လက်ရှိအစိုးရသက်တမ်းအတွင်း ၂၀၁၂ ခုနှစ်မှစ၍ ယနေ့အချိန်အထိ မြန်မာနိုင်ငံတွင်းနိုင်ငံခြား ဝင်ရောက် ရင်းနှီးမြှုပ်နှံမှု တန်ဖိုး အမေရိကန် ဒေါ်လာ ၁၇ ဘီလီယံနီးပါး ရှိပြီဖြစ်ကြောင်း သိရသည်။ “၂၀၁၄-၂၀၁၅ ဘဏ္ဍာရေးနှစ်ကုန် အထိ ၀င်ထားတာက ၁၄.၃၁၃ ဘီလီယံပါ။ ဒီနှစ်က အခု ၂.၆ ဘီလီယံ ၀င်ထားတယ် ဆိုတော့ အားလုံး ၁၆.၉ ဘီလီယံပါ”ဟု ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှု ဦးစီးဌာန ညွှန်ကြားရေး မှူးချုပ် ဦးအောင်နိုင်ဦးက သြဂုတ်လ ၂၆ ရက်တွင် မီဒီယာများနှင့် တွေ့ဆုံစဉ် ပြောဆိုခြင်း ဖြစ်သည်။
ယခင်က မြန်မာနိုင်ငံသို့ ၀င်ရောက်ကြသည့် ရင်နှီးမြှုပ်နှံမှုများ၌ သဘာဝသယံဇာတကို အခြေခံသည့် ရင်းနှီးမြှုပ်နှံမှုများသာ များခဲ့ပြီး ယခုအစိုးရလက်ထက် စီးပွားရေးတံခါးများ ဖွင့်လှစ်ပြီးနောက်ပိုင်းမှသာ အခြားသော ကဏ္ဍများ၌ ရင်းနှီးမြှုပ်နှံမှုများ တိုးလာခဲ့ခြင်း ဖြစ် ကြောင်း ရင်းနှီးမြှုပ်နှံမှု မှတ်တမ်းများအရ သိရသည်။
ယခု အစိုးရသက်တမ်း ၄ နှစ်ခွဲကျော် ကာလအတွင်း ၀င်ရောက်သည့် နိုင်ငံခြား ရင်းနှီးမြှုပ်နှံမှု အားလုံးတွင် လျှပ်စစ်ကဏ္ဍ၌ ၃၃ ရာခိုင်နှုန်းဖြင့် အများဆုံး ၀င်ရောက်မြှုပ်နှံကြပြီး ကုန်ထုတ်လုပ်မှု ကဏ္ဍတွင် ၂၁ ရာခိုင် နှုန်းနှင့် ရေနံနှင့်သဘာဝဓာတ်ငွေ့ ကဏ္ဍတွင် ၂၀ ရာခိုင်နှုန်း၊ ဆက်သွယ်ရေး ကဏ္ဍတွင် ၁၁ ရာခိုင်နှုန်းနှင့် ဟိုတယ်ခရီးသွား လုပ်ငန်းတွင် ၅ ရာခိုင်နှုန်း ၀င်ရောက်မြှုပ်နှံထားကြကြောင်း ရင်းနှီးမြှုပ်နှံမှု မှတ်တမ်းများ တွင် ဖော်ပြထားသည်။
ရေနံနှင့်သဘာဝဓာတ်ငွေ့ ကဏ္ဍသို့ ၀င်ရောက်မှုအနေဖြင့် ကုန်ထုတ်လုပ်မှု ကဏ္ဍသို့ ၀င်ရောက်မှုနှင့် မတိမ်းမယိမ်း ကပ်လိုက်နေခြင်း သည် ပြီးခဲ့သည့် နှစ်များအတွင်းက ပြည်တွင်းရှိ ကမ်းလွန်နှင့် ကုန်းတွင်း လုပ်ကွက်များကို ယခုအစိုးရက နိုင်ငံတကာ ကုမ္ပဏီများ သို့ လုပ်ကိုင်ခွင့်ပြုခဲ့ရာမှ ပိုမိုများပြားလာခြင်း ဖြစ်ကြောင်း သိရသည်။
နိုင်ငံခြား ဝင်ရောက်ရင်းနှီးမြှုပ်နှံမှုတန်ဖိုး အမေရိကန် ဒေါ်လာ ၁၇ ဘီလီယံ နီးပါးတွင် ယခင်စစ်အစိုးရ လက်ထက်ကတည်းက သဘော တူထားသည့် ဒေါ်လာ ၄.၃ ဘီလီယံ တန်ဖိုးရင်းနှီးမြှုပ်နှံသည့် ချီဗွေငယ် ရေအားလျှပ်စစ် စီမံကိန်းလည်း အပါအ၀င် ဖြစ် သည်ဟု ဦးအောင်နိုင်ဦးက ပြောသည်။
ထိုစီမံကိန်းအား ယခုအစိုးရ လက်ထက်မှသာ ခွင့်ပြုပေးခဲ့ခြင်း ဖြစ်ကြောင်းနှင့် ထိုတန်ဖိုး ပမာဏကို ထည့်သွင်းမတွက်ပါက ရင်းနှီးမြှပ်နှံမှု တန်ဖိုးသည် ၁၂ ဘီလီယံကျော်ဖြစ်ကြောင်း သိရသည်။
ယခုအစိုးရ လက်ထက် နိုင်ငံတကာနှင့် စီးပွားရေး တံခါးဖွင့်စနစ် ကျင့်သုံးလာသည့် အချိန်တွင် အခြား သော ကဏ္ဍများ၌ ရင်းနှီးမြှုပ်နှံမှုများ တိုးလာခဲ့ခြင်း ဖြစ်သည်။ ကုန်ထုတ်လုပ်မှုကဏ္ဍနှင့် ဆက်သွယ်ရေး ကဏ္ဍသို့ ရင်းနှီးမြှုပ်နှံမှု ၀င်ရောက်မှုသည် ယခုအစိုးရ သက်တမ်း ၄ နှစ်ခွဲကျော် ကာလအတွင်း တိုးတက်မှု အများဆုံးလည်း ဖြစ်သည်။
လက်ရှိ မြန်မာနိုင်ငံသို့ ၀င်ရောက်ထားသည့် နိုင်ငံခြားရင်းနှီးမြှုပ်နှံမှုငွေပမာဏ စုစုပေါင်းသည် အမေရိကန် ဒေါ်လာ ၅၆ ဘီလီယံကျော်ဖြစ်ကြောင်း ရင်းနှီးမြှုပ်နှံမှုနှင့်ကုမ္ပဏီများ ညွှန်ကြားမှု ဦးစီးဌာနက ထုတ်ပြန် သည်။
“အရင်ကဆို ၀င်သမျှ နိုင်ငံခြား ရင်းနှီးမြှုပ်နှံမှုတွေရဲ့ ၄၀ ရာခိုင်နှုန်းလောက် က လျှစ်စစ်ကဏ္ဍ၊ ၃၇ ရာ ခိုင်နှုန်းလောက်က စွမ်းအင်နဲ့ သဘာဝဓာတ်ငွေ့၊ ၈ ရာခိုင်နှုန်းက သတ္တုတူးဖော်ရေးတွေမှာပေါ့။ ခြုံပြော ရရင် အားလုံးရဲ့ ၈၅ ရာခိုင်နှုန်းလောက်ဟာ သဘာဝ သယံဇာတ အခြေခံ ရင်းနှီးမြှုပ်နှံမှုတွေမှာ များခဲ့ တယ်။ ကုန်ထုတ်လုပ်မှုလို ကဏ္ဍမျိုးမှာ ၀င်ရောက်မှု အခြေအနေက ၅ ရာခိုင်နှုန်း လောက်ပဲ ရှိတယ်။ တော်တော်လေးကို နည်းခဲ့ပါတယ်”ဟု စစ်အစိုးရ လက်ထက် ရင်းနှီးမြှုပ်နှံမှု အခြေအနေနှင့် ပတ်သက်ပြီး ဦးအောင်နိုင်ဦးက နှိုင်းယှဉ် ပြောဆိုသည်။
ယခုနှစ်အတွက် နိုင်ငံခြားရင်းနှီးမြှုပ်နှံမှု ၀င်ရောက်မှုကို အစိုးရက ဒေါ်လာ ၆ ဘီလီယံ ခန့်မှန်းထားကြောင်း နှင့် ပြီးခဲ့သည့် နှစ်က ရင်းနှီးမြှုပ်နှံမှု ၈.၁ ဘီလီယံအထိ ၀င်ရောက်ခဲ့ကြောင်း သိရသည်။
ဧရာဝတီ
No comments:
Post a Comment