မလေးရှားနိုင်ငံသို့ တရားမဝင် လမ်းကြောင်းက ဝင်လာစဉ် ကားမှောက် သေဆုံးသွားသည့် မြန်မာနိုင်ငံ သား လေးဦးကို သဂြုင်္ိဟ်ရန် မြန်မာသံရုံးက ခွင့်ပြုမိန့် ထုတ်ပေးရန် ကြန့်ကြာသဖြင့် အလောင်းများ ပုပ်သိုး ပြီးမှ သဂြုင်္ိဟ်ခဲ့ရကြောင်း ကပုန်း ၇ ရက် သားသမီး နာရေးကူညီမှုအသင်း ဥက္ကဋ္ဌ ဦးဆန်းဝင်းက ပြောကြား သည်။
အဆိုပါ မြန်မာနိုင်ငံသား လေးဦးတွင် နိုင်ငံကူးလက်မှတ်များ မပြနိုင်သဖြင့် နေပြည်တော်ရှိ နိုင်ငံခြားရေး ဝန်ကြီးဌာနကို မြန်မာနိုင်ငံသား ဖြစ်ကြောင်း တင်ပြခိုင်းကြောင်း၊ မလေးရှားတွင် ရောက်ရှိနေသည့် သေဆုံးသူများ၏ မိသားစုဝင်များက ခံဝန်ကတိဖြင့် တင်ပြသော်လည်း လနှင့်ချီ ကြန့်ကြာခဲ့ကြောင်း ၎င်းက ဆိုသည်။
“မိသားစုတွေက ပြောတယ်။ သေသွားတဲ့ သူဟာ သူတို့ရဲ့ မိသားစုဝင် ဖြစ်တယ်။ ဖြစ်သမျှ ပြဿနာကို တာဝန်ယူပါတယ်။ နေပြည်တော် သွားဖို့ဆိုတာ မိဘတွေ မရှိကြဘူး။ မှတ်ပုံတင်တွေလည်း မရှိကြဘူး ဆိုတာကိုတောင် သံရုံးက ခွင့်မပြုဘူး” ဟု ဦးဆန်းဝင်းက ရှင်းပြသည်။
ဇွန်လ ၁၆ ရက်နေ့က နယ်စပ်မှ ကွာလာလမ်ပူ မြို့တော်သို့ သယ်ဆောင်လာသည့် ဟွန်တာယာဉ် အလေးချိန်များကာ အရှိန်မထိန်းနိုင်ဘဲ တိမ်းမှောက်ခဲ့ရာ ချင်းတိုင်းရင်းသားတစ်ဦး၊ ရခိုင်တိုင်းရင်းသား သုံးဦး စုစုပေါင်း လေးဦး သေဆုံးခဲ့သည်။
၎င်းတို့ကို သေဆုံးပြီး ရက်သတ္တပတ် အကြာတွင် မြန်မာသံရုံးထံသို့ သဂြုင်္ိဟ်ခွင့် တောင်းခံခဲ့သော်လည်း ကြန့်ကြာနေသဖြင့် ဇူလိုင်လ ဒုတိယပတ်တွင် ချင်းလူမျိုးကို သဂြုင်္ိဟ်ခဲ့ပြီး ဇူလိုင် ၂၁ ရက်နေ့တွင် ရခိုင် တိုင်းရင်းသား သုံးဦးကို သဂြုင်္ိဟ်ခွင့်ရကြောင်း ဦးဆန်းဝင်းက ပြောကြားသည်။
“အလောင်းတွေက ပုတ်ပြီး ရွဲပြဲကုန်ပြီ” ဟု ၎င်းက ပြောဆိုသည်။
မိသားစုဝင်များက ခံဝန်ကတိများဖြင့် တင်ပြသော်လည်း သဂြုင်္ိဟ်ခွင့် ပြုရာတွင်လည်း မည်သူမည်ဝါဟု အသေအချာမရေးဘဲ ဦးဆန်းဝင်းက ပြော၍ သိရသည်ဟုဆိုကာ သဂြုင်္ိဟ်ခွင့်ပြုကြောင်း ကပုန်း ၇ ရက် သားသမီး နာရေးကူညီမှု အသင်းထံမှ သိရှိရသည်။
“သံရုံးက ခွင့်ပြုတဲ့စာကို ဆေးရုံနဲ့ ရဲကို ပြတယ်။ ဆေးရုံနဲ့ ရဲ၊ သံရုံးကို ဆက်ပြီး အတည်ပြုတော့ ဖုန်းမကိုင်ဘူး။ ခွင့်ပြုချက် ထုတ်ပေးတာကိုလည်း ရုံးစာနဲ့ မထုတ်ပေးလို့ ဆေးရုံကရော၊ ရဲကရော စိတ်ဆိုးတယ်” ဟု ဦးဆန်းဝင်းက ရှင်းပြသည်။
အဆိုပါ ကိစ္စရပ်များနှင့် ပတ်သက်၍ နိုင်ငံခြားရေး ဝန်ကြီးဌာန ကောင်စစ်ရေးရာနှင့် အပြည်ပြည်ဆိုင်ရာ ဥပဒေစာချုပ်များ ဦးစီးဌာနမှ တာဝန်ရှိသူတစ်ဦးထံသို့ ဆက်သွယ်မေးမြန်းရာ ယင်းကိစ္စမှာ အလုပ်သမား၊ အလုပ်အကိုင်နှင့် လူမှုဖူလုံရေး ဝန်ကြီးဌာနနှင့်သာ သက်ဆိုင်ကြောင်း ပြန်လည် ဖြေကြားသည်။
သံရုံးတွင် နိုင်ငံကူးလက်မှတ် ရှိသူများကိုသာ သဂြုင်္ိဟ်တောင်းခံမှု အဆင်ပြေကြောင်း မလေးရှားရောက် မြန်မာများထံမှ သိရှိရသည်။
The Voice Weekly
No comments:
Post a Comment