ချင်းပြည်နယ် အစိုးရနှင့် လွှတ်တော်ပိုင်းဆိုင်ရာ သတင်းများ ရေးသားဖော်ပြရာတွင် မီဒီယာအချို့က ဘက်လိုက် ရေးသားခြင်း၊ လိုရာဆွဲ၍ ရေးသားမှုများရှိကြောင်း ချင်းပြည်နယ် လွှတ်တော်ဥက္ကဋ္ဌ ဦးဟောက်ခင်းခမ်က ပြောကြား သည်။ ချင်းပြည်နယ် ဟားခါးမြို့ ချင်းခရစ်ယာန် ကောလိပ်တွင် မေလ ၂၁ ရက်နေ့က ကျင်းပသည့် တတိယ အကြိမ်မြောက် ချင်းလူမျိုး သတင်းထောက်များ တွေ့ဆုံပွဲတွင် ၎င်းကပြောကြားခြင်း ဖြစ်သည်။
ပြည်နယ် လွှတ်တော်သက်တမ်း သုံးနှစ်ကျော် ကာလအတွင်း မီဒီယာများနှင့် တွေ့ဆုံမှု အားနည်းခဲ့သည်ကို အခွင့်အရေး ယူ၍ သတင်းထောက်များ အနေနှင့် ဘက်လိုက် ရေးသားခြင်းမျိုး မလုပ်သင့်ကြောင်း ၎င်းကပြောဆိုသည်။
ချင်းပြည်နယ် လွှတ်တော်အနေနှင့် မီဒီယာသမားများအား ကြိုဆိုကြောင်း၊ ချင်းပြည်နယ် အစိုးရနှင့် ချင်းပြည်နယ် လွှတ်တော်၏ လုပ်ငန်းဆောင်တာများအား ပြည်သူများ မှန်မှန်ကန်ကန်သိရန် တင်ပြဖို့ လိုကြောင်း ဦးဟောက်ခင်းခမ်က ဆက်လက်ပြောဆိုသည်။
အစိုးရပိုင်းဆိုင်ရာ မေးမြန်းခွင့် မရခင် အချိန်က သတင်းထောက်များ အနေနှင့် ပြည်သူများ၏ ပြောစကားများကိုသာ ရေးသားခဲ့ရခြင်း ဖြစ်နိုင်ကြောင်း၊ လွှတ်တော်ဥက္ကဋ္ဌ အနေနှင့် မီဒီယာများ၏ ရေးသားဖေါ်ပြမှုနှင့် ပတ်သက်၍ မကျေလည်မှုများ ရှိခဲ့သောကြောင့် ယခုကဲ့သို့ ပြောဆိုခြင်း ဖြစ်နိုင်ကြောင်း မြန်မာ ဂျာနယ်လစ် ကွန်ရက် အတွင်းရေးမှူး ဦးမြင့်ကျော်က မှတ်ချက်ပြုသည်။
“သူ့အနေနဲ့ မီဒီယာတွေလို့ မပြောဘဲ ဘယ်မီဒီယာက ဘယ်တုန်းက ဘယ်လိုရေးခဲ့၊ မှားခဲ့တယ် ဆိုတာကို ထောက်ပြသင့်တယ်” ဟု ၎င်းကပြောဆိုသည်။
တိုင်းရင်းသား သတင်းထောက်များ ရေးသားသော သတင်းများ အရည်အသွေး မညံ့စေရန်၊ လွဲမှား ရေးသားမှုများ မရှိစေရန် သတင်းစာပညာ သင်တန်းများ ပေးနေကြောင်း Burma News International (BNI) အတွင်းရေးမှူး ဦးခင်မောင်ရွှေက ပြောကြားသည်။
အစိုးရဌာန တာဝန်ရှိသူများ အနေနှင့် သတင်းနှင့် ပတ်သက်၍ အချိန်မရွေး မေးမြန်းနိုင်ပါသည်ဟု ဆိုသော်လည်း ချင်းပြည်နယ်တွင် အမြဲမနေနိုင်ဘဲ ရန်ကုန်မှတစ်ဆင့် ဖုန်းဖြင့် ဆက်သွယ် မေးမြန်းရသည် ဖြစ်၍ မေးမြန်းချိန်တွင် အစည်းအဝေး လုပ်နေသဖြင့် ဆက်သွယ် မရသည်များ ရှိကြောင်း၊ သတင်းတစ်ပုဒ်အတွက် သုံးလေးရက်မျှ စောင့်ရသည်လည်း ရှိကြောင်း ရန်ကုန်အခြေစိုက် Chin World ဂျာနယ်မှ သတင်းထောက် ဦးကျော်မိုးက ပြောဆိုသည်။
တတိယအကြိမ်မြောက် ချင်းလူမျိုး သတင်းထောက်များ တွေ့ဆုံပွဲကို မေလ ၂၇ ထိ ဟားခါးမြို့ ချင်းခရစ်ယာန် ကောလိပ်တွင် ကျင်းပမည် ဖြစ်သည်။
The Voice Weekly
No comments:
Post a Comment