Monday, October 07, 2013

အခြေခံပညာ ဖွဲ့စည်းပုံစနစ် (သူငယ်တန်း) KG +4-4-2 အစားပြောင်းလဲ ကျင့်သုံး အကောင်အထည် ဖော်မည့် စနစ်အား ဒုတိယဝန်ကြီး ရှင်းလင်း

Monday, October 7, 2013
လက်ရှိ အခြေခံပညာ ဖွဲ့စည်း ပုံစနစ် (သူငယ်တန်း) KG +4-4-2 အစား ပြောင်းလဲကျင့်သုံး အကောင်အထည် ဖော်မည့် စနစ်အား ရှင်းလင်းဖြေကြားပေးရန် ပထမ အကြိမ်အမျိုးသား လွှတ်တော် အဌမ ပုံမှန် အစည်းအဝေး တတိယနေ့တွင် ရန်ကုန်တိုင်းဒေသကြီး မဲဆန္ဒနယ်(၁၀)မှ အမျိုးသားလွှတ်တော် ကိုယ်စားလှယ်ဦးနု၏ မေး မြန်း မှုကို ပညာရေးဝန်ကြီးဌာန ဒုတိယဝန်ကြီး ဒေါက်တာစန်းလွင်က ရှင်းလင်းဖြေ ကြားခဲ့သည်ဟု သိရသည်။ ဒုတိယဝန်ကြီးက အခြေခံ ပညာရေးဖွဲ့စည်းမှု ပုံစံ KG +4-4-2 စနစ်(အခြေခံပညာရေး စုစုပေါင်း ပညာသင်နှစ် ၁၁ နှစ်) အား အာဆီယံဒေသတွင်း နိုင်ငံများ၊ နိုင်ငံတကာတွင် ကျင့်သုံးနေသည့် အခြေခံပညာ စနစ် ဖွဲ့စည်းမှု ပုံစံများနှင့် လိုက်လျောညီထွေ ဖြစ်စေရန် (သူငယ်တန်း) KG +5-4-3 စနစ်သို့ ပြုပြင်ပြောင်းလဲ ကျင့် သုံးနိုင်ရေးအတွက် လုပ်ငန်းအစီအစဉ်များနှင့် လိုအပ်ချက်များကို စီမံချက် ရေးဆွဲ ဆောင်ရွက်ရန် ဆုံးဖြတ်ခဲ့ကြောင်း ဖြေကြားခဲ့သည်။ ထို့အပြင် ထိုသို့ ပြောင်းလဲခြင်းဖြင့် သူငယ်တန်း (Kingder garden- KG) ကို အခြေခံ ပညာရေးစနစ်အတွင်း ထည့်သွင်း၍ မသင်မနေရ သတ်မှတ်ခြင်းဖြင့် အာဆီယံဒေသအတွင်း မူလတန်းကြို ပညာရေး လွှမ်းခြုံမှု ရာခိုင်နှုန်း အနိမ့်ဆုံးဖြစ်နေသည့် မြန်မာနိုင်ငံ၏ အခြေအနေကို အချိန်တိုအတွင်း မူကြိုပညာရေး လွှမ်းခြုံမှုကို မြင့်မားစေကာ နိုင်ငံ တစ်ဝန်းလုံးရှိ ငါးနှစ်အရွယ် ကလေးအားလုံးကို မူကြို ပညာသင်ယူမှု အခွင့်အလမ်း အပြည့်အဝ ရရှိစေနိုင်မည် ဖြစ်ကြောင်း၊ ၂၀၁၄-၂၀၁၅ ပညာသင်နှစ်မှ စ၍ KG +5-4-3 ဖွဲ့စည်းပုံအရ သူငယ်တန်း (KG) နှင့် အတန်းစဉ် အလိုက် ပြုပြင် ပြောင်းလဲ ရေးဆွဲထားသည့် သင်ရိုးသစ် များဖြင့် လေ့ကျင့် သင်ကြားပေးပါက ၂၀၁၉-၂၀၂၀ ပညာသင်နှစ်တွင် အထက်တန်းဆင့်တွင် တစ်တန်းထပ်တိုး၍ Grade 12 ကို စတင် သင်ကြားပေးနိုင်မည်ဖြစ်ပါကြောင်း၊ ပညာသင် ကာလမှာ KG +12 နှစ် ဖြင့်ပေါင်း (၁၃)နှစ်ရှိမည် ဖြစ်ပြီး အခြေခံ ပညာသင်ကာလပြီးဆုံးသည့် ကျောင်းသား၊ ကျောင်းသူများသည် အသက်(၁၈)နှစ် ရင့်ကျက်သည့် အသက် အရွယ်တွင် အဆင့်မြင့်ပညာ တက္ကသိုလ်များသို့ တက်ရောက်နိုင်မည် ဖြစ်၍ နိုင်ငံတကာ စံနှုန်းများနှင့် ကိုက်ညီစေမည်ဟု ရှင်းလင်း ဖြေကြားခဲ့သည်။ ပြောင်းလဲမည့်စီမံချက်(မူကြမ်း) ကို ရေးဆွဲ လျက် ရှိပြီး နိုင်ငံတော်အစိုးရနှင့် လွှတ်တော်များသို့တင်ပြ၍ အတည် ပြုချက် ရယူနိုင်ရေးအတွက် စီစဉ်ဆောင်ရွက်လျက်ရှိသည်ဟု ဒုတိယ၀န်ကြီးက ဖြေကြားခဲ့သည်ဟု သိရသည်။
ကိုဟိန်း
Internet Journal

No comments:

Post a Comment

My Blog List