တိုင်းရင်းသားဒေသတွေမှာ NLD ၀င်ရောက်ယှဉ်ပြိုင်တာဟာ ဗဟိုအစိုးရတရပ်အနေနဲ့ တိုင်းရင်းသား အခွင့်အရေးအပြည့်အဝ ကာကွယ်ပေးဖို့ အတွက်ဖြစ်တယ်လို့ ကယားပြည်နယ် စည်းရုံးရေး ခရီးစဉ်မှာ ဒေါ်အောင်ဆန်းစုကြည် ကပြောဆို လိုက်ပါတယ်။
NLD အနေနဲ့ စစ်မှန်တဲ့ ဒီမိုကရေစီ စနစ်လက်တွေ့ အကောင်အထည်ဖေါ်ပေးနိုင်မယ်ဆိုရင် တိုင်းရင်းသား တွေရဲ့ထောက်ခံ မဲအပြည့်ရမှာဖြစ်တယ်လို့ အဝေးရောက် တိုင်းရင်းသားတွေထဲမှာ သုံးသပ်သူတွေ ရှိပါ တယ်။
နိုင်ငံရေးပါတီတွေရဲ့ ရွေးကောက်ပွဲ စည်းရုံးရေးတွေကို စက်တင်ဘာလ (၈)ရက်နေ့မှာ တရားဝင် စတင် ခွင့်ရပြီးနောက် အမျိုးသားဒီမိုကရေစီအဖွဲ့ချုပ် NLD ဥက္ကဋ္ဌ ဒေါ်အောင်ဆန်းစုကြည်ဟာ ကယားပြည်နယ် စည်းရုံးရေး ခရီးစဉ်ကို မနေ့က စတင်လိုက်တာပါ။
ဒီမောဆိုခရီးကို လာကြိုကြတဲ့တိုင်းရင်းသားတွေ။ အထူးသဖြင့် တိုင်းရင်း သားဒေသတွေမှာ NLD ပါတီကြီး အနေနဲ့ ဘာကြောင့် ၀င်ရောက်ယှဉ်ပြိုင် သလဲ ဆိုတာကို ဒေါ်အောင်ဆန်းစုကြည်က တက်ရောက်လာတဲ့ တိုင်းရင်း သားပြည်သူတွေကို အခုလို ပြောသွားပါတယ်။
”ကျမတို့ဟာ တခြားပါတီအဖွဲ့အစည်းတွေနဲ့ ယှဉ်ပြီးတော့ အဖွဲ့ချုပ်ရဲ့ ကိုယ်စားလှယ်တွေဟာ အရွေးခံမှာ ပါ။ ဒီလိုကျမတို့ အရွေးခံတာဟာ တိုင်းရင်းသားတွေရဲ့ အခွင့်အရေးတွေကို ကျမတို့ နည်းသွားစေချင်လို့ မဟုတ်ပါဘူး။ ဗဟိုအစိုးရတခုဖွဲ့ပြီးတော့ တိုင်းရင်းသားတွေရဲ့အခွင့်ရေးတွေ ကို ပြည့်ပြည့်၀၀ ကာကွယ် စောင့်ရှောက်မြင့်တင်ပေးချင်လို့ဖြစ်ပါတယ်။ ဗဟိုအစိုးရသာ လုပ်နိုင်မှာဖြစ်ပါတယ်။”
ဒါအပြင် မြန်မာနိုင်ငံမှာ စစ်မှန်တဲ့ အပြောင်းအလဲဖြစ်ဖို့ အခွင့်ကောင်းရတဲ့ အချိန်ဖြစ်တာကြောင့် ရွေး ကောက်ပွဲမှာ မဲပေးကြဖို့ လည်း ဒေါ်အောင်ဆန်း စုကြည် က တိုက်တွန်းသွားပါတယ်။
“အခုအချိန်မှာ တကယ့်စစ်မှန်တဲ့ ပြည့်ဝတဲ့ ဒီမိုကရေစီစနစ် တခုဘက်ကို ပြောင်းဖို့ အခွင့်အရေးနောက် တခုရလာတာပါ။ ဒီအခွင့်အရေးကို ကျမတို့ လက်မလွှတ်ဖို့ လိုပါတယ်။ အခု နိုဝင်ဘာလ ၈ ရက်နေ့မှာ ကျင်းပဖို့ရွေး ကောက်ပွဲဟာ ကျမတို့နိုင်ငံ အနာဂတ်အတွက်အင်မတန်မှ အရေးကြီး ပါတယ်။”
အခုလို တိုင်းရင်းသားဒေသတွေမှာ အတိုက်အခံပါတီကြီးဖြစ်တဲ့ NLD အပါအ၀င် လက်ရှိအာဏာရ ကြံခိုင် ဖွံဖြိုးရေးပါတီကြီးတွေ လာရောက်ယှဉ် ပြိုင်တာ ဟာ ဒေသခံ တိုင်းရင်းသားပါတီတွေရဲ့ အခန်းကဏ္ဍကို လျော့နည်း စေတယ်လို့ တိုင်းရင်းသားပါတီတချို့ကဝေဖန်ပြောဆိုနေကြတာပါ။
ဒါပေမဲ့လည်း NLD ကစစ်မှန်တဲ့ ဒီမိုကရေစီကိုသာ လက်တွေ့ အကောင် အထည်ဖေါ်နိုင် မယ် ဆိုရင် တိုင်းရင်းသားတွေဘက်က NLD ကိုမဲတွေပေးမှာဖြစ်တယ်လို့ အမေရိကန်ပြည်ထောင်စုရောက် ချင်းနိုင်ငံ ရေးသမားတဦး ဖြစ်တဲ့ ဦး Valthang က ပြောပါတယ်။
“Free and Fair Election လုပ်ခဲ့ရင် တိုင်းရင်းသားတွေက လွတ်လွတ်လပ် လပ် အချုပ်ချယ် မရှိပဲနဲ့ သူတို့စိတ်ရင်းမှာရှိတဲ့ လူကိုတော့ မဲပေးမှာပဲ ထင်တယ်။ ဒါကြောင့်မို့လို့ ဒေါ်စုတို့က ဒီမိုကရေစီအရေးကို ဦးစားပေးပြီး တော့ ဒီ policy တွေ ချထားတယ်ဆိုရင် သူ့ကိုပဲ မဲပေးမှာပါ။”
ပြီးခဲ့တဲ့ စက်တင်ဘာလ (၅)ရက်နေ့က ပအို့ဝ်ကိုယ်ပိုင်အုပ်ချုပ်ခွင့်ရဒေသကို ပထမဆုံးအကြိမ်သွားခဲ့တဲ့ စည်းရုံးရေးခရီးစဉ်မှာလည်း စစ်မှန်တဲ့ ဖယ်ဒရယ် ပြည်ထောင်စု စနစ် တည်ဆောက်ဖို့ NLD အနေနဲ့ တစိုက်မတ်မတ်ကြိုးစား ခဲ့တယ်လို့ ဒေါ်အောင်ဆန်းစုကြည်ကပြောသွားပါတယ်။
၂၀၁၅ ရွေးကောက်ပွဲအတွက် ဒေါ်အောင်ဆန်းစုကြည်ရဲ့ တိုင်းရင်းသား ဒေသ စည်းရုံးရေး ခရီးစဉ်တွေ တွင်း လူထုဟောပြောပွဲတွေမှာ ဒေသခံ တိုင်းရင်းသားပြည်သူတွေထောင်နဲ့ချီပြီး တက်ရောက်ခဲ့ကြပါတယ်။
VOA
No comments:
Post a Comment