၂၀၁၅ ရွေးကောက်ပွဲကို ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှတစ်ဆင့် ဝင်ရောက်ယှဉ်ပြိုင်ရန် တပ်မတော်က ကိုယ်စားလှယ်လောင်း အမည်စာရင်း တင်သွင်းသူ ၁၄၃ ဦးတွင် ၅၉ ဦးကိုသာ လက်ခံရွေး ချယ်ထားကြောင်း ကြံ့ခိုင်ရေးပါတီမှ တာဝန်ရှိသူများက ပြောကြားသည်။
နေပြည်တော်ရှိ ကြံ့ခိုင်ရေးပါတီ ဗဟိုဌာနချုပ်တွင် သြဂုတ်လ ၁၂ ရက်နေ့က ပြုလုပ်သည့် ကြံ့ခိုင်ရေးပါတီ ၏ သတင်းစာရှင်းလင်းပွဲတွင် ၎င်းတို့က ယင်းသို့ ပြောကြားခဲ့ခြင်း ဖြစ်သည်။
တပ်မတော်သားမှ အငြိမ်းစားယူလာသည့် ကိုယ်စားလှယ်လောင်းများကို ၎င်းတို့၏ ဇာတိမြေ သို့မဟုတ် တာဝန်ထမ်းဆောင်ဖူးသည့် နယ်မြေများတွင် ရွေးကောက်ခံအဖြစ် ယှဉ်ပြိုင်ရန် နေရာချထားကြောင်း ကြံ့ခိုင်ရေးပါတီ အတွင်းရေးမှူး ဦးသိန်းဆွေက ပြောကြားသည်။
ယင်းရွေးချယ်လိုက်သော ကိုယ်စားလှယ်လောင်း ၅၉ ဦးကို အမျိုးသားလွှတ်တော် ၇ ဦး၊ ပြည်သူ့လွှတ်တော် ၁၉ ဦးနှင့် တိုင်းဒေသကြီးလွှတ်တော် ၃၃ ဦး သတ်မှတ်ယှဉ်ပြိုင်စေမည် ဖြစ်ကြောင်း ယင်းပါတီ အထွေထွေ အတွင်းရေးမှူး ဦးမောင်မောင်သိမ်းက ဆိုသည်။
ကြံ့ခိုင်ရေးပါတီသည် မဲဆန္ဒနယ် ၁၁၇၉ နယ်မှ ၁၁၄၇ နေရာကို ဝင်ရောက်ယှဉ်ပြိုင်မည် ဖြစ်ပြီး လက်ရှိ အစိုးရအဖွဲ့မှလည်း ဝန်ကြီး၊ ဒုဝန်ကြီးဟောင်းများ အပါအဝင် ကိုယ်စားလှယ်လောင်း ၅၀ ဦးကို ရွေးချယ် ထားကြောင်း ၎င်းက ရှင်းပြသည်။
ကြံ့ခိုင်ရေးပါတီက ၂၀၁၅ အထွေထွေရွေးကောက်ပွဲ ယှဉ်ပြိုင်မည့် ကိုယ်စားလှယ်လောင်းများတွင် အမျိုး သမီး ကိုယ်စားလှယ်လောင်း ၇၂ ဦး ပါဝင်မည်ဖြစ်ပြီး ရွေးကောက်ပွဲတွင် အစိုးရဖွဲ့နိုင်သည့် အရေအတွက် အနိုင်ရရှိမည်ဟု မျှော်မှန်းထားကြောင်း ယင်းပါတီ အတွင်းရေးမှူး ဦးသိန်းဆွေက ပြောကြားသည်။
အဆိုပါ ပါတီက ကိုယ်စားလှယ်လောင်းများအတွက် ပါတီရန်ပုံငွေနှင့် ၎င်းတို့၏ ကိုယ်ပိုင်ငွေကို မျှသုံးရန် ညွန်ကြားထားပြီး တစ်ဦးချင်းစီအတွက် ကျပ်သိန်း ၁၀၀ ပြည့်မီအောင် သုံးစွဲနိုင်မည် မဟုတ်ကြောင်း ၎င်းက ထပ်လောင်းပြောဆိုသည်။
လက်ရှိတွင် ကြံ့ခိုင်ရေးပါတီဝင် ဖြစ်သော သမ္မတရုံးဝန်ကြီး ဦးစိုးသိမ်းသည် တစ်သီးပုဂ္ဂလ ဝင်ပြိုင်ရန် ရွေးကောက်ပွဲကော်မရှင်သို့ အမည်စာရင်း တင်သွင်းထားသော်လည်း ပါတီသို့ နုတ်ထွက်စာ မတင်သေး ကြောင်း ၎င်းက ဆိုသည်။
ကြံ့ခိုင်ရေးပါတီမှာ မဲဆန္ဒနယ်အပြည့် ဝင်ရောက်ယှဉ်ပြိုင်ခြင်း မပြုခြင်းမှာ တိုင်းရင်းသားပါတီ အချို့နှင့် မိတ်ဖက်တိုင်းရင်းသားပါတီဝင်များ ပြိုင်မည့်နေရာများကို ချန်လှပ်ထားခဲ့၍ ဖြစ်ကြောင်း ၎င်းက ရှင်းပြ သည်။
The Voice Weekly
No comments:
Post a Comment