ပြည်ထောင်စုရွေးကောက်ပွဲကော်မရှင်က ထုတ်ပြန်ထားသည့် စာသင်ကျောင်းများတွင် နိုင်ငံရေးပါတီ များ၏ လှုပ်ရှားမှုကို ခွင့်မပြုဆိုသည့် စာကို တက္ကသိုလ်မှ ပါမောက္ခတစ်ဦးက လာရောက် ဝေငှခဲ့သည်။
ဒဂုံတက္ကသိုလ်ကျောင်းသားများသမဂ္ဂက ဦးဆောင်ကျင်းပသည့် လွှတ်တော် အတွေ့အကြုံရှင်းလင်းပွဲတွင် အောက်လွှတ်တော်အမတ် ဦးဖြိုးဇေယျာသော်နှင့် အထက်လွှတ်တော်အမတ် ဦးသိန်းဆွေတို့ သြဂုတ် ၁၁ ရက်က ရှင်းလင်းနေစဉ် အဆိုပါအကြောင်းကြားစာကို ဖြန့်ဝေခဲ့ခြင်း ဖြစ်သည်။
စာရွက်များကို “ဆရာကြီးတွေ လာပေးသွားတာ” ဟု အင်န်အယ်လ်ဒီပါတီမှ ပြည်သူ့လွှတ်တော်အမတ် ဦးဖြိုးဇေယျာသော်က ဆိုသည်။
၎င်း၏ ပြောဆိုချက်အရ အဆိုပါ ညွှန်ကြားလွှာ စာရွက်မှာ ၂၀၁၂ ခုနှစ်က ထုတ်ခဲ့သည့်စာဖြစ်ပြီး ထပ်မံထုတ်ပြန်တော့မည့် ရွေးကောက်ပွဲ ဥပဒေများကြောင့် အဆိုပါ ဥပဒေမှာ ပယ်ဖျက်ပြီးသားဖြစ် သည်ဟု ဆိုသည်။
“ဒီညွှန်ကြားချက်နဲ့တော့ ကျောင်းသူ၊ ကျောင်းသားတွေကို မပိတ်ပင်စေချင်ဘူး”ဟု ဦးဖြိုးဇေယျာသော်က ဆိုသည်။
လွှတ်တော်အမတ်နှစ်ဦးကို ဒဂုံတက္ကသိုလ်ကျောင်းသားသမဂ္ဂက အတွေ့အကြုံများ ရှင်းလင်းရန် တက္ကသိုလ် ပါမောက္ခချုပ်၏ ခွင့်ပြုချက်ဖြင့် ဖိတ်ကြားခဲ့ခြင်းဖြစ်သည်။
ဖြန့်ဝေခဲ့သည့် အကြောင်းကြားစာကို လာရောက်ဖြန့်ဝေခဲ့သူမှာ သင်္ချာဌာနမှ ပါမောက္ခ ဦးသိန်းအောင် က ဖြစ်သည်ဟု ဒဂုံတက္ကသိုလ်ကျောင်းသားများသမဂ္ဂ ဥက္ကဋ္ဌ၊ သင်္ချာဘာသာ ဒုတိယနှစ်မှ ကိုမင်းသုခက မဇ္ဈိမကို ပြောသည်။
“ပါမောက္ခချုပ်က ခွင့်ပြုပြီးခါမှ အထက်က ဖိအားပေးလို့ထင်တယ်။ မေဂျာပါမောက္ခက တားတယ်။ ကျွန်တော်တို့ကလည်း မှန်တာကို လုပ်တာပဲလေ”ဟု ကိုမင်းသုခက ပြောသည်။
နိုင်ငံရေးပါတီများအနေဖြင့် လှုပ်ရှားခွင့်မပြုကြောင်း ညွှန်ကြားထားသည့် ပြည်ထောင်စုရွေးကောက် ပွဲကော်မရှင်၏ အကြောင်းကြားစာမှာ ၂၀၁၂ခုနှစ် သြဂုတ် ၂၉ရက်စွဲဖြင့် နိုင်ငံရေးပါတီအားလုံးထံ ပေးပို့ထားသလို ပညာရေး ၀န်ကြီးဌာနကိုလည်း ဖြန့်ဝေထားသည်။
အကြောင်းကြားစာတွင် နိုင်ငံရေးပါတီတစ်ရပ်ရပ်က စာသင်ကျောင်းများတွင် ဦးဆောင်လှုပ်ရှားမှုပြုခြင်း မှာ စည်းရုံးလှုပ်ရှားသည့်သဘော သက်ရောက်နေသဖြင့် ကျောင်းသားများ စိတ်ဝမ်းကွဲပြီး ပညာ သင်ကြားမှုကို အနှောက် အယှက်ဖြစ်စေနိုင်သည်ဟု ရေးသားထားသည်။
Mizzima - News in Burmese
No comments:
Post a Comment