အစိုးရရုံးစိုက်ရာ နေပြည်တော်အတွင်း ဩဂုတ် ၃၀ ရက် တွင်ရွေးကောက်ပွဲ ဆိုင်ရာ အသိပညာပေး ဟော ပြောသည့် အတိုက်အခံခေါင်းဆောင် ဒေါ်အောင်ဆန်းစုကြည်သည် ကန့်ကွက်ဆန္ဒပြမှုများ၊ ကန့်ကွက်စာ ဖြန့်ဝေမှု များနှင့် ကြုံတွေ့ခဲ့ရသည်။
နေပြည်တော်အတွင်းရှိ နေရာ ၅ နေရာတွင် ဟောပြောရန် လျာထားသည့် ဒေါ်အောင်ဆန်းစုကြည်၏ တတိယမြောက် ဟောပြောမည့် နေပြည်တော်၊ သပြေကုန်းရပ်ကွက်ရှိ အမျိုးသားဒီမိုကရေစီ အဖွဲ့ချုပ်ရုံး အနီးတွင် အသက် ၇၀ ကျော်အရွယ် ဦးစုဆိုသူက ဦးဆောင်ပြီး စုစုပေါင်း လူ ၂၀ ဦးခန့် ဆန္ဒပြခဲ့ခြင်း ဖြစ်သည်။
ဆန္ဒပြသူများက “အမျိုးကို ချစ်လျှင် လူလို သိပါ” “ရိုဟင်ဂျာကို ထောက်ခံ သည့် NLD ပါတီ အလိုမရှိ” ဟူသည့် လက်ရေးဖြင့် ရေးသားထားသော စာသားများ ပါဝင်သည့် ဆိုင်းဘုတ်များ ကိုင်ဆောင် ကာ ဒေါ်အောင်ဆန်း စုကြည်၏ ဟောပြောပွဲမစတင်မီ မွန်းလွဲ ၁ နာရီ ၃၀မိနစ်တွင် ဆန္ဒပြခဲ့ခြင်း လည်း ဖြစ်သည်။
NLD ပါတီသည် မျိုးစောင့်ဥပဒေဟု လူသိများသည့် ဥပဒေလေးခုကို ကန့်ကွက်သောကြောင့် ဆန္ဒပြခြင်း ဖြစ်သည်ဟု ဆန္ဒပြခေါင်းဆောင် ဦးစုက “အမျိုးကို ဖျက်တဲ့ ပါတီမို့လို့ မလိုချင်လို့ ဆန္ဒပြတာ”ဟု ဆိုသည်။
ယင်းကဲ့သို့ ဆန္ဒပြကန့်ကွက်မှုအပြင် ဆောင်းပါးရှင် ငါးမင်းဆွေကလည်း ဒေါ်အောင်ဆန်းစုကြည်၊ NLD ပါတီနှင့် ၈၈ မျိုးဆက် ကျောင်းသားခေါင်း ဆောင်များကို ကန့်ကွက်ရေးသားထားသည့် လက်ကမ်းစာ များကို လိုက်လံ ဝေငှခဲ့သည်။
“ လောက်ကိုင်မှာ ဘယ်သူတွေ သေခဲ့သလဲ၊ တပ်မတော်သားတွေ သေခဲ့ တာ။ ဘယ်သူ့ကို မဲပေးရ မလဲ ဆိုတာ စဉ်းစားကြပါ” ဟု လက်ကမ်းစာများ ဝေငှစဉ် ငါးမင်းဆွေက ပြောသည်။
ဒေါ်အောင်ဆန်းစုကြည်ကမူ NLD ကို မထောက်ခံရန် ကန့်ကွက်လှုံ့ဆော်မှု များကြောင့် ပါတီကို လူထု ထောက်ခံမှု ပိုမိုရရှိစေသည်ဟု ဇမ္ဗူသီရိမြို့နယ်၊ လွှတ်တော် ကိုယ်စားလှယ်ရုံး တွင်ဟောပြောစဉ် ထည့် သွင်းပြောဆိုခဲ့သည်။
ဇမ္ဗူသီရိမြို့နယ်သည် သမ္မတဦးသိန်းစိန်၏ လက်ရှိ မဲဆန္ဒနယ်လည်း ဖြစ်သည်။
Mizzima - News in Burmese
No comments:
Post a Comment