ရန်ကုန်အိမ်ခြံမြေဈေးကွက် ၀ယ်လိုအား မြင့်မားနေဆဲ BOT ကွန်ဒိုတိုက် ခန်းများ ရေရှည်အတွက် အာမခံချက် ပေးနိုင်မည်လား

ရန်ကုန်အိမ်ခြံမြေဈေးကွက်သည် မြင့်တက်လျက်ရှိဆဲ ဖြစ်သည်။ လက်ရှိတွင် အနိမ့်ဆုံး ကျပ်သိန်း ၂ဝဝ ကျော်တန် တိုက်ခန်းများမှအစ အမြင့်ဆုံး သိန်းပေါင်းထောင်ချီနေသော တိုက်ခန်းများအထိ ဝယ်လိုအားကောင်းနေသည့်အတွက် အိမ်ခြံမြေကဏ္ဍ၊ အိမ်ရာဖော်ထုတ်မှုကဏ္ဍတွင် ပြည်တွင်းလုပ်ငန်းရှင်များသာမက နိုင်ငံတကာနှင့် ပြည်တွင်း ပူပေါင်းသောလုပ်ငန်းများ ပေါ်ပေါက်လာခဲ့သည်။ အထူးသဖြင့် Commercial Building များကို လုပ်ငန်းရှင်များက ပို၍ဆောက်ချင်ကြသည်။ 

သူက အကျိုးအမြတ် ပိုရှိသည်။ မြန်မာနိုင်ငံ၏ အိမ်ခြံမြေဈေးကွက်သည် World Class တွင် ထိပ်ဆုံး၌ ရောက်နေပြီး ဘာစီလိုနာနိုင်ငံနှင့် အညီသွားနေသည်။ အမှန်တွင် ကမ္ဘာပေါ်တွင် ဈေးအကြီးဆုံးမှာ တိုကျိုအိမ်ခြံမြေဈေးကွက်ဖြစ်ပြီး တစ်ပေလျှင် မြန်မာငွေနှင့် ကျပ်ကိုးသိန်းခန့် ရှိနေသည်။ တိုကျို၊ ဟောင်ကောင်၊ စင်ကာပူနှင့် နယူးယောက် မဟင်တန်တို့သည် ကမ္ဘာပေါ်တွင် ဈေးအကြီးဆုံး နိုင်ငံများဖြစ်ပြီး မြေအရမ်းရှားသည့် နေရာများ ဖြစ်သည့်အတွက် ကမ္ဘာ့အမြင့်ဆုံးဈေးများ ဖြစ်နေသည်။

မြန်မာနိုင်ငံသည် ထိုနိုင်ငံများ၏နောက်တွင် ရှိနေသည်။ ယင်းကဲ့သို့ အိမ်ခြံမြေဈေးနှုန်းများ မြင့်တက်နေသည့်အတွက် တစ်ချိန်တွင် အိမ်ခြံမြေဈေးကွက် ထိုးကျမည်ကို စိုးရိမ်စရာ ရှိနေသည်။ အဘယ့်ကြောင့်ဆိုသော် ဈေးကွက်တစ်ခုသည် Boom ဖြစ်ပြီးပါက Bust ဖြစ်တတ်သည့် သဘာဝရှိသည်။

မြန်မာပြည်တွင် ၂ဝ၁၅ အလွန်၌ စတော့ရှယ်ယာဈေးကွက် ပေါ်လာပြီး ရင်းနှီးမြှုပ်နှံစရာ ဈေးကွက်အသစ် ပေါ်လာပါက မြေဈေးကွက်သည် ကမောက်ကမ ရှိလာနိုင်သည်ဆိုသော သုံးသပ်ချက်များ ကြားလာရသည်။ အဘယ်ကြောင့်ဆိုသော် မြန်မာ့အိမ်ခြံမြေဈေးသည် ဖြစ်သင့်ဖြစ်ထိုက်သည့် ဈေးအပေါ်တွင် ရောက်နေသည်။ ထို့အတွက် တစ်နေ့နေ့တွင် ဖြစ်သင့်ဖြစ်ထိုက်သည့် ဈေးနှုန်းသို့ ပြန်လည်ရောက်ရှိလာမည်ဟု သုံးသပ်နိုင်သည်။

Services Apartment များ

မြန်မာနိုင်ငံတွင် Services Apartment များကို စဆောက်စဉ်ကတည်းက ရောင်းစားခွင့်မရှိပေဟူသော ကန့်သတ်ချက်ရှိသည်။ သို့သော် ယင်း Services Apartment များကို ကွန်ဒိုဟု ပြောဆိုရောင်းချနေမှုများလည်း ရှိသည်။ ဆောက်လုပ်ခွင့် တောင်းခံစဉ်က Services Apartment အနေဖြင့် လျှောက်ထားခြင်းမျိုး ဖြစ်ခဲ့ပါက ယင်းအနေအထားသည် ကွန်ဒိုဥပဒေ ထွက်လာသည့် အချိန်တွင် တစ်မျိုးတစ်ဖုံ ဖြစ်လာနိုင်သည်။ ယခင်က နိုင်ငံခြားသားများ မြန်မာပြည်လာလျှင် ရေတိုအတွက် ဟိုတယ်တွင် နေထိုင်ပြီး ရေရှည်အတွက်ဆိုပါက လုံးချင်းများ ငှားယူကြသည်။ လက်ရှိအချိန်တွင် Services Apartment များ ပေါ်လာပြီး ငှားရမ်းနေထိုင်ကြသော်လည်း Supply နှင့် Demand မမျှသည့်အတွက် အိမ်များကိုပါ နားလည်မှုနှင့် ငှားရမ်းမှုများ ရှိလာကြသည်ကို တွေ့ရသည်။ 

BOT စနစ်ဖြင့် ကွန်ဒိုဆောက်လုပ်ခွင့်

အမှန်တွင် BOT စနစ်ဖြင့် ကွန်ဒိုဆောက်လုပ်ခွင့် မရှိပေ။ ကွန်ဒိုဆိုသည်မှာ စုပေါင်းပိုင်သည့် မြေပေါ်တွင်သာ ဆောက်လုပ်ရသည့် သဘောသဘာဝ ဖြစ်သည်။ လက်ရှိအချိန်တွင် ကွန်ဒိုဟုအမည်တပ်ပြီး BOT စနစ်ဖြင့် ဆောက်နေသော တိုက်ခန်းများသည် အမှန်တွင် ကွန်ဒိုဟုခေါ်ရန် မသင့်ပေ။ မြန်မာပြည်တွင် ကွန်ဒိုအား အဓိပ္ပာယ်သတ်မှတ်ချက် လွဲနေသည်။ စင်စစ် ကွန်ဒိုမီနီယံ၏ အဓိပ္ပာယ်မှာ ဒိုမီနီယံမှ လာခြင်းဖြစ်ပြီး စုပေါင်းပိုင်သည့် သဘောသဘာဝ ဖြစ်သည်။ Public Ownership အနေဖြင့် အားလုံးနှင့်ဆိုင်သော စုပေါင်းဧရိယာပေါ်တွင် စုပေါင်းပိုင်ဆိုင်ခြင်း ဖြစ်သည်။ ထို့ကြောင့် ကွန်ဒိုသည် System တစ်ခုပေါ်တွင် မူတည်ပြီး ပစ္စည်းပေါ်တွင် မူမတည်ပေ။ မြန်မာပြည်တွင် ကွန်ဒိုဆိုပါက ဓာတ်လှေကားပါရမည်။ အခန်းကျယ်ရမည်ဟု လွဲမှားစွာ အဓိပ္ပာယ် ဖွဲ့ဆိုနေသော်လည်း ကွန်ဒိုဆိုသည်မှာ ပိုင်ဆိုင်မှုစနစ်ကိုသာ ဆိုလိုပါသည်။ ယင်းနေရာတွင် တိုက်ခန်းကောင်းခြင်း၊ မကောင်းခြင်းနှင့် မဆိုင်ပေ။ ကွန်ဒို၏ အနှစ်သာရအရ ကွန်ဒို တကယ်ဆောက်ချင်သောသူသည် မြေကြီးနှင့်ပတ်သက်၍ ကြေညာပေးရမည်သာ ဖြစ်သည်။ ယင်းမြေပေါ်တွင် စုပေါင်းပိုင် အဆောက်အအုံ ဆောက်မည်ဖြစ်ကြောင်း ကြေညာရခြင်းမျိုးဖြစ်ပြီး အဆိုပါ သတ်မှတ်ချက်များနှင့် မပြည့်စုံပါက ကွန်ဒိုဟု မခေါ်ဆိုနိုင်ဟု သိရသည်။ ယင်းကဲ့သို့ အနေအထားများကြောင့် ကွန်ဒို၏ အခြေခံ အချက်အလက်များနှင့် မကိုက်ညီဘဲ ကွန်ဒိုဟု ကြော်ငြာကာ ရောင်းချနေသည့် လုပ်ငန်းများ ကွန်ဒိုဥပဒေ ထွက်လာပါက စားသုံးသူကာကွယ်ရေး ဥပဒေနှင့် အရေးယူခံရနိုင်သည်။ လက်ရှိအချိန်တွင် ဥပဒေ မထွက်သေးသည့်အတွက် အရေးယူ၍ မရသေးသည့် အနေအထားတွင် နိုင်ငံခြားသား အချို့လည်း မြန်မာနိုင်ငံတွင် ကွန်ဒိုဥပဒေ မသေချာသေးသည့် အချိန်၌ စွန့်စား၍ လုပ်ကိုင်နေသည့် သဘောလည်း ရှိနေကြောင်း သိရပြီး သူတို့ကိုယ်တိုင် ပိုင်ဆိုင်မှုနှင့်ပတ်သက်ပြီး အပြတ်မပြောနိုင်သည့် သဘောမျိုး တွေ့ရသည်။

မြေနေရာ အခက်အခဲ

မြန်မာနိုင်ငံတွင် မြေယာရရှိမှု အခက်အခဲ များစွာရှိနေသည်။ ထို့အပြင် လုပ်ငန်းရှင်များ အနေဖြင့်လည်း မြေကိုဝယ်ယူ၍ တည်ဆောက်ရန် အခက်အခဲ ရှိလာသည်။ မြေနှင့် ပတ်သက်ပါက မြေကို ဝယ်ယူခြင်းဖြင့် လည်းကောင်း၊ ငှားခြင်းဖြင့် လည်းကောင်း ရနိုင်သည်။ သို့သော် ဝယ်ယူမှုသည် မြန်မာနိုင်ငံ၏ ဖြစ်ပေါ်နေသော အနေအထားအရ ရင်းနှီးမြှုပ်နှံသူများအတွက် ကုန်ကျစရိတ် လွန်စွာကြီးမြင့်စေသည်။ ထို့အတွက် အချို့က အကျိုးတူ ဆောက်ကြသည်။ တတိယနည်းမှာ ငှားရမ်းသောနည်းဖြစ်ပြီး များသောအားဖြင့် အစိုးရဆီမှ ငှားရမ်းခြင်းသည် ဈေးသက်သာသည့်အတွက် အစိုးရထံမှ ငှားယူမှု ပိုများကြသည်။ ယင်းအနေအထားများကြောင့် နိုင်ငံခြား ရင်းနှီးမြှုပ်နှံသူများက မြေရှာသည့်အခါတွင် သက်သာသည့်နည်းလမ်းများဖြင့် ရှာကြသည်။ ဆောက်သည့်အခါတွင် မိမိပိုက်ဆံနှင့် ဆောက်လုပ်မှု ရှိသကဲ့သို့ ရှယ်ယာခေါ်သည့်နည်းဖြင့် ဆောက်လုပ်မှုလည်း ရှိသည်။ တတိယတစ်မျိုးမှာ ကြိုတင်ရောင်းချခြင်း နည်းဖြစ်ပြီး စတုတ္ထနည်းမှာ ငွေချေး၍ ဆောက်လုပ်ခြင်းဖြစ်သည်။ သို့သော် ငွေချေးသည့်နည်းသည် အတိုးပေးဆောင်ရသည်။ ရှယ်ယာခေါ်ရန်လည်း နာမည်ရှိပြီးသားလုပ်ငန်း ဖြစ်ရမည်။ ထို့ကြောင့် လုပ်ငန်းရှင်များက Pre Sale ဖြင့် ရောင်းချခြင်းကိုသာ ပို၍ကြိုက်နှစ်သက်ပုံရသည်။

Golden City

လက်ရှိအချိန်တွင် Golden City က တည်ဆောက်နေသော အဆောက်အအုံမှာ စစ်တပ်မှ ငှားရမ်းထားသော မြေပေါ်တွင် ဆောက်လုပ်နေခြင်းဖြစ်ပြီး နှစ် ၅ဝ စာချုပ်သက်တမ်းဟု သိရသည်။ ၁ဝ နှစ်တစ်ကြိမ် သက်တမ်းတိုးခွင့်ရှိပြီး နှစ်ကြိမ်အထိ တိုးနိုင်သည်။ Golden City ကို တရုတ်နိုင်ငံ စီချွန်လုပ်ငန်းရှင်များနှင့် မြန်မာနိုင်ငံမှ လုပ်ငန်းရှင်တစ်ဦးတို့ အကျိုးတူ ပူးပေါင်းဆောက်လုပ်နေခြင်းဖြစ်ပြီး မြန်မာနိုင်ငံ၏ ပထမဦးဆုံး BOT စနစ်ဖြင့် ဆောက်လုပ်နေသော ကွန်ဒိုတိုက်ခန်းများ ဖြစ်သည်။ သူတို့အဖွဲ့သည် စုပေါင်းရုံးကိုလည်း ငှားရမ်းခွင့် ရရှိထားသည့် အဖွဲ့ဖြစ်ပြီး ထို့အတူ စစ်ရုံးကိုလည်း ငါးပုံတစ်ပုံ ရရှိထားသည်ဟု သိရသည်။ နိုင်ငံတော်ပိုင် အဆောက်အအုံများ ဖြစ်သည့်အတွက် လူထုကြားတွင် မကျေနပ်မှုများ ရှိနေသော်လည်း စီးပွားရေး လုပ်ငန်းရှင်များက အစိုးရထံမှ အပြိုင်ငှားရမ်းခွင့် ရရှိရန် ကြိုးပမ်းနေကြသည်။ 

ဖြစ်နိုင်ခြေရှိသည့် အလားအလာ

အိမ်ခြံမြေကဏ္ဍတွင် နိုင်ငံခြား ရင်းနှီးမြှုပ်နှံမှုများ ဝင်လာခြင်းသည် ယေဘုယျအားဖြင့် ကောင်းမွန်သည်ဟု ပြော၍ရသော်လည်း ငှားရမ်းမြေများပေါ်တွင် ကွန်ဒိုဆောက်လုပ်ခြင်း၊ Pre sale ဖြင့် ကြိုရောင်းချခြင်း၊ ထိုရောင်းချသည့် အခန်းများကို ဝယ်ယူခြင်းသည် ခိုင်မာမှုရှိသည်ဟု ပြော၍မရပေ။ မြန်မာနိုင်ငံတွင် ၂ဝဝ၃ တွင် မဟာဓနံ၊ ဧရာမြေ စသည့်လုပ်ငန်းများနှင့် ပတ်သက်၍လည်း အထိနာခဲ့သည့် သာဓကများလည်း ရှိခဲ့သည်။ ငွေအမြောက်အမြား ဆုံးရှုံးသွားခဲ့ဖူးသည်။ လက်ရှိ အခြေအနေတွင် ထိုကဲ့သို့ မဖြစ်နိုင်ဟု ပြော၍မရသလို ဖြစ်မည်ဟုလည်း ပြော၍မရပေ။ သို့သော် ငွေကြိုသွင်းထားရသည့်အတွက် ဝယ်ယူသူအနေဖြင့် သေချာပေါက် စွန့်စားရမည်။ အကယ်၍ ဆုံးရှုံးမှုများ ဖြစ်ပေါ်လာပါက ဈေးကွက်တွင် လည်ပတ်နေသော ငွေအမြောက်အမြား ဆုံးရှုံးသွားနိုင်သည့်အတွက် စီးပွားရေးဈေး ကွက် ကမောက်ကမ ဖြစ်သွားနိုင်သည်။

ထို့အတူ ဖြစ်ပေါ်နေသည့် အခင်းအကျင်းများအရ ကွန်ဒိုအမည်ခံ Services Apartment များသည် ကွန်ဒိုဥပဒေနှင့် ငြိနိုင်သည့် အနေအထားများ ရှိနေခြင်းနှင့် ၂ဝ၁၅ တွင် စတော့ရှယ်ယာဈေးကွက် ပေါ်လာပါက ရင်းနှီးမြှုပ်နှံမှုများ စတော့ရှယ်ယာဘက် ရောက်သွားပါက အိမ်ခြံမြေဈေး ထိုးကျသွားနိုင်ခြင်းများ ရှိလာနိုင်သည်။ 

လက်ရှိအိမ်ခြံမြေလောကတွင် မြှုပ်နှံထားသောငွေများ အကြောင်းအမျိုးမျိုးကြောင့် ငွေသေဖြစ်ပါက ဝမ်းနည်းစရာ ရှိပါလားဟု မေးစရာရှိသည်။ နဂိုကတည်းကပင် သိန်းထောင်ချီနေသော တိုက်ခန်းများကို ဝယ်သူများသည် ငွေကြေးပိုလျှံ၍ ဝယ်ယူသူ များပေလိမ့်မည်။ ထို့အတွက် ဝမ်းနည်းစရာ မရှိဟု ဆိုကောင်းဆိုနိုင်သည်။ သို့သော် ၎င်းနှင့် ပတ်သက်ဆက်နွှယ်နေသည့် လုပ်ငန်းများလည်း ထိခိုက်သွားနိုင်ခြင်းများ ရှိနေသည်။ ပဲလောက ကမောက်ကမ တစ်ခါဖြစ်လျှင်ပင် ၎င်းနှင့်ပတ်သက်သည့် ဈေးကွက်တစ်ခုလုံးတွင် ရိုက်ခတ်မှုများစွာရှိသည်။ ရာခိုင်နှုန်း ၂ဝ ငွေချေစနစ်ဖြင့် ရောင်းချနေသည့် တိုက်ခန်းများနှင့် ပတ်သက်၍ ဝယ်ယူသူများ အနေဖြင့် တစ်စုံတစ်ရာ အာမခံချက် မရှိခြင်းသည် စွန့်စားရမှုတစ်ခုပင် ဖြစ်သည်။ အဘယ်ကြောင့်ဆိုသော် မြေသည် ငှားရမ်းမြေ ဖြစ်နေသည့်အတွက် လုပ်ငန်းရှင်ဘက်မှ ငွေပေးရန် ပျက်ကွက်ပါကလည်း အစိုးရက ပြန်သိမ်းနိုင်သည့်အတွက် ဖြစ်သည်။

ကွန်ဒိုဥပဒေမှာ နိုင်ငံခြားသား ပိုင်ဆိုင်ခွင့်ပေးတာ ကောင်းလား

လက်ရှိအချိန်တွင် ကွန်ဒို Law ကို လွှတ်တော်ထဲတွင် ဆွေးနွေးနေဆဲ ဆိုသော်လည်း နိုင်ငံခြားသားပိုင်ဆိုင်ခွင့် ပေးမည်ဆိုသည့်အသံ ထွက်နေသည်။ လေ့လာသုံးသပ်သူများကတော့ ကွန်ဒိုဥပဒေတွင် နိုင်ငံခြားသားပိုင်ဆိုင်ခွင့် ပြုပေးခြင်းသည် ကောင်းသည်။ သို့သော် ယခုလို ခွင့်ပြုပေးသည့် နေရာမှာ ဈေးကစားဖို့ ဝယ်ယူခြင်းမျိုးကို ခွင့်ပြုမပေးသင့်ဘဲ နေထိုင်ရန်အတွက်သာ ဖြစ်သင့်ကြောင်း သုံးသပ်ကြသည်။ ထို့ကြောင့် နောက်ထပ်လိုအပ်သည့် နည်းဥပဒေကို ထုတ်ပြန်ရန် လိုအပ်ပြီး ယင်းဥပဒေတွင် အသုံးပြုရန်အတွက်သာ ဖြစ်ရမည်ဆိုသည်ကို ထည့်သွင်းပြဋ္ဌာန်းသင့်ကြောင်း ထောက်ပြပြောဆိုကြသည်။ ဥပမာ နိုင်ငံခြားသားကို အိမ်ဝယ်ခွင့်ပေးသော်လည်း မြန်မာပြည်က ပြန်ထွက်ပါက တစ်နှစ်အတွင်း အိမ်ပြန်ရောင်းရမည်ဟု နည်းဥပဒေဖြင့် ထိန်းချုပ်နိုင်သည်။ ဥပမာ တရုတ်နိုင်ငံတွင် အိမ်ဝယ်မည်ဆိုပါက အစိုးရထံမှ ငွေချေးယူ၍ ရသည်။ သို့သော် ပထမအိမ်အတွက်သာ ရသည်။ ရာခိုင်နှုန်း ၂ဝ လောက်သာ လက်ငင်းငွေချေရပြီး ကျန်တာချေးငွေဖြင့် ရောင်းပေးသည်။ ဥပမာ စင်ကာပူဆိုလျှင် ရှင်းသည်။ နိုင်ငံခြားသားများ အိမ်လာဆောက်ခွင့် ရသည်။ သို့သော် အဆိုပါ Project ကို ငါးနှစ်အတွင်း အပြီးဆောက်ရမည်။ ရောင်းလျှင် တစ်နှစ်အတွင်း အပြီးရောင်းရမည်ဟု ပြန်ချုပ်ထားသည်။ မကုန်လျှင် ဒဏ်ရိုက်သည်။ 

ဘယ်လိုဖြေရှင်းမလဲ

ယင်းကဲ့သို့ မသေချာ မရေရာသော အနေအထားမှာပင် ဝယ်ယူသူတို့က သူ့ထက်ငါ အလုအယက် ဝယ်ချင်ကြသည်။ အဘယ်ကြောင့် ယင်းတိုက်ခန်းများကို အသည်းအသန် လိုအပ်နေကြသနည်းဟု မေးစရာရှိသည်။ (၁) ပိုင်ဆိုင်မှုများ အချိုးမညီခြင်းမှာလည်း အကြောင်းရင်းတစ်ခု ဖြစ်နေသည်။ (၂) မြေတွင် ရင်းနှီးမြုပ်နှံမှု များသည့်အတွက် ဈေးနှုန်းများ အလွန်အမင်း ကြီးမြင့်နေမှုဖြစ်ပြီး (၃) မှာ မြို့ပြရွှေ့ပြောင်း နေထိုင်မှုများကြောင့် ဖြစ်သည်။ ယင်းပြဿနာအား အစိုးရက ဖြေရှင်းပေးနိုင်မည်လား မေးစရာ ရှိလာသည်။

Eleven Media Group