ရန်ကုန်ဆိပ်ကမ်းများတွင် အပြည်ပြည်ဆိုင်ရာ သင်္ဘောများ ၀င်ထွက်ဆိုက်ကပ်မှု အများဆုံး ဆိပ်ကမ်းအဖြစ် ဆူးလေဆိပ်ကမ်း ဦးဆောင်

ရန်ကုန်ဆိပ်ကမ်းများတွင် အပြည်ပြည်ဆိုင်ရာ သင်္ဘောများ ၀င်ထွက်ဆိုက်ကပ်မှု အများဆုံး ဆိပ်ကမ်း အဖြစ် ဆူးလေဆိပ်ကမ်းမှာ ၂၁ ရာခိုင်နှုန်းဖြင့် ဦးဆောင်လျက်ရှိကြောင်း မြန်မာ့ဆိပ်ကမ်း အာဏာပိုင်မှ ထုတ်ပြန်သော အချက်လက်များအရ သိရသည်။ ရန်ကုန်မြို့တွင် အပြည်ပြည်ဆိုင်ရာ သင်္ဘောများ ၀င်ထွက် ဆိုက်ကပ်နိုင်သည့် ဆိပ်ကမ်းရှစ်ခု ရှိသည့်အနက် ဆူးလေဆိပ်ကမ်းမှာ သင်္ဘောများ ဆိုက်ကပ်မှု ၂၁ ရာခိုင်နှုန်းဖြင့် ဦးဆောင်နေပြီး သင်္ဘောဆိုက်ကပ်မှု ၁၉ ရာခိုင်နှုန်းရှိသည့် အေးရှားဝေါလ်ဆိပ်ကမ်းမှာ ဒုတိယ သင်္ဘောဆိုက်ကပ်မှု အများဆုံး ဆိပ်ကမ်းဖြစ်ကြောင်း သိရသည်။

ရန်ကုန်မြို့ရှိ အခြားဆိပ်ကမ်းများသို့ သင်္ဘောဝင်ထွက် ဆိုက်ကပ်မှုမှာ MITT ဆိပ်ကမ်းတွင် ၁၅ ရာခိုင်နှုန်း၊ MIP ၁၄ ရာခိုင်နှုန်း၊ HPT ဆိပ်ကမ်းတွင် ၁၂ ရာခိုင်နှုန်း၊ ဗိုလ်အောင်ကျော် ဆိပ်ကမ်းတွင် ခုနစ်ရာခိုင်နှုန်း၊ HOB ဆိပ်ကမ်းတွင် ခြောက်ရာခိုင်နှုန်း၊ MIPL ဆိပ်ကမ်းတွင် ခြောက်ရာခိုင်နှုန်းတို့ ဖြစ်သည်။

မြန်မာနိုင်ငံရှိ ဆိပ်ကမ်းများသို့ ၂၀၁၃ ခုနှစ် ဇန်န၀ါရီလမှ ဇွန်လကုန်အထိ ခြောက်လတာ ကာလအတွင်း ၀င်ရောက်ဆိုက်ကပ်ခဲ့သည့် သင်္ဘောအစီးရေ ၁၂၀၀ ကျော်ရှိပြီး၊ အဆိုပါ သင်္ဘောများ၏ ရာခိုင်နှုန်း ၉၀ မှာ ရန်ကုန်ဆိပ်ကမ်းများသို့ ဆိုက်ကပ်ခဲ့ခြင်း ဖြစ်သည်။

ကျန်သည့် ၁၀ ရာခိုင်နှုန်းမှာ မြန်မာနိုင်ငံရှိ ဆိပ်ကမ်းမြို့များဖြစ်သော စစ်တွေ၊ ကျောက်ဖြူ၊ သံတွဲ၊ ပုသိမ်၊ မော်လမြိုင်၊ ထားဝယ်၊ မြိတ်နှင့်ကော့သောင်း စသည့်ဆိပ်ကမ်းများသို့ ဆိုက်ကပ်ခဲ့ခြင်း ဖြစ်သည်။

"မြန်မာနိုင်ငံကို အပြည်ပြည်ဆိုင်ရာ သင်္ဘောဝင်ထွက် ဆိုက်ကပ်မှု ရာခိုင်နှုန်း ၉၀ ခန့်က ရန်ကုန် ဆိပ်ကမ်းတွေ မှာ ဆိုက်ကပ်ခဲ့တာဖြစ်ပြီး နယ်မြို့တွေရဲ့ ဆိပ်ကမ်းတွေမှာ ၀င်ထွက်ဆိုက်ကပ်မှုက ၁၀ ရာခိုင်နှုန်းပဲ ရှိပါတယ်" ဟု မြန်မာ့ဆိပ်ကမ်း အာဏာပိုင်မှ တာဝန်ရှိသူ တစ်ဦးက ဆိုသည်။

ရန်ကုန်ဆိပ်ကမ်းသည် ထီးတန်းကမ်းနားဒေသမှ သံလျက်စွန်း ကမ်းနားဒေသအတွင်း နိုင်ငံတကာ သင်္ဘောများ ၀င်ထွက်ဆိုက်ကပ်နိုင်သည့် ဆိပ်ခံတံတား ၁၈ စင်း၊ တည်ဆောက်ဆဲ ဆိပ်ခံတံတား တစ်စင်း၊ ကုန်သေတ္တာစခန်း သုံးခုဖြင့် ဆိပ်ကမ်းလုပ်ငန်းများကို ဆောင်ရွက်နေခြင်း ဖြစ်သည်။

ရန်ကုန်ဆိပ်ကမ်း ဖွံ့ဖြိုးတိုးတက်ရေး စီမံချက်တွင် ပါဝင်သည့် ဆူးလေဆိပ်ကမ်း တံတား ၁၊ ၂၊ ၃၊ ၄ တို့အား ကုန်သေတ္တာနှင့် အထွေထွေကုန်စည်တင် အပြည်ပြည်ဆိုင်ရာ ရေယာဉ်ကြီးများ ဆိုက်ကပ်နိုင် သည့်ဆိပ်ကမ်းအဖြစ်အဆင့်မြှင့်ပြုပြင်တည်ဆောက်ခြင်း၊ကုန်ကိုင်တွယ်ကိရိယာများတပ်ဆင်ခြင်းနှင့် နောက် ခံမြေပေါ်တွင် ဆိပ်ကမ်းဆိုင်ရာ အဆောက်အုံများ တည်ဆောက်နိုင်ရန် လုပ်ငန်းတင်ဒါ ခေါ်ယူ ခဲ့ပြီး ဖြစ် သည်။

ယင်းသို့ ကုမ္ပဏီများအား တင်ဒါခေါ်ယူ ရွေးချယ်ခဲ့ရာ Myanmar Harmony Management ကုမ္ပဏီသည် လုပ်ငန်းအမြတ် ရရှိမှုပေါ်တွင် ခွဲဝေသည့်အချိုး (Equity Ratio) အား မြန်မာ့ဆိပ်ကမ်း အာဏာပိုင်သို့ ရာခိုင်နှုန်း ၇၀ အထိ ပေးအပ်ပြီး ဆူးလေဆိပ်ကမ်းအား အဆင့်မြှင့်တင်ရန် တင်ဒါရွေးချယ် ခံခဲ့ရသည်။ Myanmar Harmony Management ကုမ္ပဏီသည် ဆူးလေဆိပ်ကမ်းအား ရင်းနှီးမြှုပ်နှံမှု ပမာဏ ၉၅ ဒသမ ၁၈၉ မီလျံအထိ ရင်းနှီးမြှုပ်နှံမည်ဟု ပြောကြားသည်။