နိုင်ငံတော်ဖွံ့ဖြိုးတိုးတက်ရေး မသေမချာဖြစ်စေမှုမှာ လာဘ်ပေးလာဘ်ယူမှုဟာ အကြမ်းဖက်မှုထက် ပိုမိုဆိုးရွား စေကြောင်းကို ဇွန် ၅ ရက် MICC တွင်ပြုလုပ်သည့် ၂ဝ၁၄ ခုနှစ် ကမ္ဘာ့ပတ်ဝန်းကျင်ထိန်းသိမ်းရေးနေ့ အခမ်းအနားတွင် သမ္မတဦးသိန်းစိန်က ပြောကြားသည်။
မြန်မာနိုင်ငံအနေဖြင့် ဆင်းရဲမွဲတေမှုများကို ၂၆ ရာခိုင်နှုန်းမှ ၁၆ ရာခိုင်နှုန်းအထိ လျော့ကျအောင် ဆောင်ရွက်လျက်ရှိပြီး စာတတ်မြောက်ရေးလှုပ်ရှားမှုများကိုလည်း နိုင်ငံ၏ ဒေသများတွင် ဆောင်ရွက်ထားရှိခဲ့ကြောင်း၊ အလားတူ နိုင်ငံတော် ဖွံ့ဖြိုးတိုးတက်ရေးဖြစ်စေမှုတွင် လာဘ်ပေးလာဘ်ယူမှုသည် အကြမ်းဖက်မှုထက် ပိုမိုဆိုးရွားစေကြောင်းနှင့် လာဘ်ပေး လာဘ်ယူမှုကြောင့် ပတ်ဝန်းကျင်ထိန်းသိမ်းစောင့်ရှောက်မှုများကို ပျက်စီးစေနိုင်ကြောင်း၊ ၂ဝ၁၃ ခုနှစ်တွင် လာဘ်ပေး လာဘ်ယူတိုက်ဖျက်ရေးကော်မတီကို ဖွဲ့စည်းခဲ့ကြောင်း သမ္မတက ပြောကြားသည်။
“မြန်မာနိုင်ငံဟာ ပြင်ပကမ္ဘာ့နိုင်ငံများနဲ့ စီးပွားရေး၊ လူမှုရေးဆိုင်ရာလုပ်ငန်းများ ပိုမိုကျယ်ပြန့်စွာ ကူးလူးဆက် ဆံဆောင် ရွက်လာတာနှင့်အမျှ စီးပွားရေးနဲ့စက်မှုလုပ်ငန်း ရင်းနှီးမြှုပ်နှံမှုများဟာ တိုးပွားလာလျက်ရှိပါတယ်။ စဉ်ဆက်မပြတ် ဖွံ့ဖြိုး တိုးတက်မှုကို ရရှိစေမယ့် အစိမ်းရောင်စီးပွားရေးမူဝါဒများကို ခိုင်မာစွာ ချမှတ်ထားတာလည်း ဖြစ်ပါတယ်။ အဲဒီလိုသာ မဆောင်ရွက်နိုင်ခဲ့ရင် ကျွန်တော်တို့သယံဇာတများကို အလွန်အကျွံထုတ်ယူသုံးစွဲကြတော့မှာဖြစ်ပြီး အနာဂတ် မျိုးဆက်များအနေနဲ့ အဲဒီဒဏ်ကို ခံစားကြရမှာ ဖြစ်ပါတယ်။ ဂေဟစနစ် ပျက်ယွင်းခြင်းကြောင့် ဖြစ်ပေါ်လာမယ့် သဘာဝဘေးအန္တရာယ်များဖြစ်ကြတဲ့ ရေကြီးရေလျှံမှု၊ မိုးခေါင်ရေရှားမှု စသည်တို့ဖြစ်ပေါ်လာပါက တခြားသူများထက် ဆင်းရဲသားများက ပိုမိုခံစားရလျက် ရှိပါတယ်”ဟု သမ္မတဦးသိန်းစိန်က ပြောကြားသည်။
ရာသီဥတုပြောင်းလဲမှုသည် တခြားနိုင်ငံများထက် ဖွံ့ဖြိုးဆဲကျွန်းနိုင်ငံငယ်များတွင် ပြင်းထန်သောစိန်ခေါ်မှု အမျိုးမျိုးကို ခံစားလျက်ရှိပြီး လက်ရှိအတိုင်းနှစ်စဉ် ကာဗွန်ထုတ်လုပ်မှုနှုန်း မလျှော့ချနိုင်ပါကကျွန်းစုနိုင်ငံများအနေဖြင့် ပင်လယ်ရေမျက်နှာပြင် မြင့်တက်မှုကြောင့် စီးပွားရေးအရ ဆုံးရှုံးနိုင်မှုပမာဏသည် ၂ဝ၈ဝ ပြည့်နှစ်တွင် ဒေါ်လာ ၁၈၇ ဘီလျံအထိ ရှိလာမည်ဟု UNEP ခန့် မှန်းထားကြောင်း သိရသည်။
နိုင်ငံတော်သမ္မတ ဦးသိန်းစိန်က“မြန်မာနိုင်ငံရဲ့ ပတ်ဝန်းကျင်ထိန်းသိမ်းမှုဆိုင်ရာ ဖွံ့ဖြိုးတိုးတက်မှုကို ပြောရမယ်ဆိုရင် နိုင်ငံတော်ဖွဲ့စည်းပုံအခြေခံဥပဒေမှာ နိုင်ငံတော်သည် သဘာဝဝန်းကျင်ကို ကာကွယ်စောင့်ရှောက်ရမယ်လို့ ဖော်ပြပါရှိ ပါတယ်။ ဒါ့အပြင် နိုင်ငံသားတိုင်းဟာ သဘာဝပတ်ဝန်းကျင်ကို ထိန်းသိမ်းကာကွယ်စောင့်ရှောက်ရန် တာဝန်ရှိသည်ဟု လည်း ဖော်ပြထားပါတယ်။ငြိမ်းချမ်းစွာ အတူလက်တွဲနေထိုင်းခြင်းဖြင့် ကျွန်တော်တို့နိုင်ငံရဲ့မတူကွဲပြားတဲ့ သဘာဝနဲ့ယဉ်ကျေးမှုများဟာ စဉ်ဆက်မပြတ် ဖွံ့ဖြိုးတိုးတက်မှုကို အထောက်အကူပြုမယ်လို့ ကျွန်တော်တို့ယုံကြည် ပါတယ်”ဟု ဆိုသည်။
ပတ်ဝန်းကျင်ထိန်းသိမ်းရေးလုပ်ငန်းများကို စနစ်တကျ အကောင်အထည်ဖော်ဆောင်ရွက်ရန်အတွက် ပတ်ဝန်းကျင်ထိန်း သိမ်းရေးကော်မတီအား ၂ဝ၁၄ ခုနှစ် မတ် ၁ဝ ရက်တွင် ဖွဲ့စည်းခဲ့ကြောင်း သိရသည်။
Eleven Media Group ၏ CEO ဒေါက်တာသန်းထွဋ်အောင်က “သမ္မတက လာဘ်ပေးလာဘ်ယူကိစ္စကို စကားလုံးတွေနဲ့ ပြောနေတာထက် ဝန်ကြီးတွေ၊ အစိုးရထိပ်တန်းအရာရှိကြီးတွေရဲ့ လစာနဲ့ သူတို့မိသားစုဝင်တွေ ပိုင်ဆိုင်မှုအချိုးကို ပြည်သူလူထုကို တရားဝင်ချပြလိုက်တာ ကောင်းပါတယ်။ ကျွန်တော့်ရဲ့အတွေ့အကြုံအရဆိုရင် မဆလခေတ်နှောင်းပိုင်း၊ နဝတ၊ နအဖခေတ်တွေထက် လက်ရှိအချိန်က ပိုဆိုးနေတယ်။ ၉၅ ရာခိုင်နှုန်းလာက်က လာဘ်စားနေကြပေမယ့် လာဘ်ပေးလာဘ်ယူအပါအဝင် အဂတိလိုက်စားလို့ ထောင်ချတဲ့သူ သမ္မတကြီးသက်တမ်းမှာ မရှိသေးဘူး။ အစိုးရ အဖွဲ့ဝင်တိုင်း၊ ဝန်ထမ်းတိုင်းက သမ္မတရုံးနဲ့ အဆင်ပြေရင် အရေးယူမခံရနိုင်ဘူးဆိုတဲ့အသိမျိုးကို လူတိုင်းသိနေတယ်။ လက်ရှိအစိုးရကို လူထုအဝေဖန်ဆုံးက ဒီလာဘ်ပေးလာဘ်ယူနဲ့ အဂတိလိုက်စားမှုကိစ္စပါ။ ဒါကြောင့် လာဘ်ပေး လာဘ်ယူနဲ့ ပတ်သက်တဲ့ မေးခွန်းတွေ ဖြေနိုင်ရင် နောက်သက်တမ်းအတွက် ပြည်သူတွေက သမ္မတကြီးကို တာဝန်ဆက်ထမ်းဆောင်ဖို့ တောင်းဆိုကြလိမ့်မယ်”ဟု ပြောကြားသည်။
Eleven Media Group
No comments:
Post a Comment