အဘခေတ်က ခရိုနီတွေကို အစ်မခေတ်မှာ ဘယ်လိုထိန်းမလဲ

စစ်အာဏာရှင်အဆက်ဆက် အုပ်ချုပ်ခံခဲ့ရသည့် မြန်မာနိုင်ငံတွင် ခရိုနီဟူသော လူတန်းစား တရပ်ပေါ်ပေါက်ခဲ့သည်။ အာဏာရှိသူများနှင့်ပူးပေါင်းကာစီးပွားရေးလုပ်ခဲ့ကြသည့် ခရိုနီများကြောင့် နိုင်ငံတော်အတွက် အမှန်တကယ်ရရှိမည့် အခွန်ငွေများ ဆုံးရှုံးနစ်နာခဲ့ရ သည်။ နှစ်ပေါင်းများစွာ အမြစ်တွယ် ခဲ့သည့် ခရိုနီအရင်းရှင်စနစ်(Crony Capitalism) လုံးဝအမြစ်ပျောက်သွားရန် NLD အစိုးရအနေဖြင့် အစွမ်းကုန် ကြိုးပမ်းရမည်ဖြစ်သည်။

ခရိုနီဆိုသည်မှာ ၁၈ ရာစုတွင် လန်ဒန်မြို့၌ စတင်သုံးစွဲခဲ့သော စကားလုံး ဖြစ်ပြီး Oxford English အဘိဓာန်၌ Long-term ဟု အဓိပ္ပာယ်ရသည့် မူရင်းဂရိဘာသာစကား Chronios မှ ဆင်းသက်လာသော ဝေါဟာရဖြစ် သည်။ နောင်တွင် ခရိုနီကိုရင်းနှီးသည့်မိတ်ဆွေ (Close Friend) (သို့မဟုတ်) အကျိုးတူ လုပ်ဖော်ကိုင်ဖက် (Companion)၊ မိတ်ဆွေဟောင်း (Old Friend) စသည့် အဓိပ္ပာယ်ဖြင့် သုံးစွဲခဲ့ကြသည်။

နိုင်ငံရေးဝေါဟာရ၌ ခရိုနီဟူသည် အုပ်ချုပ်သူလူတန်းစား (သို့မဟုတ်) အခွင့်အာဏာရှိသူကို ရင်းနှီး အောင်ပေါင်းပြီး လုပ်ကိုင်ခွင့်များရယူကာ ထိုအုပ်ချုပ်သူများနှင့် အကျိုးတူသော်လည်းကောင်း၊ အကျိုးအမြတ်ခွဲဝေ ပေး၍သော်လည်း လုပ်ကိုင်နေကြသည့် အရင်းရှင်စီးပွားရေးသမားများကို ခေါ်ဝေါ်သော ဝေါဟာရ ဖြစ်လာသည်။

ခရိုနီများသည် အထူးအခွန်ကင်းလွတ်ခွင့်များရရှိခြင်း၊ တရားမ၀င် ပါမစ်များ လက်သိပ်ထိုးချပေးမှုခံရခြင်း၊ နိုင်ငံပိုင်အဆောက်အအုံများအား ဈေးနှုန်း သက်သာစွာဖြင့် ငှားရမ်းအသုံးပြုခွင့်ရရှိခြင်းများကြောင့် တိုင်းပြည် အတွက် များစွာနစ်နာဆုံးရှုံးခဲ့ရသည်။ မြန်မာနိုင်ငံ၌ ခရိုနီများကို စနစ်တကျမွေး ထုတ်ခဲ့သူမှာ အငြိမ်းစားဗိုလ်ချုပ်မှူးကြီးသန်းရွှေဖြစ်ကြောင်း ကြံ့ခိုင်ရေး ပါတီပူးတွဲဥက္ကဋ္ဌ ဦးဌေးဦးက ၂၀၁၅ အထွေ ထွေရွေးကောက်ပွဲ အကြိုကာလများတွင် မီဒီယာများကို ပြောကြားခဲ့သည်။

ဦးသန်းရွှေ မွေးထုတ်ခဲ့သည့် ခရိုနီများအနက် ဦးတေဇ (Htoo)၊ ဦးဇော်ဇော် (Max)၊ ဦးအောင်ကိုဝင်း (ကမ္ဘောဇ)၊ ဇေကမ္ဘာ ဦးခင်ရွှေ၊ ဦးသိမ်းဝေ (ရိုးမနှင့် FMI) နှင့် ဦးဝင်းအောင် (UMFCCI ဥက္ကဋ္ဌ)တို့မှာ ထင်ရှားသူများ ဖြစ်ကြသည်။

အထက်ပါ ခရိုနီများ၏ အကြောင်းကို ပြည်သူအများစု သိရှိနိုင်စေရန် အနည်းငယ်တင်ပြလိုပါသည်။

ဦးတေဇသည် ၁၉၆၄ ခုနှစ် ဇူလိုင် ၁၈ ရက်တွင် မွေးဖွားခဲ့ပြီး ငယ်စဉ်က ရန်ကုန်မြို့ကမာရွတ်မြို့နယ်ရှိ TTC ခေါ် ဆရာအတတ်သင်ကျောင်း (နောင်အခါ ဆရာအတတ်သင်ကောလိပ်)၌ မူလတန်းမှ အထက်တန်းအထိ ပညာသင်ကြားခဲ့သည်။ ၁၀ တန်းစာမေးပွဲကို နှစ်ကြိမ်ဖြေဆိုခဲ့ရပြီးနောက် အောင်မြင်ခဲ့သည်။

၁၀တန်း အောင်မြင်ပြီးနောက် မေမြို့စစ်တက္ကသိုလ် အပတ်စဉ် (၂၇)သို့ တက်ရောက်ခဲ့သော်လည်းတတိယနှစ်အရောက်တွင် ကျောင်းမှထုတ်ပယ်ခြင်းခံခဲ့ရသည်။ န၀တ၊ နအဖ စစ်အစိုးရလက်ထက်၌ မြန်မာ-ထိုင်း နယ်စပ်နှင့် ဝေးလံသောနေရာများ၌သစ်ထုတ်လုပ်ခွင့်ရရှိ၍ လေလံဆွဲခဲ့ရာ အောင်မြင်သည်။ ယင်းနောက် န၀တ အစိုးရထံမှ ကျွန်းသစ်တလုံးလျှင် အမေရိကန်ဒေါ်လာ၁၀ ဒေါ်လာဖြင့်ဝယ်ယူပြီး ပြည်ပသို့တလုံးလျှင် ဒေါ်လာ ၅၀၀ ဖြင့် ဈေးမြှင့်တင်ရောင်းချကာ ချမ်းသာကြွယ်ဝလာခဲ့သည်။ ထို့နောက် စိုက်ပျိုးရေးလုပ်ငန်း၊ မွေးမြူရေးလုပ်ငန်း၊ သတ္တုတူးဖော်ရေး၊ ဆောက် လုပ်ရေး၊ ဘဏ်လုပ်ငန်းနှင့် လေကြောင်းလိုင်းတို့ကို လုပ်ကိုင်ခဲ့သည်။

ဦးတေဇ၏ ချမ်းသာကြွယ်ဝမှုကို တိတိ ကျကျ မသိရပေ။

ဗိုလ်ချုပ်မှူးကြီးသန်းရွှေ၏ အားပေးထောက်ခံမှုဖြင့် ကြွယ်ဝလာသူတဦးမှာ ဧရာဝတီတိုင်း ရေကြည်မြို့တွင် မွေးဖွားခဲ့သည့် ဦးဇော်ဇော်ဖြစ်သည်။ ၁၉၆၇ ခုနှစ် သြဂုတ်လ ၂၂ ရက်နေ့ မွေးဖွားခဲ့သည်။ ဦးဇော်ဇော်သည် မက်စ်မြန်မာကုမ္ပဏီအုပ်စုကိုတည်ထောင်၍ ကျောက်မျက်ရတနာလုပ်ငန်း၊ ရော်ဘာစိုက်ပျိုးရေးလုပ်ငန်း၊ ဆောက်လုပ်ရေးလုပ်ငန်းကြီးများကို လုပ်ပိုင်ခွင့်ရရှိခဲ့သည်။

ယခင်အစိုးရလက်ထက်တွင် ဘိလပ်မြေ ထုတ်လုပ်မှုလုပ်ငန်း၊ စက်မှုလုပ်ငန်း၊ ကားတင်သွင်းခွင့်လုပ်ငန်း၊ ဟိုတယ်လုပ်ငန်း၊ လောင်စာဆီ အရောင်းဆိုင်လုပ်ငန်းနှင့်ဘဏ်လုပ်ငန်းတို့ကို အောင်မြင်အောင်ဆောင်ရွက်နိုင်ခဲ့သည်။ ရန်ကုန်မြို့စစ်ရုံးကြီးနံဘေး (ယခင် နား၊ နှာခေါင်း၊ လည်ချောင်း ကုသရေးဆေးရုံ) နေရာ၌ Max Myanmar Group of Company ရုံးချုပ်တည်ထောင်ထားပြီး လစဉ် အမြတ်ငွေဒေါ်လာသန်း ၅၀၀ ခန့် ရရှိနေသည်။

ဆရာကျောင်းဟု လူသိများသော ကမ္ဘောဇဘဏ်ဥက္ကဋ္ဌဦးအောင်ကိုဝင်းသည် ဒုတိယဗိုလ်ချုပ်မှူးကြီးဟောင်း ဦးမောင်အေး၏ နေရာပေးမှုကြောင့် ကြွယ်ဝချမ်းသာလာသူဖြစ်ပြီး ဦးမောင်အေး၏ သမီးများကို စာသင်ကြား ပေးခဲ့ဖူးသူ ဖြစ်သည်။ ကျောက်စိမ်းတူးဖော်သည့်လုပ်ငန်းနှင့် ဘဏ်လုပ်ငန်းသည် ဦးအောင်ကိုဝင်း၏ အဓိက စီးပွားရေးလုပ်ငန်းများဖြစ်ပြီး ကမ္ဘောဇဘဏ်အဆောက်အအုံများ၌ ဦးအောင်ကိုဝင်းနှင့်ယခင်အစိုးရအဖွဲ့အကြီးအကဲများ ကျောက်စိမ်းတုံးကြီးများကို ကြည့်ရှုနေသည့် ဓာတ်ပုံများကို ချိတ်ဆွဲထားသည်။

ကမ္ဘောဇဘဏ်လီမိတက်သည် မြန်မာနိုင်ငံတွင် ဘဏ်ခွဲအများဆုံးဖွင့်လှစ် ထားပြီး ၂၀၁၁-၂၀၁၂ ခုနှစ် ဘဏ္ဍာနှစ်မှ ၂၀၁၄-၂၀၁၅ ဘဏ္ဍာနှစ်အထိ လေးနှစ်ဆက်တိုက် ၀င်ငွေခွန်အများဆုံးပေးဆောင်သူ ပထမ နေရာ၌ရပ် တည်လျက်ရှိနေသည်။ ပြည်သူများအကြားစိတ်ဝင်စားသည့် နောက်ထပ် ခရိုနီတဦးမှာ ဇေကမ္ဘာဦးခင်ရွှေဖြစ်သည်။

ဦးခင်ရွှေသည် မော်လမြိုင်မြို့ဇာတိဖြစ်ပြီး ဆောက်လုပ်ရေးလုပ်ငန်းများ လုပ်ကိုင်ခြင်းဖြင့် ချမ်းသာကြွယ်ဝလာသူ ဖြစ်သည်။ ဟိုတယ်လုပ်ငန်း၊ ဆောက်လုပ်ရေးလုပ်ငန်းနှင့် အိမ်ရာတည် ဆောက်ရေးလုပ်ငန်းများမှ အဓိက၀င်ငွေရရှိနေပြီး နှစ်စဉ်သိန်းပေါင်းများစွာ အလှူအတန်းပြုလုပ်ခြင်း ဖြင့် နာမည်ကောင်းရရှိရန် ဆောင်ရွက်နေသူဖြစ်သည်။

ဗိုလ်ချုပ်ကြီးဟောင်း သူရဦးရွှေမန်း၏ခမည်းခမတ်တော်စပ်နေခြင်းကလည်း ဦးခင်ရွှေ၏အရှိန်အ၀ါကို ပိုမိုကြီးမားလာစေခဲ့သည်။

၁၉၉၃ ခုနှစ်တွင် ရိုးမဘဏ်ကို စတင်တည်ထောင်ခဲ့သည့် ဦးသိမ်းဝေ (ခ) မစ္စတာဆာ့ခ်ျပန်းသည် လှိုင်သာယာမြို့နယ်တွင် ၄၆၅ ဧကကျယ်ဝန်းသည့် FMI City၊ မြေဧက ၆၅၀ ပေါ်တွင် ပန်းလှိုင် ဂေါက်ကွင်းနှင့် အိမ်ရာ၊ သန်လျင်မြို့ပေါ်ရှိ မြေဧက ၁၃၅ ဧကပေါ်၌ ကြယ်စင်အိမ်ရာတို့ကို လုပ်ကိုင်ခဲ့သူ ဖြစ်သည်။

ဦးသိမ်းဝေသည် ၂၀၁၅ ခုနှစ် ဇွန်လ ၃၀ ရက်တွင် ရန်ကုန်မြို့ ဗိုလ်ချုပ် အောင်ဆန်းလမ်းနှင့် လမ်း ၃၀ အနီးတွင် KFC ကြက်ကြော်ဆိုင်ကို မြန်မာ နိုင်ငံ၌ ပထမဦးဆုံးဖွင့်လှစ်ခဲ့ခြင်းဖြင့် စားသောက်ကုန်လုပ်ငန်းများအထိ စီးပွားရေးဈေးကွက် ချဲ့ထွင်လာခဲ့သည်။ ၂၀၁၃ ခုနှစ် သြဂုတ်လစာရင်းအရ စင်ကာပူနိုင်ငံ၏ အကြွယ်ဝဆုံး သန်းကြွယ်သူဌေး ၅၀ စာရင်းတွင် သူသည် အဆင့် ၃၈ ချိတ်ခဲ့သူဖြစ်သည်။

မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် (UMFCCI) ၏ သက်တော်ရှည်ဥက္ကဋ္ဌကြီးဖြစ်သော ဦးဝင်းအောင်သည် ဒဂုံအင်တာနေရှင်နယ်ကုမ္ပဏီကိုတည်ထောင်ထားပြီး ဆောက်လုပ်ရေးလုပ် ငန်းအပါအ၀င် အခြားစီးပွားရေးလုပ်ငန်း အမြောက်အမြားကို လုပ်ကိုင် ဆောင်ရွက်နေသူ ဖြစ်သည်။ ယခုလက်ရှိ ရန်ကုန်မြို့သူနာပြုတက္ကသိုလ် ရှေ့ရှိ မြေကွက်လပ်၌ IBTC ကုမ္ပဏီဥက္ကဋ္ဌ ဦးအောင်မိုးကျော်နှင့်ပူးပေါင်းကာ ပုဂ္ဂလိက ဆေးရုံတရုံတည်ဆောက်ရန် စီစဉ်နေပြီး ဆရာဝန်အချို့၏ ကန့်ကွက်မှုနှင့် ရင်ဆိုင်နေရကြောင်း သိရသည်။

စစ်အစိုးရလက်ထက်တွင် ဗိုလ်ချုပ်ကြီးများကို အဘခေါ်၍ လုပ်ငန်းလုပ်ပိုင် ခွင့်များစွာရရှိခဲ့ကြသည့် ခရိုနီများ သည် ဒေါ်အောင်ဆန်းစုကြည်ကို အစ်မ ခေါ်၍ ချဉ်းကပ်မှုများပြုလုပ်လာနိုင်သည်ကို NLD တာဝန်ရှိသူများ အထူးသတိချပ်ရမည် ဖြစ်သည်။

''အဓိကကတော့ တရားဥပဒေစိုးမိုးအောင် တင်ဒါခေါ်တာတွေကို ပွင့်လင်းမြင်သာမှုရှိအောင် လုပ်ရမှာပေါ့။ တရားဥပဒေအမှန်တကယ် စိုးမိုးရင် လာဘ်ပေးလာဘ်ယူမှုလည်းရှိတော့မှာမဟုတ်ဘူး။ အခုလည်း ဒေါ်အောင်ဆန်းစုကြည်ကိုယ်တိုင်လက်ဆောင်ပစ္စည်းလက်ခံခြင်းနဲ့ပတ်သက်တဲ့ ညွှန်ကြားချက်ထုတ်ထားတယ်လေ။

တဆင့်ချင်းဆောင်ရွက်သွားမယ်လို့ မျှော်လင့်ပါတယ်''ဟု ၁၉၉၀ ပြည့်နှစ် ရွေးကောက်ပွဲအနိုင်ရလွှတ် တော်ကိုယ်စားလှယ်ဦးစောနိုင်းနိုင်းက ပြောသည်။

အစိုးရအဖွဲ့ဝင်များနှင့်ဌာနဆိုင်ရာလူကြီးများအားအဘဟုခေါ်ဝေါ်သုံးနှုန်းခြင်းမနှစ်သက်သည့် ဒေါ်အောင်ဆန်းစုကြည်ဦးဆောင်သော NLD အစိုးရ သစ်သည် အဘအစားအစ်မဟုပြောင်းလဲခေါ်ဆိုကာ ချဉ်းကပ်မှုများပြု လုပ်လာမည့် ခရိုနီများနှင့်၎င်းတို့၏ အပေါင်းအပါများကို မည်ကဲ့သို့ ဆက်ဆံမည်ကို ပြည်သူလူထုအနေဖြင့် စိတ်ဝင်တစားစောင့်ကြည့်လျက် ရှိသည်။

နန္ဒမျိုးဆောင်

News Watch(စောင့်ကြည့်သတင်းဂျာနယ်)