အမေရိကန်အစိုးရက မြန်မာအပေါ် စီးပွားရေးအရ ပိတ်ဆို့ထားတာကို နောက်ထပ်သက်တမ်း ၁ နှစ် ထပ်တိုးလိုက်တယ်ဆိုပေမယ့်လည်း မြန်မာ-အမေရိကန် စီးပွားရေးဆက်ဆံမှုအပေါ် ထိခိုက်မှု မရှိနိုင်တဲ့ အကြောင်း ကုန်သည်အသင်းချုပ်ရုံး(UMFCCI) က ဒုတိယဥက္ကဋ္ဌက ပြောဆိုလိုက်ပါတယ်။
အမေရိကန်သမ္မတ အိုဘားမားက အမေရိကန်ကုမ္ပဏီတွေ မြန်မာစစ်တပ်နဲ့တွဲပြီး စီးပွားရေးအရ ရင်းနှီးမြှုပ်နှံတဲ့အပေါ် ပိတ်ပင်ထားရှိတဲ့ အရေးယူဒဏ်ခတ်မှုကို နောက်ထပ် ၁ နှစ်သက်တမ်း ထပ်တိုးဖို့ အတွက် အမိန့်ထုတ်ပြန်လိုက်တာပါ။
ဒါကြောင့် အမေရိကန်အစိုးရက သက်တမ်းတိုးလိုက်တဲ့အပေါ် မြန်မာ-အမေရိကန် စီးပွားရေး ဆက်ဆံမှု အခြေအနေနဲ့ပတ်သက်လို့ UMFCCI ဒု-ဥက္ကဋ္ဌ ဒေါက်တာမောင်မောင်လေးက ဒီဗွီဘီကို အခုလိုပြော ပါတယ်။
“အထူးအထွေတော့ သက်ရောက်မှုမရှိပါဘူး။ ဒီဥစ္စာက အရင်ဟာကို သက်တမ်းတိုးလိုက်တဲ့ဟာပါ။ အန်ကယ်တို့က ဟိုးအောက်အထိရောက်ပြီးနေပြီပဲ။ အခု ရှေ့ဆက်တက်ဖို့ပဲ လိုပါတယ်။ သိနေတဲ့ ကုမ္ပဏီတွေ၊ သိနေတဲ့ လုပ်ငန်းရှင်တွေက ဘာမှပြဿ နာ မရှိပါဘူး။ မသိသေးတဲ့ လူတွေကသာ ဇဝေဇ၀ါ ဖြစ်တာပါ။ အခုက အမေရိကန်စီးပွားရေးသမားတွေလည်း လာနေပြီလေ။ ရှေ့ဆက်တိုးတက်ဖို့ပဲ ရှိပါတယ်။ သိပ်ပြီး အနှောင့်အယှက်တော့ မရှိပါဘူး။”
ဒီ့ပြင် လာမယ့် စက်တင်ဘာလမှာလည်း အမေရိကန်နိုင်ငံ နယူးယောက်မြို့မှာ စီးပွားရေးဆိုင်ရာ တွေ့ဆုံ ဆွေးနွေးပွဲကို အမေရိကန်ကုမ္ပဏီတွေနဲ့ UMFCCI ပူးပေါင်းပြီး လုပ်ဆောင်သွားဖို့ ရှိတဲ့အပြင် အခြား ပူးပေါင်းဆောင်ရွက်မှုတွေလည်းရှိလို့ မြန်မာ-အမေရိကန်စီးပွားရေး ဆက်ဆံမှုကို နှောင့်နှေးမှု မရှိနိုင်ဘူးလို့ ဒေါက်တာမောင်မောင်လေးက ဆက်လက်ပြောပါတယ်။
အမေရိကန်အစိုးရက စီးပွားရေးပိတ်ဆို့မှုကို သက်တမ်းထပ်တိုးလိုက်တဲ့အတွက် ကုန်သွယ်မှုဆိုင်ရာ အထူးအခွင့်အရေး GSP ကို မြန်မာရရှိဖို့ အလှမ်းဝေးသွားနိုင်တယ်လို့ ယူဆကြောင်း မြန်မာနိုင်ငံ ငါးလုပ်ငန်းအဖွဲ့ချုပ် အထွေထွေအတွင်းရေးမှူး ဦးဝင်းကြိုင်က ဒီဗွီဘီကို ပြောပါတယ်။
“သက်တမ်းတိုးလိုက်ခြင်းအားဖြင့် GSP လို အခွင့်အရေးမျိုးကို ပေးချင်မှ ပေးတော့မယ်ဆိုတဲ့ သဘော သက်ရောက်သွားတာပေါ့။ အဲဒါဆိုရင် ကျနော်တို့အတွက် ရသင့်ရထိုက်တဲ့ အခွင့်အရေးတခုက နစ်နာနေ တယ်။ ဒါက ရေထွက်ပစ္စည်းများ အမေရိကန်ပြည်ထောင်စုနဲ့ ကုန်သွယ်မှုမှာ အဟန့်အတားဖြစ်မယ့် ကိစ္စလို့ ကျနော်မြင်တယ်။ တခုက မြန်မာ့ဘဏ်တွေထဲကို အမေရိကန် ဘဏ်တွေက တိုက်ရိုက်ငွေလွှဲခွင့် မရသေး တာပေါ့။ အဲဒါလည်း သက်တမ်းတိုးတဲ့အတွက်ကြောင့် ထပ်ပြီးတော့ ရချင်မှ ရတော့မယ်။ သက်တမ်း ထပ်တိုးတဲ့အထဲမှာ ဒါတွေ ပါသွားနိုင်တယ်ပေါ့။”
အမေရိကန်အစိုးရက မြန်မာနိုင်ငံအပေါ် ၂၀၀၃ ခုနှစ်မှာ တကြိမ်၊၂၀၀၇ ခုနှစ်မှာ တကြိမ်၊ ၂၀၀၈ ခုနှစ်မှာ တကြိမ်၊ ၂၀၁၃ ခုနှစ်မှာ တကြိမ် သက်တမ်းတိုးခဲ့ပြီး ဖြစ်ပါတယ်။
DVB
No comments:
Post a Comment