ရေဘေးသင့်ဒေသတွေမှာ စိုက်ပျိုးရာသီအမီ လယ်ယာမြေပြန်လည်ထူ ထောင်ဖို့ အရေးတကြီး လိုအပ်နေ ပြီး ဒီအတွက် စိတ်ပူမိတယ်လို့ အမေရိကန်ပြည်ထောင်စု ဖွံ့ဖြိုးမှုအေဂျင်စီ မြန်မာရုံးခွဲဒါရိုက်တာက ပြောဆို လိုက်ပါတယ်။ မြန်မာပြည် တ၀ှမ်း ရေဘေးဒဏ် ခံခဲ့ရတဲ့ ပြည်သူတွေ အတွက် ပြန်လည် ထူထောင်ရေး လုပ်ငန်းတွေကို ကွင်းဆင်းလေ့လာပြီးတဲ့ နောက်မှာ အခုလို ပြောဆို လိုက်တာလည်း ဖြစ်ပါတယ်။
ဇွန်လလယ်လောက်က စတင်ပြီး မိုးများခဲ့တာနဲ့ ဆိုင်ကလုန်း ကိုမင်ကြောင့် မြန်မာပြည်အနှံရေလွှမ်း မိုးတာ၊ မြေပြိုတာ၊ ရွှံနွံ့တွေ ဖုံးလွှမ်းတာတွေဖြစ်ပွားခဲ့သလို လယ်မြေ ဧကသိန်းနဲ့ချီပြီး ထိခိုက် ပျက်ဆီးတာတွေဖြစ် ခဲ့ပါတယ်။
ရေဘေးသင့်ဒေသ ပြန်လည်ထူထောင်ရေးအတွက် အမေရိကန်သံအမတ်ကြီး ကိုယ်တိုင်လည်း ကွင်းဆင်း လေ့လာပြီးတဲ့နောက်မှာ အခုလိုလယ်ယာ မြေပြန်လည် ထူထောင်ရေးကို အချိန်မီဆောင်ရွက်နိုင်ရေး အတွက် စိုးရိမ်မိကြောင်း အမေရိကန်ပြည်ထောင်စု ဖွံ့ဖြိုးမှုအေဂျင်စီ USAID မြန်မာရုံးခွဲဒါရိုက်တာ Chris Milligan က ပြောဆိုလိုက်တာဖြစ်ပါတယ်။
"အမေရိကန်အစိုးရအနေနဲ့ ရေဘေးဒဏ်ကြောင့် အသက်အိုးအိမ်ဆုံးရှုံးခဲ့ရ တဲ့ ဒုက္ခသည်တွေအတွက် အရမ်းစိုးရိမ်ပူပန်မိပါတယ်။ ရေဘေးဒဏ်ပြင်းပြင်း ထန်ထန် ခံခဲ့ရတဲ့ ဒုက္ခသည်တွေအတွက် အမေရိကန် ဒေါ်လာ ၆ သန်း ကူညီထောက်ပံ့ထားပါတယ်။ လတ်တလော သံအမတ်ကြီး Derek Mitchell ကိုယ်တိုင် လည်း ရေဘေးသင့်ခဲ့တဲ့ ရခိုင်ပြည်နယ်ကို သွားခဲ့ပါတယ်။ ကျွန်တော်တို့ လယ်သမားတွေ ပြန်လည်စိုက် ပျိုးကြဖို့ မျိုးစေ့ ၉ တန် သယ်သွားခဲ့ပါတယ်။ ကျွန်တော်တို့ အနေနဲ့ လယ်ယာမြေတွေ ပျက်စီးခဲ့တဲ့ လယ်သ မားတွေအတွက် အတော်လေး စိတ်ပူပါတယ်။ သူတို့ကို ကူညီဖို့ အချိန်ကလည်း တိုတယ်လေ။ ဒါကြောင့် ကျွန်တော်တို့ တက်နိုင်သမျှ ကြိုးစားပြီး မျိုးစပါး ၉ တန်ကို ပို့ပေးခဲ့တာပါ။ သံအမတ်ကြီး ကိုယ်တိုင်လည်း လယ်သမားတွေနဲ့ တွေ့ဆုံပြီး သူတို့ရဲ့ အခက်အခဲတွေအကြောင့် လေ့လာ ရင်း လိုအပ်တဲ့ အကူအညီတွေ ပေးခဲ့ပါတယ်။ "
ဒါ့အပြင် ချင်းပြည်နယ်အပါအဝင် အခြား ရေဘေးသင့်ဒေသတွေမှာလည်း သွားရောက်ကူညီခဲ့တယ်လို့ Mr. Milligan က ပြောပါတယ်။ ရေဘေးမှာ ပါဝင်ကူညီခဲ့ကြတဲ့ လူထုနဲ့ အရပ်ဖက်လူ့အဖွဲ့အစည်းတွေရဲ့ ပါဝင်မှုကလည်း နိုင်ငံတကာအလယ်မှာ အလွန်ကောင်းမွန်တဲ့ ဥပမာတစ်ခုဖြစ်ခဲ့တယ်လို့ Chris Milligan က အခုလိုပြောပါတယ်။
"အရပ်ဖက်လူ့အဖွဲ့အစည်းတွေရဲ့ မပြတ်မလပ်တဲ့ အကူအညီတွေကို ကြည့်ပြီး ကျေနပ်အားရမိပါတယ်။ မြန်မာလူမျိုးတွေရဲ့ သဒ္ဓါတရား ထက်သန်မှုဟာ နိုင်ငံတကာအလယ်မှာ စံပြဖြစ်ပြီးတော့ စည်းလုံးညီညွှတ် မှုရဲ့ ဥပမာတစ်ရပ်လည်းဖြစ်ပါတယ်။ "
ဒီရေဘေးဒဏ်အတွေ့အကြုံကနေ သင်ခန်းစာယူပြီး နောက်ထပ် ကြုံလာ နိုင်တဲ့ သဘာဝဘေးအန္တရာယ် တွေကို ကြိုတင်ကာကွယ်ဖို့ ကြိုးစားကြရ မယ်လို့ Chris Milligan က အကြံပြုပါတယ်။
"နိုင်ငံအတော်များများအတွက် လူသားချင်းစာနာမှုအကူအညီတွေ ပေးရတာ စိန်ခေါ်ချက်တစ်ရပ်ပါပဲ။ ကျွန်တော်တို့အနေနဲ့ မြန်မာကြက်ခြေနီအသင်းနဲ့ အစိုးရဌာနတွေရဲ့ အကူအညီပေးမှုတွေကို မြင်ရတာ အရမ်းအားရမိပါတယ်။ ဒါပေမယ့်လည်း သဘာဝဘေးအန္တရာယ် ကယ်ဆယ်ရေးကတော့ ကျွန်တော် တို့ အမေရိကန်ပြည်ထောင်စုလည်း အပါအဝင် ဘယ်နိုင်ငံမှာမှ ပြီးပြည့်စုံ တယ် ဆိုတာမရှိပါဘူး။ဒါကြောင့် ကျွန်တော်တို့အနေနဲ့အစိုးရရော အရပ်ဖက်လူ့အဖွဲ့အစည်းတွေကိုရောပါ ဆက်လက် ကူညီထောက်ပံ့နေ မှာဖြစ်ပါတယ်။ ဒီရေဘေးကယ်ဆယ်ရေးကနေ သင်ခန်းစာတွေယူပြီး နောက်လာမယ့် သဘာဝဘေး အန္တရာယ်တွေကို ကြိုတင်ကာကွယ်ဖို့ ကြိုးစားကြရပါမယ်။"
USAID အဖွဲ့ဟာ ၂၀၀၀ ပြည့်နှစ်ကတည်းက မြန်မာနိုင်ငံမှာ လူသားချင်း စာနာမှုဆိုင်ရာ အကူအညီတွေ ပေးနေတာဖြစ်ပြီး ၂၀၀၈ ခုနှစ်က တိုက်ခက်ခဲ့တဲ့ နာဂစ် ဆိုင်ကလုန်းမုန်တိုင်းလွန် ပြန်လည် ထူထောင်ရေး တွေမှာလည်း အထောက်အပံ့တွေ ပေးခဲ့ပါတယ်။ ဒါ့အပြင် လူ့အခွင့်အရေးဆောင်ရွက်နေတဲ့ အရပ်ဖက်လူ့ အဖွဲ့အစည်းတွေကိုလည်း အထောက်အပံ့တွေ ပေးနေတာ ဖြစ်ပါတယ်။
VOA
No comments:
Post a Comment