မွန်ပြည်နယ် ကျိုက်ထိုမြို့ ကျိုက်ထီးရိုး တောင်ပေါ်ရှိ တောင်တက် အထမ်းသမား သမဂ္ဂများ၏ လုပ်ပိုင်ခွင့်နှင့် ရပိုင်ခွင့်များကို မြို့နယ် အုပ်ချုပ်ရေးအဖွဲ့က ဝင်ရောက်လုပ်ကိုင်နေခြင်းကြောင့် မကြေလည်မှုများ ရှိနေသည့် အတွက် သက်ဆိုင်ရာ အစိုးရအဖွဲ့က ဖြေရှင်းပေးရန် လိုအပ်နေကြောင်း သတင်းရရှိသည်။
ထို့အပြင် တောင်တက်အထမ်းသမား သမဂ္ဂများကို အလုပ်သမား ဝန်ကြီးဌာနက တရားဝင် ခွင့်ပြုချက်ဖြင့် ဖွဲ့စည်းပေးထား သော် လည်း ကျိုက်ထို မြို့နယ် အုပ်ချုပ်ရေး အဖွဲ့က အသိအမှတ် မပြုကြောင်းလည်း တောင်တက် အထမ်းသမား သမဂ္ဂ အမှတ် ၁၂၅ ၏ ဥက္ကဋ္ဌ ဦးစိန်ဝင်းက ပြောသည်။
“ကျနော်တို့က အလုပ်သမား ဝန်ကြီးဌာနရဲ့ ခွင့်ပြုချက်နဲ့ တရားဝင် မှတ်ပုံတင်ပြီး ဖွဲ့ထားတာ။ ဒါပေမယ့် ကျနော်တို့ သမဂ္ဂတွေကို ၂ လပဲ လုပ်ခွင့်ပြုခဲ့ပြီး ကျနော်တို့ရဲ့ လုပ်ပိုင်ခွင့်တွေ၊ ရပိုင်ခွင့်တွေကို အုပ်ချုပ်ရေး အဖွဲ့က ဝင်ရောက် စွက်ဖက်နေတယ်”ဟု ၎င်းက ပြောပြသည်။
ကျိုက်ထီးရိုး တောင်ပေါ်တွင် တောင်တက် အထမ်းသမား အလုပ်သမားဦးရေ ၉၀၀ ဝန်းကျင် ရှိပြီး အလုပ်သမား သမဂ္ဂ အမှတ် ၁၂၅ နှင့် ၁၂၆ တို့ကို ၂၀၁၂ ခုနှစ်တွင် ဖွဲ့စည်းခဲ့ခြင်း ဖြစ်သည်ဟုလည်း ဆိုသည်။
အလုပ်သမားများက ကျိုက်ထီးရိုး တောင်ပေါ်တွင် ပွဲတော်ကာလ ၇ လအတွင်း ကုန်ထမ်း အလုပ်သမား လုပ်ကိုင်ခွင့် လက်မှတ် အတွက် အုပ်ချုပ်ရေး အဖွဲ့သို့ တဦးလျှင် ၇၅၀၀ ကျပ် နှုန်းစီပေးရကြောင်း ပြောပြကြသည်။
ကျိုက်ထီးရိုး တောင်ပေါ်တွင် တောင်တက်အထမ်းသမား အလုပ်သမား စုစုပေါင်း ၉၀၀ ခန့်ရှိရာ အလုပ်သမား လုပ်ကိုင်ခွင့် လက်မှတ် အတွက် ကောက်ခံရရှိငွေ တနှစ်လျှင် စုစုပေါင်း ကျပ် ၆၂ သိန်းကျော် (၆,၂၂၅,၀၀၀)ရှိကြောင်း သိရသည်။
မြို့နယ်အုပ်ချုပ်ရေး အဖွဲ့မှ ယင်းသို့ ငွေကြေးကောက်ခံမှုများနှင့် ပတ်သက်၍ “အဲဒီငွေတွေကို ဘယ်လို သုံးတယ် ဆိုတာ ရှင်းပြ တာမျိုး မရှိဘူး။ အရင်နှစ်က ငွေစာရင်း ရှင်းတမ်းတွေကိုလည်း ဒီနေ့အထိ မရှင်းပြသေးဘူး”ဟု ဦးစိန်ဝင်းက ပြောသည်။
ကျိုက်ထီးရိုး တောင်ပေါ် ယာဉ်ရပ်နားစခန်းရှိ ကုန်ထမ်းအလုပ်သမ တဦးကလည်း “ကျမတို့မှာ တနှစ်လုံးစာ ပေးထားပြီးတဲ့ အပြင် တခါ အထမ်းထွက်ရရင် ဂိတ်ကြေး ၂၀၀ ကျပ် စီ ပေးရသေးတယ်။ ဆင်းရဲလွန်းလို့သာ လုပ်နေရတာ။ အထမ်းသမားဘဝက ဟိုလူ့ကြောက်ရ၊ ဒီလူ့ ကြောက်ရနဲ့”ဟု ပြောဆိုသည်။
ထို့ပြင် အလုပ်သမားများကို ကြီးကြပ်ကိုင်တွယ်ရမည့် အလုပ်သမားခေါင်းဆောင်များ ရွေးချယ်ရာတွင် အလုပ်သမားများ၏ ဆန္ဒနှင့် ကိုက်ညီပြီး အလုပ်သမား လုပ်သက် အနည်းဆုံး ၆ လ ရှိသူ စသည့် အချက်များနှင့် ကိုက်ညီရမည်ဟု အလုပ်သမား ဝန်ကြီးဌာန တာဝန်ရှိသူများ လာရောက်စဉ်က ပြောကြားခဲ့သော်လည်း လက်တွေ့ ကျင့်သုံးသည့် စနစ်က ဆန့်ကျင်ဘက် ဖြစ်နေကြောင်း အလုပ်သမား သမဂ္ဂ အမှတ် ၁၂၅ ၏ ဥက္ကဋ္ဌ ဦးစိန်ဝင်းက ပြောကြားသည်။
လက်ရှိတွင် ကျိုက်ထိုမြို့နယ် အုပ်ချုပ်ရေးမှူး၏ တာဝန်ပေးချက်အရ ကျိုက်ထီးရိုး တောင်ပေါ်ရှိ အလုပ်သမား အဖွဲ့၏ ဥက္ကဋ္ဌတာဝန် ကို ဘုရားဂေါပက အဖွဲ့ကလည်းကောင်း၊ ဘဏ္ဍာရေးမှူး တာဝန်ကို တောင်တက် မော်တော်ယာဉ်အသင်းက လည်းကောင်း၊ အတွင်း ရေးမှူးတာဝန်ကို ကျေးရွာ အုပ်ချုပ်ရေးမှူးများက လည်းကောင်း အသီးသီး တာဝန်ယူထားကြောင်းလည်း ၎င်းက ဆိုသည်။
ကျိုက်ထီးရိုးတောင်ပေါ်တွင် ကုန်ထမ်းနှင့် လူထမ်း စသဖြင့် အလုပ်သမားများရှိရာ တနှစ်ပတ်လုံး ပေးဆောင်ရသည့် ငွေ ၇၅၀၀ ကျပ် အပြင် အထမ်းတကြိမ် ထမ်းခွင့်ရတိုင်း ဂိတ်ကြေးပေးသွင်းရသည့် ပမာဏမှာလည်း ကွဲပြားမှုရှိသည်။
လူထမ်း တထမ်းလျှင် အတက်အဆင်း ၁၆၀၀၀ ကျပ်နှုန်း သတ်မှတ်ထားရာ ဂိတ်ကြေး ၇ ရာခိုင်နှုန်း(၁၃၀၀ ကျပ်) ပေးဆောင်ရကြောင်း၊ ကုန်တထမ်းလျှင် ၄၅၀၀ ကျပ်နှုန်း သတ်မှတ်ထားပြီး ဂိတ်ကြေး ၂၀၀ ကျပ် ထပ်မံပေးဆောင်ရကြောင်း အထမ်းသမားများပြောသည်။
အဆိုပါ ကိစ္စများနှင့် ပတ်သက်၍ ရသေ့တောင်စခန်း အလုပ်သမား ကြီးကြပ်ရေး ကော်မတီ အုပ်ချုပ်ရေးမှူး ဦးသန်းလွင်အား ဆက် သွယ်မေးမြန်းခဲ့ရာ “အလုပ်သမားတွေနဲ့ ပတ်သက်တဲ့ မနှစ်က အတွက် ငွေကြေး ရှင်းတမ်းတွေကိုတော့ ကျနော်တို့ မရှင်းပြရသေး ဘူး။ ဒီနှစ် အတွက်နဲ့ ၂ နှစ်စာ ပေါင်းပြီးရှင်းပေးသွားမှာပါ”ဟု ပြန်လည် ရှင်းပြခဲ့သည်။
ထို့အပြင် အလုပ်သမားများထံမှ ၎င်းတို့ နှစ်စဉ် ကောက်ခံရရှိသည့် ငွေကြေးများဖြင့် အလုပ်သမားများ၏ သာရေး နာရေးကို ကူညီ ထောက်ပံ့ပေးလျက် ရှိကြောင်း၊ သာရေး ၃၀၀၀၀ ၊ နာရေး ၅၀၀၀၀ နှုန်းဖြင့် ထောက်ပံ့ပေးထားကြောင်း၊ ယနေ့အထိ လက်ကျန်ငွေမှာ ကျပ် ၅ သိန်းသာ ကျန်ရှိကြောင်းလည်း ၎င်းက ပြောကြားသည်။
အလုပ်သမားများ အတွက် ကူညီထောက်ပံငွေ ပေးသည်ဟု ဆိုသော်လည်း လက်တွေ့တွင် ခံစားခွင့် မရရှိသူများလည်း ရှိနေကြောင်း အမည် မဖော်လိုသည့် ကုန်ထမ်း အမျိုးသမီး တဦးက ပြောသည်။
အလုပ်သမား သမဂ္ဂအမှတ် ၁၂၅ က မှတ်သားထားသော ကိန်းဂဏန်းများအရ အလုပ်သမားများ ထံမှ ကောက်ခံထားသည့် ငွေစုစုပေါင်း၏ ၃ ရာခိုင်နှုန်းအား ဘုရားကြီး၏ အလှူငွေအဖြစ် လည်းကောင်း၊ ၂ ရာခိုင်နှုန်းအား အလုပ်သမား များအတွက် ထောက်ပံ့ ငွေအဖြစ်လည်းကောင်း၊ အလုပ်သမား ကြီးကြပ်ရေး ကော်မတီ၏ အထွေထွေအသုံးစရိတ်အဖြစ် ၂ ရာခိုင်နှုန်းကိုလည်းကောင်း အသီးသီးသုံးစွဲရန် သတ်မှတ်ထားကြောင်း သိရသည်။
ဧရာဝတီ
No comments:
Post a Comment