ပြီးခဲ့တဲ့ သြဂုတ်လအထိ တနိုင်ငံလုံးမှာ လူပေါင်း ၁၃၀၀၀ ကျော် သွေးလွန်တုပ်ကွေးဖြစ်ခဲ့ပြီး ၆၈ ယောက်သေခဲ့ တယ်လို့ ပြည်သူ့ကျန်းမာရေးဦးစီးဌာနက ထုတ်ပြန်ပါတယ်။
၂၀၁၉ ခုနှစ် ဇန်နဝါရီလကနေစပြီး ဇွန်လ ၂၉ ရက်နေ့အထိ သွေးလွန်တုပ်ကွေးရောဂါ ဖြစ်ပွားသူ ၅၇၀၀ ကျော်ရှိပြီး သေဆုံးသူ အယောက် ၂၀ ရှိတယ်လို့ ကျန်းမာရေးနဲ့ အားကစားဝန်ကြီးဌာန တာဝန်ရှိသူတယောက်က ပြောဆိုခဲ့တာကြောင့် ဇူလိုင်၊ သြဂုတ် ၂ လတည်းမှာတင် လပေါင်း ၇၃၀၀ ကျော်ထပ်ဖြစ်ပြီး ၅၀ လောက်သေဆုံးခဲ့တာပါ။
ဇွန်လ နောက်ဆုံးပတ်ထဲမှာ လူပေါင်း ၉၀၀ သွေးလွန်တုပ်ကွေးဖြစ်ခဲ့ပြီး မနှစ်က ဖြစ်တာထက် ပိုများနေတယ်လို့လည်း ဆိုပါတယ်။
အဖြစ်အများဆုံးဒေသတွေကတော့ ဧရာဝတီတိုင်း၊ ရန်ကုန်တိုင်း၊ ရခိုင်ပြည်နယ်၊ ကချင်ပြည်နယ်နဲ့ မွန်ပြည်နယ်တို့ ဖြစ်ပါတယ်။
ဖြစ်တာများတာက ဧရာဝတီတိုင်းဖြစ်ပြီး ၂၃၅၀ ယောက်ဖြစ်တာမှာ ၈ ယောက်သေခဲ့ပါတယ်။ ရန်ကုန်တိုင်းမှာတော့ သေနှုန်း အများဆုံးဖြစ်ပြီး ၂၀၃၁ ယောက် ဖြစ်တာမှာ ၁၉ ယောက် သေဆုံးခဲ့ပါတယ်။
သွေးလွန်တုပ်ကွေးဟာ အရင်က အသက် ၁၅ နှစ်အောက်တွေမှာ အဖြစ်များပေမယ့် ခုတော့ အသက်အရွယ်မရွေးဖြစ်နေပြီး အေဒီးစ်ခြင်ကျားကိုက်ခံရတာကြောင့် ဖြစ်ပါတယ်။
ဒီရောဂါဟာ မိုးရာသီမှာ အဖြစ်များပေမယ့် တချို့ တိုင်းနဲ့ ပြည်နယ်တွေမှာတော့ တနှစ်လုံးဖြစ်တတ်ပါတယ်။ အခုဖြစ်တာမှာတော့ အသက် ၅ နှစ်ကနေ ၉ နှစ်အရွယ်ကလေးတွေမှာ အဖြစ်များနေပြီး ဖြစ်ပွားသူစုစုပေါင်းရဲ့ ထက်ဝက်လောက်ရှိနေပါတယ်။
ပြီးတော့ သွေးလွန်တုပ်ကွေးဟာ ရာသီအကူးအပြောင်းမှာ ဖြစ်တတ်တဲ့ တုပ်ကွေးလက္ခဏာ တွေနဲ့ မကွာခြားလို့ ဂရုစိုက်ဖို့လိုတယ်လို့ ကျန်းမာရေးဌာနက သတိပေးထားပါတယ်။
စိုးရိမ်ရတဲ့လက္ခဏာတွေကတော့ ၂ ရက်ကနေ ၇ ရက်လောက်အထိဖျားပြီး ဂနာမငြိမ် ဖြစ်တာ၊ မှိန်းတာ၊ ခြေလက် အေးစက်တာ၊ အစာ/ရေ မဝင်လောက်အောင် အန်တာ၊ ကော်ဖီရောင်အရည် အန်တာ၊ ဝမ်းမည်းမည်းသွားတာ၊ ကိုယ်ပူချိန်ရုတ်တရက်ကျသွားတာတွေ ဖြစ်ပြီး ဆေးရုံ ဆေးခန်းကို အမြန်ဆုံးသွားဖို့ တိုက်တွန်းထားပါတယ်။ ရောဂါကို ကာကွယ်နိုင်ဖို့အတွက်ကတော့ ခြင်မကိုက်အောင် နေဖို့နဲ့ ခြင်ကိုနှိမ်နင်းဖို့ လိုပါတယ်။
၂၀၁၈ ခုနှစ်တုန်းကတော့ သွေးလွန်တုပ်ကွေးကြောင့် တနိုင်ငံလုံးမှာ လူပေါင်း ၁၀၀ ကျော် သေဆုံးခဲ့ပါတယ်။
DVB
No comments:
Post a Comment