ဒေါ်အောင်ဆန်း စုကြည် ဥက္ကဌ တာဝန် ယူထားသည့် တရားဥပဒေ စိုးမိုးရေးနှင့် တည်ငြိမ် အေးချမ်းရေး ကော်မတီက နိုင်ငံအတွင်း တရားဥပဒေ စိုးမိုးမှု စင်တာများကို လာမည့် နိုဝင်ဘာလမှ စတင်ပြီး ဖွင့်လှစ်တော့မည် ဖြစ်ကြောင်း သိရသည်။ တရား ဥပဒေ စိုးမိုးရေး စင်တာများကို ပိုင်းလော့ ပရောဂျက် (ရှေ့ပြေး ဆောင်ရွက်မှု) အနေဖြင့် မန္တလေး မြို့နှင့် လားရှိုးမြို့တို့တွင် ပထမဆုံး ဖွင့်လှစ်မည် ဖြစ်သည်။
မူလက တရားဥပဒေ စိုးမိုးရေး စင်တာများ ဖွင့်လှစ်ရာတွင် ပြည်ထောင်စု ရှေ့နေချုပ်ရုံး၊ ပြည်ထဲရေး ၀န်ကြီးဌာန၊ နိုင်ငံခြားရေး ၀န်ကြီးဌာန၊ အမျိုးသား စီမံကိန်းနှင့် စီးပွားရေး ဖွံ့ဖြိုးတိုးတက်မှု ၀န်ကြီးဌာနတို့မှ ကိုယ်စားလှယ် အဖွဲ့ဝင်များကို စေလွှတ်ပေးမည်ဟု ပြည်ထောင်စု အစိုးရအဖွဲ့ ညွှန်ကြားရေးမှူးချုပ်က ပြောဆိုထားသော်လည်း နောက်ပိုင်းတွင် မူလသဘောထားနှင့် ကွဲလွဲပြီး ပြန်လည် အကြောင်းကြားလာသည်ဟု သိရသည်။
အစိုးရထံတွင် တရားသူကြီး ၁၂၀၀ သာ ရှိသဖြင့် သင်တန်းသို့ လွှတ်ရန် အခက်အခဲများရှိခြင်း၊ အထက်က တရားဝင် ခွင့်ပြုချက် မရခြင်း၊ အမှုများက များပြားနေသဖြင့် အမှုများ စီရင်ရာတွင် ပြဿနာများ ရှိလာနိုင်ခြင်း၊ အထွေထွေ အုပ်ချုပ်ရေး ဦးစီးဌာနနှင့် ရဲတပ်ဖွဲ့တို့အား သင်တန်းသို့ စေလွှတ်ရန် တရားဝင် ခွင့်ပြုချက် လိုအပ်ခြင်းတို့ကြောင့် တရားဥပဒေ စိုးမိုးရေးစင်တာများသို့ မစေလွှတ်နိုင်ခြင်း ဖြစ်ကြောင်း အစိုးရက အကြောင်းပြန်သည်ဟု ဆိုသည်။
ထိုစင်တာများကို မူလက စက်တင်ဘာလ အတွင်း ဖွင့်လှစ်နိုင်ရန် စီစဉ်ထားသော်လည်း အစိုးရ၏ ပူးပေါင်း ဆောင်ရွက် မှု မရှိခြင်းကြောင့် ယခုအခါ ကုလသမဂ္ဂ ဖွံ့ဖြိုးမှု အစီအစဉ် (UNDP) နှင့် အလှူရှင် နိုင်ငံများ ညှိနှိုင်းဆောင်ရွက်ပြီး နိုဝင်ဘာလ အတွင်း ဖွင့်လှစ် ရန် စီစဉ်ရခြင်း ဖြစ်သည်ဟု တရားဥပဒေ စိုးမိုးရေးနှင့် တည်ငြိမ် အေးချမ်းရေး ကော်မတီ အတွင်းရေးမှူး ဦးဝင်းမြင့်က ယင်း ကော် မတီ ၏ နှစ်ပတ်လည် အစီရင်ခံစာအား စက်တင်ဘာ ၂၉ ရက်က လွှတ်တော် သို့ တင်သွင်းစဉ် ထည့်သွင်း ပြောဆိုခဲ့သည်။
ဦးဝင်းမြင့်က“တရားဥပဒေ စိုးမိုးရေး စင်တာ၏ အုပ်ချုပ်ရေး အပိုင်းအား မည်သည့် အဖွဲ့အစည်း လက်အောက်တွင်မျှ မထားရန်တို့ကို ဆွေးနွေးခဲ့ကြပါသည်”ဟုလည်း လွှတ်တော်တွင် ထည့်သွင်း ဖတ်ကြားခဲ့သည်။
သို့သော် တရားဥပဒေ စိုးမိုးရေး စင်တာ ဖွင့်လှစ်နိုင်ရေးအတွက် ပြည်ထောင်စု အစိုးရ အဖွဲ့ရုံးက တရားဥပဒေ စိုးမိုးရေး ဌာနများ တည်ထောင်မည့် ညှိနှိုင်းရေး ကော်မတီ ဖွဲ့စည်းရေးတွင် နိုင်ငံ့ဝန်ထမ်းများ မပါဝင်စေဘဲ လွှတ်တော် အစီအစဉ်ဖြင့်သာ ဆောင်ရွက် သင့်ကြောင်း၊ တရားဥပဒေ စိုးမိုးရေး ကိစ္စများနှင့် ပတ်သက်၍ ညှိနှိုင်း ဆောင်ရွက်ရန် လိုအပ်ပါက ပြည်ထဲရေး ၀န်ကြီးဌာနက ကူညီဆောင်ရွက်ပေးမည်ဟု အကြောင်းပြန်ခဲ့ကြောင်း သိရသည်။
ယင်းကိစ္စနှင့် ပတ်သက်ပြီး ဦးဝင်းမြင့်က “တရားဥပဒေ စိုးမိုးရေး ကိစ္စသည် ဥပဒေပြုရေး ၊ အုပ်ချုပ်ရေး ၊ တရားစီရင်ရေး မဏ္ဍိုင်ကြီး ၃ ရပ် စလုံးနှင့် သက်ဆိုင်သည့် အတွက် အားလုံး ပူးပေါင်းညှိနှိုင်း ဆောင်ရွက်ရသည့် ကိစ္စ ဖြစ်ပါကြောင်း၊ ဖွဲ့စည်းပုံတွင်လည်း အပြန်အလှန် ထိန်းကျောင်းရန်သာ ပြောဆိုထားပြီး ပူးပေါင်း ဆောင်ရွက်ခြင်း မပြုရဟု ကန့်သတ် မထားကြောင်း၊ တရားရုံးများနှင့် ပတ်သက်၍ စောင့်ကြည့်နိုင်သော သီးခြား လွတ်လပ်သည့် အဖွဲ့အစည်းများ ရှိသင့်ကြောင်း အကြံပြုပါသည်”ဟု လွှတ်တော်သို့ တင်ပြ ခဲ့သည်။
တရား ဥပဒေ စိုးမိုးရေးစင်တာ တည်ထောင်ရေး ကော်မတီ ဖွဲ့စည်းနိုင်ရေး အတွက် ပြည်ထောင်စု လွှတ်တော် နာယက ဦးစီးပြီး ပြည်ထောင်စု အဆင့် အဖွဲ့အစည်းဝင်များ ၊ လွှတ်တော် ကော်မတီ/ ကော်မရှင်များနှင့် ကုလသမဂ္ဂ ဖွံ့ဖြိုးမှု အစီအစဉ်တို့ ပါဝင်သည့် အစည်းအဝေးကို ၂၀၁၃ ခုနှစ် နိုဝင်ဘာလ အတွင်းက ပြုလုပ်ခဲ့သည်။
တရားဥပဒေ စိုးမိုးရေး စင်တာများ အတွက် ပိုင်းလော့ ပရောဂျက် ဖွင့်လှစ်ရန် သင်တန်းများ ဖွင့်လှစ်ခြင်း ၊ ထိုသင်တန်း များသို့ တရားသူကြီး၊ ရှေ့နေနှင့် အုပ်ချုပ်ရေး ပိုင်းတာဝန်ရှိသူများ တက်ရောက်ရန် မူလက စီစဉ်ထားသော်လည်း အစိုးရ က မတက်ရောက်နိုင်ဟု အကြောင်းပြန်ခဲ့ကြောင်း ဦးဝင်းမြင့်က ပြောဆိုသည်။
တရားဥပဒေ စိုးမိုးရေး စင်တာများတွင် ပူးပေါင်းပါဝင်မှုနှင့် ပတ်သက်ပြီး အစိုးရက အားနည်းနေသည့် အပေါ် နိုင်ငံတော် သမ္မတရုံးသို့ မေးမြန်းရန် ဧရာဝတီက ဆက်သွယ်သော်လည်း ဆက်သွယ်၍ မရခဲ့ပါ။
ဧရာဝတီ
No comments:
Post a Comment