ရဲတပ်ဖွဲ့ဝင်များ စစ်ကိုင်းတိုင်း မြို့နယ်များတွင် ကင်းလှည့်ရာတွင် စက်ဘီးဖြင့်သာ လှည့်ကြရန် စက်ဘီး ၁၆၅ စီးကို ရဲတပ်ဖွဲ့ဝင်များသို့ ပေးအပ်ခြင်းဖြင့် စစ်ကိုင်းတိုင်း အစိုးရက စီစဉ်လိုက်သည်။ စက်ဘီးများကို မြန်မာနိုင်ငံရဲတပ်ဖွဲ့ ရွှေရတု နှစ်ပတ်လည်နေ့ စက်တင်ဘာ ၁ ရက်တွင် စစ်ကိုင်းတိုင်းအစိုးရက ပေးအပ် ခဲ့ပြီး စက်ဘီးများသည် မှုခင်းကျဆင်းရေးကို အထောက်အကူပြုစေမည်ဟု တိုင်းရဲတပ်ဖွဲ့မှူး ရဲမှူးကြီး နေထွန်းက ပြောသည်။
“အိမ်ရှေ့မှာ ဆိုင်ကယ်နဲ့ ရဲဖြတ်သွားတာကို မြင်လိုက်လို့ အိမ်ရှင်က အကူအညီ ထွက်တောင်းမယ်ဆိုရင် အိမ်ရှင်က အိမ်ရှေ့မရောက်သေးဘူး ရဲက ဟိုအဝေးကြီးကိုရောက်သွားပြီ။ အော်မကြား ခေါ်မကြားဖြစ် သွားပြီ စက်ဘီး လှည့်ကင်းဆိုတော့ ဖြေးညင်းသက်သာဘဲ သွားလာလို့ရတယ်” ဟု ပြောသည်။
လှည့်ကင်းကို စက်ဘီးဖြင့် လှည့်ပါက လမ်းကြိုလမ်းကြားအထိ သွားလာနိုင်ပြီး မှောင်ရိပ်ခိုကာ ပြစ်မှုကျူးလွန် ပြင်ဆင်နေသူများကိုလည်း ဖမ်းဆီးနိုင်မည်ဟု မုံရွာခရိုင် ရဲတပ်ဖွဲ့မှူး ဒုရဲမှူးကြီး ချင်းစိန်ကလည်း ပြောသည်။
“မူးလဲနေတဲ့ သူတွေကိုလည် မြင်တွေ့နိုင်ပါတယ်။ နောက်ပြီး ပြစ်မှုကျူးလွန်ဖို့ရန် အမှောင်ရိပ်ခိုနေတဲ့ သူတွေကို အသံတိတ် ရုတ်တရက် ဖမ်းဆီးအရေးယူနိုင် ပါတယ်” ဟု ပြောသည်။
သို့သော် ရဲတပ်ဖွဲ့ဝင်တို့ မှုခင်းကျဆင်ရေး လုပ်ဆောင်ရာတွင် ကိုယ်တိုင်၏ အရည်အသွေး လိုအပ်ချက်နှင့် မှုခင်းကျဆင်းရန် အထောက်အကူပေးမည့် လက်နက်နှင့် အခြားပစ္စည်းများလိုအပ်ချက် ရှိနေသည်ဟု လေ့လာသူများက ဆိုသည်။
Mizzima - News in Burmese
No comments:
Post a Comment