မန္တလေးတိုင်း ဒေသကြီး အစိုးရ အဖွဲ့က ၂၀၁၄ ခုနှစ် ဇန်နဝါရီလ ၄ ရက် လွတ်လပ်ရေးနေ့တွင် အမိန့်ကြော်ငြာစာ အမှတ် ၁/၂၀၁၄ ဖြင့် လူပုဂ္ဂိုလ်နှင့် အရပ်ဘက် အဖွဲ့အစည်းများမှ ၃၅ ဦးအား ဂုဏ်ထူးဆောင် ဆုတံဆိပ်များ ပထမဦးဆုံး ချီးမြှင့်ကြောင်း မန္တလေးတိုင်းဒေသကြီး အစိုးရအဖွဲ့ ထုတ်ပြန်ချက်အရ သိရှိရသည်။
ယင်းသို့ဆုတံဆိပ် ချီးမြှင့်ရာတွင် စီမံခန့်ခွဲရေးဆိုင်ရာ ထူးချွန်ဆုတွင် ရှစ်ဦး၊ စက်မှုစီးပွား ထူးချွန်ဆုတွင် သုံးဦး၊ စိုက်ပျိုးရေးဆိုင်ရာ ထူးချွန်ဆု လေးဦး၊ မွေးမြူရေး ဆိုင်ရာ ထူးချွန်ဆု ငါးဦး၊ ပညာရေးဆိုင်ရာ ထူးချွန်ဆုလေးဦး၊ လူမှုရေးဆိုင်ရာ ထူးချွန်ဆုတွင် ၁၁ ဦးတို့ ပါဝင်ကြောင်း ယင်း ထုတ်ပြန်ချက်အရ သိရှိရသည်။
"အခုလို ချီးမြှင့်ခံရတာ ဂုဏ်ယူပါတယ်။ ကျွန်တော်တို့ လူမှုရေးအသင်းအဖွဲ့တွေ ဆိုတာ စေတနာ၊ ဝါသနာ စတာတွေနဲ့ အနစ်နာခံပြီး လုပ်နေကြတာပါ။ ကျွန်တော် တို့အသင်း တင်မကဘဲ တခြားအသင်းတွေ ကိုလည်း ချီးမြှင့်သင့်ပါတယ်" ဟု လူမှုရေး ဆိုင်ရာထူးချွန်ဆုရ ချမ်းမြသုခ လူမှုကူညီရေးအသင်း အတွင်းရေးမှူး ဦးလှအောင်က The Voice သို့ ပြောကြားသည်။
ယင်းဆု ချီးမြှင့်မည့်ရက်ကို မသိရှိသေးကြောင်း ဂုဏ်ထူးဆောင် ချီးမြှင့်ခံရသူ များထံမှ သိရှိရသည်။
မန္တလေးတိုင်းဒေသကြီး အစိုးရအဖွဲ့ အနေနှင့် တိုင်းဒေသကြီးအတွင်း စွမ်းစွမ်းတမံ ထူးချွန်ပြောင်မြောက်စွာ တာဝန်ထမ်းဆောင် ခဲ့ကြသော ဝန်ထမ်းများနှင့် တိုင်းဒေသကြီး ဖွံ့ဖြိုးတိုးတက်ရေး အတွက် ထူးချွန်စွာ ကူညီဆောင်ရွက်ခဲ့ကြသော ပုဂ္ဂိုလ်များ၊ လူမှုရေးဆိုင်ရာ ကိစ္စရပ်များကို စွမ်းစွမ်းတမံ ထူးချွန်ပြောင်မြောက်စွာ ဆောင်ရွက်ခဲ့သော လူပုဂ္ဂိုလ်များ၊ အစိုးရ မဟုတ်သော လူမှုရေးဆိုင်ရာ အသင်းအဖွဲ့ များအား ဂုဏ်ထူးဆောင် လက်မှတ်များနှင့် ဂုဏ်ထူးဆောင်ပစ္စည်း များကို မန္တလေးတိုင်း ဒေသကြီး ဂုဏ်ထူးဆောင်လက်မှတ် များနှင့် ဂုဏ်ထူးဆောင်ပစ္စည်းများ ချီးမြှင့်အပ်နှင်းခြင်း ဆိုင်ရာ ဥပဒေအရ အပ်နှင်းကြောင်း ယင်းထုတ်ပြန်ချက် အရ သိရှိရသည်။
ယင်းဥပဒေကို ၂၀၁၂ ခုနှစ် အောက်တိုဘာလ အတွင်းက မန္တလေးတိုင်းဒေသကြီး လွှတ်တော်တွင် အတည်ပြု ပြဋ္ဌာန်းခဲ့သည်။
နိုင်ငံတော်သမ္မတ၏ စွမ်းဆောင်ရည်ဆု ချီးမြှင့်ပွဲကို ၂၀၁၂ ခုနှစ် သြဂုတ်လ ၂၇ ရက်နေ့တွင် မန္တလေး မြို့တော်ခန်းမတွင် ကျင်းပခဲ့ရာ ဗြဟ္မစိုရ် လူမှုကူညီအသင်း၊ မင်းကွန်းဘိုးဘွားရိပ်သာ (ချမ်းအေးသာစံ)၊ မလွန်ဈေး ဆန်လှူအသင်း၊ ဦးစိန်မြင့် (မြန်မာ့ရွှေချည်ထိုး)၊ ရွှေစင်အကယ်ဒမီ ရွှေဆိုင်းလုပ်ငန်း၊ ဦးဝင်းမောင် (တမ္ပဝတီ)၊ ဦးကျော်ခင်မိသားစု ကျောက်ပန်းချီ လုပ်ငန်း၊ ဦးဘညိမ်း ယွန်းထည်လုပ်ငန်းတို့ ချီးမြှင့်ခံခဲ့ရသည်။
The Voice Weekly
No comments:
Post a Comment