စစ်ကိုင်းတိုင်းအတွင်း သစ်တောဦးစီးဌာနရဲ့ ထိန်းသိမ်းမှုအောက်မှာရှိတဲ့ ကြိုးဝိုင်း၊ ကြိုးပြင်ကာကွယ်တောအတွင်းက အစုအဖွဲ့လိုက်ရှိနေတဲ့ ကျေးရွာမြေ၊ လယ်မြေနဲ့ သာသနာမြေ၊ အများပိုင်မြေတွေကို စိစစ်ကာ သစ်တောမြေအဖြစ်ကနေ ပယ်ဖျက်ပေးနိုင်အောင် လုပ်ဆောင်နေတယ်လို့ တိုင်းသစ်တောဦးစီးဌာနက ပြောပါတယ်။
စစ်ကိုင်းတိုင်းအတွင်း သစ်တောမြေဧက ၉၃ သိန်းကျော်ရှိပြီး အဲဒီထဲက သစ်တောအတွင်း ကျူးကျော်ကာ နေထိုင်တာ၊ လယ်ယာစိုက်ပျိုးမွေးမြူရေးလုပ်ဆောင်တာ အပါအဝင် သစ်တောကျူးဧကပေါင်း ၄၁၇၈၀၀ ဧကကျော်ရှိနေပါတယ်။
အဲဒီထဲက သစ်တောမြေအတွင်းပါဝင်ခဲ့တဲ့ လယ်မြေ ၂၃၆၈၀ ဧကကျော်၊ ရွာမြေ ၃၅၂၉ ဧကကျော်၊ သာသနာနဲ့ အများပိုင်မြေ ၂၂၄၆ ဧကကျော်ကို သစ်တောမြေအဖြစ်ကနေ ပယ်ဖျက်ခဲ့ပြီးဖြစ်ပါတယ်။
ပယ်ဖျက်ဖို့ ကျန်ရှိနေတဲ့ ပြန့်ကျဲတောတိုက်၊ တဲစုတွေရဲ့ လယ်မြေ ၉၆၄၂ ဧကကျော်နဲ့ အနီးအနားကျေးရွာတွေက ကျူးကျော်လယ်မြေ ၄၇၇၅၂ ဧကကျော်ကိုလည်း စိစစ်နေပါတယ်လို့ ဆိုပါတယ်။
ကျန်ရှိနေတဲ့ မြေတွေကိုလည်း စိစစ်နေပြီး စက်တင်ဘာ ၁၅ ရက်နေ့မတိုင်မီ ဝန်ကြီးဌာနကို တင်ပြနိုင်အောင် လုပ်ဆောင်နေတယ်လို့ တိုင်းသစ်တောဦးစီးဌာန တာဝန်ရှိသူက ပြောပါတယ်။
“ပြည်ထောင်စုဝန်ကြီးရုံးရဲ့ အမိန့်နဲ့ သစ်တောကျူးအတွင်းက ဧကပေါင်း ၂၉၄၅၀ ကျော်ကို သစ်တောမြေအဖြစ်ကနေ ပယ်ဖျက်ပေးထားပြီးဖြစ်ပါတယ်။ ကျန်တာတွေကိုလည်း စိစစ်နေပါတယ်။ ယာမြေတွေကိုတော့ သစ်တောပြန်ဖြစ်နိုင်သေးတဲ့အတွက် ပယ်ဖျက်တဲ့ စာရင်းမှာ မပါပါဘူး။ ယာမြေ ၁ ဧကကို အပင် ၁၅၀ ရောနှောစိုက်ခင်း ဒါမှမဟုတ် အစုအဖွဲ့ပိုင်သစ်တော စိုက်ဖို့ လုပ်ဆောင်နေပါတယ်။ လက်မခံရင်တော့ တရားစွဲဆိုတာတွေ လုပ်ဆောင်ရမှာပါ။ လက်ရှိမှာလည်း သစ်တောဥပဒေနဲ့ တရားစွဲဆိုထားတာတွေ ရှိပါတယ်” လို့ စစ်ကိုင်းတိုင်းသစ်တောဦးစီးဌာန ညွှန်ကြားရေးမှုး ဦးသန်းစိုးက ပြောပါတယ်။
တိုင်းအတွင်းက သစ်တောမြေတွေအတွင်း အိမ်ခြေ ၅၀ အထက် ပြည်ထဲရေးအမည်ပေါက်ကျေးရွာ ၁၀၂ ရွာ၊ ဧကပေါင်း ၅၄၆၀၀ ကျော်ရှိပြီး အိမ်ခြေ ၅၀ အောက်ကျေးရွာ ၇၂ ရွာရှိကာ ဧကပေါင်း ၃၃၇၀၀၀ ကျော်ရှိပါတယ်။
သစ်တောကျူးတွေကို ကန့်ဘလူခရိုင်နှင့် ကသာခရိုင်တွေမှာ အများဆုံးဖြစ်ပြီး ၂၀၁၃ ခုနှစ်နောက်ပိုင်းမှာ ကျူးကျော်သူတွေကိုတော့ သစ်တောဥပဒေပုဒ်မ ၄၀(က) အရ တရားစွဲဆိုနေပြီး ၂၀၁၇-၁၈ ခုနှစ်မှာ တရားစွဲဆိုမှု ၁၂ မှုနှင့် ၂၀၁၈-၁၉ ခုနှစ်အတွင်း ဒီနေ့အထိ ၁၃ မှု ရှိတယ်လို့ ဆိုပါတယ်။
စစ်ကိုင်းတိုင်းဒေသကြီးအတွင်း သစ်တောကြိုးဝိုင်း ၁၆၁ ခု စုစုပေါင်းဧရိယာ ၅၀ ဧကသိန်းကျော်၊ ကြိုးပြင်ကာကွယ်တော ၁၀၄ ခု စုစုပေါင်းဧရိယာ ၁၆ ဧကသိန်းကျော်နှင့် သဘာဝထိန်းသိမ်းနယ်မြေ တည်ထောင်ပြီး ၅ ခုနှင့် အဆိုပြု ၅ ခု စုစုပေါင်း ဧရိယာ ၂၆ ဧကသိန်းကျော်ရှိကာ စစ်ကိုင်းတိုင်းအတွင်း သစ်တောနယ်မြေ စုစုပေါင်း ၉၃ ဧကသိန်းကျော်ရှိပြီး သစ်တောမြေဖွဲ့စည်းနိုင်မှု တိုင်းဧရိယာရဲ့ ၄၀%ရှိတယ်လို့ သစ်တောဦးစီးဌာနက သိရပါတယ်။
No comments:
Post a Comment