ဝူဟန်ဗိုင်းရပ်စ် - တရုတ်ပြည်မကြီးတွင် ၄၄ ဦး ထပ်မံသေဆုံးပြီး၊ အီရန်နှင့် အီတလီတို့တွင် သေဆုံးမှုများ မြင့်တက်နေ

ဝူဟန်ဗိုင်းရပ်စ် ကူးစက်ခံရမှုကြောင့် ကြသပတေးနေ့တွင် ၄၄ ဦး ထပ်မံသေဆုံးပြီး ထပ်မံကူးစက်ခံရသူ ၃၂၇ ဦး ရှိကြောင်း ယနေ့ ဖေဖော်ဝါရီ ၂၈ ရက်တွင် တရုတ်ကျန်းမာရေး ကော်မရှင်က ထုတ်ပြန်လိုက်သည်။

အသစ်ထပ်မံသေဆုံးသူများအနက် ၄၁ ဦးမှာ ရောဂါကူးစက်မှုနှင့် သေဆုံးမှု အဆိုးရွားဆုံး ဖြစ်ပွားနေသည့် ဟူပေပြည်နယ်မှ ဖြစ်ပြီး မြို့တော် ဝူဟန်တွင် ၂၈ ဦး သေဆုံးခဲ့သည်။

လက်ရှိအချိန်အထိ တရုတ်ပြည်ပကြီးတွင် စုစုပေါင်း ၂၇၈၈ ဦး သေဆုံးထားပြီး ကူးစက်ခံရသည့် အမှုပေါင်း ၇၈,၈၂၄ အထိ ရှိခဲ့သည်။

တရုတ်နိုင်ငံပြင်ပ သေဆုံးမှုများတွင် အီရန်နိုင်ငံမှာ အဆိုးရွားဆုံးဖြစ်ပြီး ယမန်နေ့ သတင်းများအရ ၁၃ ဦး သေဆုံးမှုရှိရာ လက်ရှိအချိန်တွင် သေဆုံးသူ နှစ်ဆခန့် မြင့်တက်လာသဖြင့် စုစုပေါင်း သေဆုံးသူ ၂၆ ဦး အထိ ရှိသည်။

ထို့အပြင် အီတလီနိုင်ငံတွင် သေဆုံးသူ ၁၇ ဦးအထိ မြင့်တက်လာရာ သေဆုံးမှု အများဆုံး တတိယနိုင်ငံဖြစ်လာပြီး ကူးစက်ခံရသူ ၂၄၅ ဦး ရှိနေသည်။

တောင်ကိုရီးယားနိုင်ငံတွင် ရောဂါကူးစက်မှုနှုန်း မြင့်မားနေပြီး ၂၅၆ ဦး ထပ်မံကူးစက်ခံရသဖြင့် ဒုတိယအများဆုံး ကူးစက်ခံရသည့် နိုင်ငံ ဖြစ်လာသည်။ လက်ရှိအချိန်ထိ ကူးစက်ခံရသူ ၂၀၂၂ ဦးရှိသည်။

ရောဂါကူးစက်မှုသည် ကမ္ဘာ့နိုင်ငံပေါင်း၏ လေးပုံတစ်ပုံရှိပြီး တရုတ်နိုင်ငံ အပါအဝင် နိုင်ငံပေါင်း ၅၀ ကျော်သို့ ပျံ့နှံ့လာပြီဖြစ်သည်။

AS

Ref; straitstimes

Isee Media