ဇမ္ဗူသီရိမြို့နယ် မဲဆန္ဒနယ်နေရာကို ပြည်ခိုင်ဖြိုးပါတီ အနေဖြင့် လွှတ်တော် ကိုယ်စားလှယ်လောင်းနေရာ လျာထားခြင်း မရှိဘဲ သမ္မတ ဦးသိန်းစိန် အတွက် ချန်လှပ်ပေးထားပြီး ပြိုင် မပြိုင်မှာ ၎င်း၏ ဆန္ဒသာဖြစ် ကြောင်း ဇူလိုင် ၂၉ ရက်က ရန်ကုန်မြို့ရှိ ရန်ကုန်တိုင်းဒေသကြီး ပြည်ထောင်စု ကြံ့ခိုင်ရေးနှင့် ဖွံ့ဖြိုးရေး ပါတီရုံး၌ ပြုလုပ်သည့် လွှတ်တော်ကိုယ်စားလှယ် လောင်းအဖြစ် အသိအမှတ်ပြုတာ ၀န်ပေးအပ်ပွဲအပြီး ပြုလုပ်သည့် သတင်းစာရှင်းလင်းပွဲတွင် ပြည်ခိုင်ဖြိုးပါတီမှ အထွေထွေအတွင်းရေးမှူး ဦးမောင်မောင်သိမ်း က ပြောကြားသည်။
“သမ္မတကြီးရဲ့ မူလမဲဆန္ဒနယ်မြေ ဇမ္ဗူ သီရိမြို့နယ် နေရာကို အခုချိန်အထိ ကျွန်တော်တို့က honour လုပ်တဲ့ အနေနဲ့ ဘယ်သူမှ လျာထားခြင်း မရှိသေး ပါဘူး။ သမ္မတကြီး ဆုံးဖြတ်ဖို့ပဲ လိုပါတယ်” ဟု ဦးမောင်မောင်သိမ်းက ပြောကြားသည်။
ထို့ပြင် ယခုလက်ရှိ အချိန်တွင် ပြည်ခိုင်ဖြိုးပါတီ အနေဖြင့် ပါတီအောင် နိုင်ရေးကိုသာ အဓိကထား လုပ် ဆောင်နေပြီး သမ္မတလောင်းအား ရွေးချယ်ထားခြင်း မရှိသေးကြောင်း ၎င်းက ဆက်လက်ပြောကြားသည်။
“ကျွန်တော်တို့ ပါတီသာ ဦးဆောင်ခွင့်ရရင် ဖက်ဒရယ်ပြည်ထောင်စုကို ဦးတည်ပြီး သွားမှာပါ။ သမ္မတကြီးနဲ့ ပတ်သက်ပြီး ကျွန်တော်တို့ ဘာမှ မသိရသေးပါဘူး။ သမ္မတလောင်း ရွေးချယ်မှုနဲ့ ပတ်သက်လို့ ဒီချိန်မှာ ဘာမှ မရွေးသေးပါဘူး။ ပါတီအောင်နိုင်ရေးကို အရင်ဆုံးသွားပါမယ်။ ပါတီအောင်နိုင်ပြီးမှ ဆုံးဖြတ်ပါမယ်။ ဒါကို ပါတီကပဲ ဆုံးဖြတ်မှာ ဖြစ်ပါတယ်။ တချို့လည်း သဘောထားတူတယ် မတူဘူးဆိုတာ ဒီမိုကရေစီ နည်းလမ်းအရ ရှိနေမှာပဲ။ ဒါပေမဲ့ ဒီမိုကရေစီ နည်းလမ်းအရ ဆုံးဖြတ်တဲ့ အခါတော့ လိုက်နာရမှာ ဖြစ် တယ်” ဟု ဦးမောင်မောင်သိမ်းက ရှင်းပြသည်။
ဆက်လက်၍ ၂၀၁၅ ခုနှစ် နိုဝင်ဘာ ၈ ရက်တွင် ကျင်းပမည့် အထွေထွေ ရွေးကောက်ပွဲတွင် သမ္မတရုံး ၀န်ကြီး လေးဦးမှာ ၂၀၁၀ တွင် ယှဉ်ပြိုင်ခဲ့သည့် ၎င်းတို့ မဲဆန္ဒနယ်မှသာ ယှဉ်ပြိုင်သွားမည်ဖြစ်ပြီး ဦးစိုးသိန်းနှင့် ဦးအောင်မင်း သည် ကယားပြည်နယ်အတွင်း ၀င်ရောက်ယှဉ်ပြိုင်ရန် အဆိုပြုလာသဖြင့် ပြည်ခိုင်ဖြိုးပါတီမှ မူလနယ်မြေများတွင်သာ ၀င်ရောက်ယှဉ်ပြိုင်ရန် အကြံပြုစာ ပေးပို့ထားကြောင်း ၎င်းက ပြောကြားသည်။
“သမ္မတရုံးဝန်ကြီးဦးလှထွန်း သူ့ရဲ့မူလမဲဆန္ဒနယ်ဖြစ်တဲ့ကျောက်ပန်းတောင်း ကနေ ပြန်အရွေးခံပါ့မယ်။ ပြီးတော့ ဦးတင်နိုင်သိန်းကလည်း အရင်မဲဆန္ဒနယ် ကလောကနေရွေးပါမယ်။ သမ္မတရုံးဝန်ကြီး ဦးသိန်းညွန့် ကလည်း မူလမဲဆန္ဒနယ်ဖြစ်တဲ့ မအူပင်ကနေ ပြန်ရွေးပါ့မယ်။ သမ္မတရုံးဝန်ကြီး ဦးစိုးမောင်ကလည်း အရင် မဲဆန္ဒနယ်မြေဖြစ်တဲ့ ရေစကြိုကနေ ပြန်ရွေး ပါ့မယ်။ ပြီးတော့ သမ္မတရုံးဝန်ကြီး ဦးစိုးသိန်းနဲ့ ဦးအောင်မင်း တို့ကတော့ ကယားပြည်နယ်ကနေ ပြီးတော့မှ အမျိုးသားလွှတ်တော်ကနေ သွားပြီး အရွေးခံမယ်လို့ သူတို့ဘက်က ပါတီကို အဆိုပြုတယ်။ ဒါပေမဲ့ ကျွန်တော် တို့က မသင့်တော်ပါဘူးလို့ မူလ မဲဆန္ဒနယ် မြေဖြစ်တဲ့ ဦးအောင်မင်းဆိုရင် တောင်ငူ၊ ဦးစိုးသိန်းဆိုရင် ကျွန်းစု၊ ကျွန်းစုမြို့နယ်မှာ ဆိုရင် ဦးစိုးသိန်းက ပြိုင်ဘက်မရှိ အရွေးချယ် ခံခဲ့ရတယ်။ အဲဒီတော့ မူလမဲဆန္ဒနယ်မြေမှာ သူတို့ကို ရွေးချယ်ပြီး ထောက်ခံ မဲပေးခဲ့တဲ့ ပြည်သူလူထုကလည်း မျှော်လင့်နေပါတယ်။ အဲဒီကိုပဲ ပြန်ပြီးတော့ အဆိုပြုသင့်ပါတယ်လို့ ပါတီက အကြောင်းပြန်ခဲ့ပါတယ်။ တစ်သီးပုဂ္ဂလ အနေနဲ့ ပြိုင်တာ မပြိုင်တာကတော့ သူတို့သဘောပါပဲ” ဟု ဦးမောင်မောင်သိမ်းက ပြောကြားသည်။
Eleven Media Group
No comments:
Post a Comment