နေပြည်တော် သမ္မတအိမ်တော်တွင် ပြုလုပ်သော နိုင်ငံရေးခေါင်းဆောင်များဆွေးနွေးပွဲတွင် အခြေခံဥပဒေ ပြင်ဆင်ရေးနှင့်ပတ်သက်၍ ဥပဒေနှင့်အညီ လွှတ်တော်တွင်းမှာသာ ဆောင်ရွက်ရန် နိုင်ငံရေးပြဿနာ အားလုံးကို နိုင်ငံရေးနည်းလမ်းဖြင့်သာ တွေ့ဆုံဆွေးနွေးအဖြေရှာရန် နိုင်ငံရေးထိပ် သီးဆွေးနွေးပွဲတွင် သဘောတူခဲ့ကြောင်း သတင်းရရှိသည်။
ပထမဆုံးအကြိမ်တွေ့ဆုံ ဆွေးနွေးခြင်းဖြစ်၍ နည်းလမ်းကောင်းများရှာဖွေနိုင်ရန် ဆက်လက်တွေ့ ဆုံ ဆွေးနွေးပွဲများပြုလုပ်ရန် ဆွေးနွေးခဲ့ကြကြောင်းလည်း သမ္မတပြောရေးဆိုခွင့်ရှိသူ ဦးရဲထွဋ်က ဆွေးနွေးပွဲ အပြီး လုပ်သော သတင်းစာရှင်းလင်းပွဲ၌ ပြောသည်။ သို့သော် ဆွေးနွေးပွဲမှကြေညာချက် ထုတ်ပြန်ခြင်း မရှိပေ။
ဆွေးနွေးပွဲတွင် ၂၀၁၅ ရွေးကောက်ပွဲ၊ ငြိမ်းချမ်းရေး၊ လူမှုဘဝဖွံ့ဖြိုးတိုးတက်ရေး ဦးစားပေးလုပ်ဆောင်ရန် စသည်တို့ကို ဆွေးနွေးခဲ့ကြကြောင်း ဦးရဲထွဋ်က ပြောသည်။
‘‘အခြေအနေကောင်းတယ်လို့ပြောရမှာပေါ့။ ၂၀၁၅ မတိုင်မီ တစ်နိုင်ငံလုံး အပစ်အခတ်ရပ်စဲရေးဖြစ်မယ် လို့မျှော်လင့်တယ်။ အားလုံးလည်း ဒီလိုပဲ ဆန္ဒရှိတယ်။
ဒီလိုတွေ့ဆုံမှုမျိုးတွေဆက်ဖြစ်ဖို့ သမ္မတကကြိုးစားမယ်လို့ ပြောတယ်’’ဟု ဆွေးနွေးပွဲသို့ ညီနောင်တိုင်း ရင်းသားပါတီများ ဖက်ဒရေးရှင်း (NBF)ကိုယ်စားပြုတက်ရောက်ခဲ့သော ဦးစိုင်းအိုက်ပေါင်းက ပြောသည်။
ဆွေးနွေးပွဲတွင် ဒေါ်အောင်ဆန်းစုကြည်က တပ်မတော်နှင့် သဘောထားမတိုက်ဆိုင်မှုအချို့ရှိသော်လည်း မိမိသည် တပ်မတော်ကိုချစ်ခင်ကြောင်းပြောခဲ့သည်ဟုလည်း ဦးရဲထွဋ်က ပြောသည်။
ဆွေးနွေးပွဲမစမီ သမ္မတက အမျိုးသားနိုင်ငံရေးအင်အားစုများအားလုံးပူးပေါင်းဆောင်ရွက်ပြီးလုပ်ကိုင်ဆောင် ရွက်နိုင်မည့်နည်းလမ်းများ ရှာဖွေကြရန် ပွင့်ပွင့်လင်းလင်းဆွေးနွေးကြရန် တိုက်တွန်းပြောကြားခဲ့ကြောင်း ဦးရဲထွဋ်က ဆက်လက်ပြောသည်။
သမ္မတက ၂၀၁၄ နှစ်ကုန်ပိုင်း၊ ၂၀၁၅ အစပိုင်းတွင်တစ်နိုင်ငံလုံးအပစ် အခတ်ရပ်စဲရေး သဘောတူချက် လက်မှတ်ရေးထိုးနိုင်ရန်အရေးကြီးပြီး နိုင်ငံရေး ဆွေးနွေးပွဲများပြုလုပ်နိုင်ရေးအတွက် အခြေခံမူဘောင်များ ချမှတ်နိုင်မှသာ ၂၀၁၆ တွင် တက်လာမည့်အစိုးရကို မည်သူပဲတာဝန်ယူသည်ဖြစ်စေ တိုင်းရင်းသား အဖွဲ့များနှင့် ယုံကြည်စိတ်ချစွာ လုပ်ဆောင်နိုင်မည်ဖြစ်ကြောင်း ဆွေးနွေးခဲ့ သည်ဟု သတင်းရရှိသည်။
ဓာတ်ပုံ - သမ္မတရုံး
7Day Daily
No comments:
Post a Comment