တပ်မတော် တောင်ပိုင်းအဖွဲ့တို့ ထိုင်းနိုင်ငံချင်းမိုင်မှာ ဒီဇင်ဘာလ ၂ ရက် ညနေပိုင်းက တွေ့ဆုံခဲ့ပါတယ်။
အဓီက အန်စီစီတီ (တနိုင်ငံလုံး အပစ်ခတ်ရပ်စဲရေး ဆိုင်ရာညှိနှိုင်းရေးအဖွဲ့) နဲ့ အန်စီအေ (national Cease Fire Accord) တပြည်လုံး အပစ်ရပ် သဘောတူညီ ချက်စာချုပ်ကိစ္စ၊ လက်ရှိနိုင်ငံရေး အခြေအနေ တွေအကြောင်းကို မြန်မာငြိမ်း ချမ်းရေးစင်တာ ဘက်က လာရောက်ရှင်းပြခဲ့တယ်လို့ ရှမ်းပြည်တပ်မတော် တောင်ပိုင်း ရဲ့ ပြောခွင့်ရ ဗိုလ်မှူးကြီးစိုင်းလက ဒီဗွီဘီကို ပြောပါတယ်။
“လက်ရှိ နိုင်ငံရေးအခြေအနေကို ရှင်းပြပါတယ်။ အန်စီစီတီနဲ့ အန်စီအေ ရှေ့ဆက်သွားနိုင်ရေး နည်းလမ်း ရှာနေတဲ့အကြောင်းတွေ၊ ကေအန်ယူနဲ့ ကာကွယ်ရေးဦးစီးချုပ်တို့ နေပြည်တော်မှာ တွေ့ဆုံပြီးတဲ့ နောက် ပိုင်းအခြေ အနေတွေ ရှင်းပြပါတယ်။ အဓိကကတော့ တပြည်လုံး အပစ်ခတ်ရပ်ရေး၊ နိုင်ငံရေးဆွေးနွေး ပွဲဖော်ဆောင်ဖို့ အဲမ်ပီစီက တိုင်းရင်းသား လက်နက်ကိုင်အဖွဲ့တွေနဲ့ တွေ့ဆုံခဲ့တဲ့ ရလဒ်တွေ လာပြီး ရှင်းပြ တာ ဖြစ်ပါတယ်။”
သူတို့ဘက်ကလည်း အန်စီစီတီ နဲ့ ယူပီဒဗလျူစီတို့ ဆွေးနွေးပွဲ နှောင့်နှေးနေရ တဲ့ထဲမှာ လိုင်ဇာ ဗိုလ်သင် တန်းကျောင်း အပစ်ခံရတဲ့ကိစ္စလည်းပါဝင်ပြီး အဲဒီကိစ္စ ဖြေရှင်းဖို့ ပြောခဲ့တယ်လို့ ဆိုပါတယ်။
အန်စီစီတီနဲ့ ယူပီဒဗလျူစီ (ပြည်ထောင်စုငြိမ်းချမ်းရေးဖော်ဆောင်ရေး လုပ်ငန်းကော်မတီ) တို့ ရဲ့ တွေ့ဆုံ ဆွေးနွေးပွဲကို ဒီလ တတိယပတ်လောက်မှာ ပြုလုပ်နိုင်မယ်လို့ အမ်ပီစီက မျှော်မှန်းထားပြီး အာစီအက်စ် အက်စ်အဖွဲ့ကိုပါ ဖိတ်ကြားမယ်လို့ ပြောခဲ့ကြောင်း ဗိုလ်မှူးကြီး စိုင်းလက ပြောပါ တယ်။
ရှမ်းပြည်တပ်မတော်တောင်ပိုင်းအဖွဲ့ဟာ တိုင်းရင်းသားလက်နက်ကိုင်မဟာမိတ် အဖွဲ့ထဲမှာ ပါဝင်ခြင်း မရှိတဲ့အတွက် တနိုင်ငံလုံးဆိုင်ရာ အပစ်ခတ်ရပ်စာချုပ်ရေး ထိုးတဲ့အခါမှာ သီးသန့် အနေနဲ့ ရေးထိုးမှာ ဖြစ်ကြောင်း၊ ဒါပေမယ့်လည်း အပစ်ခတ်ရပ်သဘောတူစာချုပ်ထဲမှာ ပါဝင်မယ့် အချက်အလက်တွေပေါ် မူတည်ပြီး သူတို့သဘောထားနဲ့ ကိုက်ညီတယ်ဆိုရင်တော့ အားလုံးနဲ့ အတူ လက်မှတ်ရေးထိုးနိုင်မယ်လို့ သူကဆက်ပြောပါတယ်။
အမ်ပီစီက နိုင်ငံရေးဆွေးနွေးပွဲတွေကို ၂၀၁၅ ခု နှစ်ဆန်းပိုင်းမှာ စတင်နိုင်ဖို့ ချည်းကပ်တဲ့ လမ်းကြောင်း တွေအကြောင်း ရှင်းပြပြီး သူတို့အနေနဲ့ ဘယ်လမ်းကြောင်းမဆို ပါဝင်နိုင်ကြောင်း ပြောဆိုခဲ့တယ်လို့ ဗိုလ်မှူးကြီးစိုင်းလက ပြောပါတယ်။
ဒီတခေါက် တွေ့ဆုံမှုမှာ ရှမ်းပြည်တပ်မတော်ဘက်က ဗိုလ်မှူကြီးစိုင်းလနဲ့ ဒုဗိုလ်မှူကြီး စိုင်းငင်း တို့ ပါဝင်ပြီး မြန်မာငြိမ်းချမ်းရေး အကျိုးတော်ဆောင်များဘက်က ဦးလှမောင်ရွှေ၊ ဦးခင်မောင်သန်း၊ ဒေါက်တာမင်းဇော် ဦး၊ ဦးညိုအုန်းမြင့် နဲ့ ဒေါက်တာ အင်ဒရူးတို့ ပါဝင်ကြပါတယ်။
DVB
No comments:
Post a Comment