မြန်မာနိုင်ငံအပါအဝင် တရုတ်နဲ့ တခြားအာရှနိုင်ငံတွေမှာ ဒီမိုကရေစီနဲ့ လူ့အခွင့်အရေး အခြေအနေတွေကို မြှင့်တင်ကြဖို့ အမေရိကန် နိုင်ငံခြားရေးဝန်ကြီး ဂျွန်ကယ်ရီက တိုက်တွန်းတောင်းဆိုခဲ့ပြီး ဒီကိစ္စဟာ အမေရိကန် ရဲ့ နံပါတ်တစ် ဦးစားပေးကိစ္စဖြစ်ကြောင်း ပြောကြားခဲ့ပါတယ်။
အမေရိကန်အစိုးရရဲ့ အာရှဦးစားပေး အစီအစဉ်တစ်ရပ်အနေနဲ့ အာဖဂန်နစ္စတန်၊ ဩစတြေးလျ၊ မြန်မာနဲ့ ဆော်လမွန်ကျွန်းစုတွေကို သွားရောက်ခဲ့ပြီး၊ ဟာဝိုင်ယီမှာ ရပ်နားစဉ်အတွင်း ပြောကြားခဲ့တာပါ။
မြန်မာအပါအ၀င် အရှေ့တောင်အာရှဒေသတွင်း လူ့အခွင့်အရေး မြှင့်တင်ရေးအတွက် အမေရိကန် ပြည်ထောင်စုက မရပ်မနားကြိုးပမ်းသွားမှာပါ။ မြန်မာဆိုရင် အံ့သြလောက်တဲ့အပြောင်းအလဲတွေ ပေါ်ပေါက်ခဲ့ပေမဲ့၊ ဒီမိုကရေစီ ပြည့်ပြည့်ဝဝဖြစ်ဖို့ကတော့ သွားရမယ့်ခရီးဝေးလှပါသေးတယ်၊ အမေရိကန်ဟာလည်း အာရှပစိဖိတ်ဒေသက နိုင်ငံတစ်နိုင်ငံဖြစ်ပါတယ်။ အမေရိကရဲ့ လုံခြုံရေးနဲ့ အကျိုးစီးပွားဟာ အာရှ-ပစိဖိတ်ဒေသနဲ့ နီးနီးကပ်ကပ် ဆက်စပ်နေပါတယ် လို့ မစ္စတာ ဂျွန်ကယ်ရီက ဟာဝိုင်ယီကျွန်း ဟိုနိုလူလူ က East West Center မှာ ပြောကြားခဲ့တာပါ။
အာရှဒေသမှာ ဒီမိုကရေစီ၊ လူ့အခွင့်အရေး အခြေအနေတွေ တိုးတက်လာ တဲ့နေရာတွေ ရှိသလို၊ ဒီမိုကရေစီ နောက်ပြန်ဆုတ်သွားခဲ့တဲ့ နေရာတွေ လည်းရှိကြောင်း၊ အမေရိကန်ရဲ့ မိတ်ဆွေနိုင်ငံဖြစ်တဲ့ ထိုင်းနိုင်ငံဆိုရင် စစ်တပ်အာဏာသိမ်းမှုတွေနဲ့အတူ ဒီမိုကရေစီ နောက်ပြန်ဆုတ်သွားတဲ့အတွက် စိတ်ပူပန် ရကြောင်း ပြောကြားခဲ့ပါတယ်။
RFA Burmese
No comments:
Post a Comment