မြန်မာနိုင်ငံကအလုပ်သမားတွေအတွက် အနိမ့်ဆုံးအခြေခံလုပ်အားခကို တနေ့ ၃,၆၀၀ ကျပ်အဖြစ် ပြည်ထောင်စုသမ္မတမြန်မာနိုင်ငံတော်ရဲ့ အနည်းဆုံး အခကြေးငွေဆိုင်ရာ အမျိုးသားကော်မီတီကနေ အဆိုပြုသတ် မှတ်လိုက်တာကို ကန့်ကွက်တဲ့အနေနဲ့ ရန်ကုန်တိုင်းဒေသကြီး လှိုင်သာယာ အထည်ချုပ် စက်ရုံက အလုပ်သမားတွေ ဒီကနေ့ချီဆက်ဆန္ဒပြကြပါတယ်။ ရိုက်တာသတင်းတပုဒ်ကိုအခြေခံပြီး နန်းလောင်ဝ် က တင်ပြထားပါတယ်။
အလုပ်သမားတွေရဲ့ အနိမ့်ဆုံး အခြေခံလုပ်ခလစာကို သတ်မှတ်နိုင်ဖို့ အစိုးရကိုယ်စားလှယ်တွေ ၊အလုပ် ရှင် အလုပ်သမား ကိုယ်စားလှယ်တွေဟာ ဇွန်လ ၂၄ နဲ့ ၂၅ ရက်နေ့တွေ မှာတွေ့ဆုံ ဆွေးနွေးခဲ့ကြပြီး နောက်ဆုံးမှာ တော့ အနိမ့်ဆုံးလုပ်ခလစာ သတ်မှတ်ရေး အမျိုးသားကော်မီတီက အနိမ့်ဆုံး လုပ်ခလစာ အဖြစ် တရက်ကို ကျပ် ၃,၆၀၀ အဖြစ်အဆိုပြုသတ်မှတ် ပေးနိုင်ခဲ့ ပါတယ်၊ ဒီအဆိုပြုချက်ကို အလုပ်ရှင်၊ အလုပ်သမားနှစ်ဘက်စလုံး ဇူလိုင်လ ၁၃ ရက်၊ မနက်ဖြန်တနင်္လာနေ့နောက်ဆုံးထားကန့်ကွက် အကြံပြုနိုင် တယ် လို့ ကော်မီတီက ခွင့်ပြုထားပါတယ်။
လောလောဆယ်အလုပ်သမားတွေရဲ့အခြေခံလုပ်အားလစာက ကျပ် ၃,၀၀၀ ဖြစ်ပါတယ်၊ ဒါပေမယ့်လည်း တနေ့ကျပ် ၃,၆၀၀ သတ်မှတ်လိုက်ရင် သူ့တို့ရဲ့စီးပွါးရေးထုတ်လုပ်မှုကိုထိခိုက်နိုင်တဲ့အတွက် တရုတ်နဲ့ ကိုးရီးယားပိုင် အထည်ချုပ်ကုမ္ပဏီတချို့က အလုပ်ပိတ်ပြီး ပြန်ရုပ်သွားဖို့ ခြိမ်းခြောက်တဲ့သဘောနဲ့ ပြောဆို မှုတွေလည်းရှိ်လာခဲ့ပါတယ်။
အခုလိုအနိမ့်ဆုံးအခြေခံလုပ်ခလစာကို တနေ့ ၃,၆၀၀ ကျပ်သတ်မှတ်လိုက် တာကို နဂိုတောင်းဆိုခဲ့တဲ့ကျပ် ၄,၀၀၀ ပေးဖို့ အလုပ်သမားတွေဘက်က ရန်ကုန်တိုင်းဒေသကြီး၊ လှိုင်သာယာကအလုပ်သမား၂၅၀ လောက် ဒီကနေ့ ချီတက်ဆန္ဒပြခဲ့ကြပါတယ်။
ဒါဟာ တနေ့လုပ်အားခ ကိုတရားဝင်သတ်မှတ်လိုက်ပြီးတဲ့နောက် အထည် ချုပ်စက်ရုံ က အလုပ်သမား တွေ ပထမဆုံးအကြိမ် စုဝေး ဆန္ဒပြကြတာလည်း ဖြစ်ပါတယ်။
ဒီလိုဆန္ဒပြရတဲ့အကြောင်းရင်းနဲ့ပတ်သက်လို့ ဆန္ဒပြအလုပ်သမားခေါင်းဆောင် တဦးဖြစ်တဲ့ ကိုအောင်မျိုး မင်း က ခုလိုပြောပါတယ်။
“ကျနော်တို့တောင်းဆိုတာက ၃,၆၀၀ ပဲဖြစ်ဖြစ်၊ ၄ ထောင်ပဲဖြစ်ဖြစ် အခြေခံလစာကိုပဲတောင်းဆိုတာဖြစ် တယ်။ OT မပါ၊ အခြေခံလစာ ကျပ်တခုတည်း ၃,၆၀၀ ဆိုလို့ရှိရင်တော့ ဘယ်လိုပဲပြောပြော၊ မလောက် ငပေမယ့် နောက်ဆုံး ၄ ထောင်မရတဲ့အဆုံးတော့ လက်ခံပေးရမယ့် အနေအထားတခုပေါ့လေ။”
ဒီအဆိုပြုချက်ကို အလုပ်ရှင်ဘက်ကရော၊ အလုပ်သမားဘက်က ပါကန့်ကွက်မှုတွေ၊ ထောက်ခံမှုတွေ နှစ်မျိုးလုံးရှိနေခဲ့တာပါ။
ဒီလို ကန့်ကွက်မှုတွေ၊ အကြံပြုတာတွေအားလုံးကို ဇူလိ်ုင်လ ၁၃ ရက်နေ့အထိလက်ခံသွားမယ်လို့ အနိမ့်ဆုံး လုပ်ခလစာ သတ်မှတ်ရေး ကော်မီတီရဲ့အတွင်းရေးမှူးလည်းဖြစ်၊ အလုပ်သမားညွှန်ကြားမှုဦးစီးဌာနက တိုင်းဦးစီးမှုး ဒေါ်မိုးမိုးသွင်က VOA နဲ့ ဇူလိုင်လ ၁၀ ရက်နေ့က မေးမြန်းခန်းတခုမှာ အတည်ပြု ပြောဆို သွားခဲ့ပါသေးတယ်။
မြန်မာနိုင်ငံမှာလည်း အလုပ်သမားတွေရဲ့ အနိမ့်ဆုံးလုပ်ခလစာကို သတ်မှတ်နိုင်ဖို့ အလုပ်သမား အဖွဲ့ အစည်းတွေရော အလုပ်သမားတွေ ကိုယ်တိုင်ကပါ ဆန္ဒပြတောင်းဆိုမှုတွေ တောက်လျှောက်ဆိုသလို ရှိလာခဲ့ကြတာပါ။ အခြားအာဆီယံနိင်ငံတွေနဲ့စာရင် တနေ့လုပ်အားခ ကျပ် ၃,၆၀၀ ဟာ နည်းနေသေးပေ မယ့်လည်း ဆန္ဒပြအလုပ်သမားတယောက် ဖြစ်တဲ့ကိုအောင်ဖြိုးပိုင်က ကခုလိုပြောပါတယ်။
“အခု ၃,၆၀၀ ဆိုတာကတော့ မြန်မာနိုင်ငံမှာ အရမ်းနည်းပါတယ်။ ဘယ် အာဆီယံနိုင်ငံတွေနဲ့ပဲယှဉ်ယှဉ် ၃,၆၀၀ ဆိုတာက အရမ်းနည်းပါတယ်။ ဒါပေမယ့် အဲလောက်ရရင်ပဲ အလုပ်သမားတွေက ကျေနပ်လောက် မယ်လို့ ထင်ပါတယ်။”
လုပ်အားလစာ တိုးမြှင့်ပေးရေး အပါအ၀င် ခုလို အလုပ်သမားအခွင့်အရေး တောင်းဆိုဆန္ဒပြမှုတွေ ၂၀၁၀ ခုနှစ်လောက်ကတည်းက နေရာ အတော်များများမှာ ရှိခဲ့ပြီးအလုပ်ရှင် အလုပ်သမားပြသနာတွေရှိခဲ့ပါ တယ်။ ဒီလိုဆန္ဒပြမှုတွေကြောင့် အလုပ်သမားတွေကို အကြမ်းဖက် နှိမ်နှင်းတာတွေ၊ ဖမ်းဆီးအရေးယူမှုတွေ နဲ့လည်း ကြုံခဲ့ရပါတယ်။ မြန်မာနိုင်ငံမှာ လူလတ် တန်းစား၊ အခြေခံလူတန်းစား၊ အလုပ်သမားတွေ အနေနဲ့ လူနေမှုစားရိတ် မြင့်တက်လာတာကိုရင်ဆိုင်နေရပြီး အနိမ့်ဆုံးလုပ်ခ ၃၆၀၀ ရရင်တောင်မှ လောက်ငှရုံ အဆင့်လောက်ပဲ ရှိသေးတယ် လို့ အလုပ်သမား တွေကဆိုပါ တယ်။ အစိုးရဘက်ကလည်း အလုပ်ရှင်တွေ ရောအလုပ်သမား တွေရဲ့ အခက်အခဲတွေကို ဖြေရှင်းပေးဖို့ လိုတယ်လို့ ပြောဆိုမှုတွေရှိနေ တာပါ။
ဒီလိုအငြင်းပွားမှုတွေ၊ တင်းမာမှုတွေ၊ ဆန္ဒပြမှုတွေကြားကပဲ လူနေမှုစားရိတ် နဲ့ ကုန်ဈေးနှုန်းတွေ မြင့်တက် လာတဲ့ဒဏ်ကို လူများစုဖြစ်တဲ့လူလတ်တန်းစား နဲ့ အခြေခံလူတန်းစားနေတွကတော့ ရင်ဆိုင်နေရဆဲဖြစ်ပါ တယ်။
VOA
No comments:
Post a Comment