(၂၄) ကြိမ်မြောက် အာဆီယံထိပ်သီးအစည်းအဝေးရဲ့ အစီအစဉ်တခုအဖြစ် အာဆီယံလွှတ်တော် ကိုယ်စား လှယ်များနှင့် တွေ့ဆုံပွဲကို နေပြည်တော်မှာ မေလ (၁၁)ရက်နေ့က ပြုလုပ်ခဲ့ပါတယ်။ အဲဒီတွေ့ဆုံပွဲမှာ နိုင်ငံတော်သမ္မတ ဦးသိန်းစိန်က အာဆီယံပါလီမန် ကိုယ်စားလှယ်များအနေဖြင့် သက်ဆိုင်ရာ နိုင်ငံအသီး သီးတွင် ဥပဒေပြုမှုကို ဆောင်ရွက်နေပြီး အာဆီယံအသိုက်အဝန်း ထူထောင်မှုအတွက် ပါဝင် ဆောင်ရွက်နေတာကို မိမိတို့အသိအမှတ်ပြုကြောင်း၊ အာဆီယံသည် အစိုးရအဖွဲ့ချင်းဆိုင်ရာ အဖွဲ့အစည်း ဖြစ်သော်လည်း တစ်ဖက်တွင် အာဆီယံ အသိုက်အဝန်းကို ထူထောင်ပြီး ပြည်သူများကို ဗဟိုပြုသော အဖွဲ့အစည်းအဖြစ် အသွင်ကူးပြောင်းနိုင်ရေး ဆောင်ရွက်နေကြောင်း၊ ဒါမှသာ အာဆီယံ အသိုက်အဝန်းဟာ ရှင်သန်နေပြီး အားလုံးပါဝင်နိုင်သည့် အဖွဲ့အစည်း ဖြစ်ပေါ်ရေးကို အထောက်အကူပြုမှာ ဖြစ်ကြောင်း ပြောကြားခဲ့တယ် လို့ သိရပါတယ်။
ပြီးခဲ့တဲ့ မေလ ၁ဝ နဲ့ ၁၁ ရက်ကျင်းပခဲ့တဲ့ အာဆီယံထိပ်သီးအစည်း အဝေးတွေမှာ တောင်တရုတ်ပင်လယ် တွင်း အာဆီယံအဖွဲ့ဝင်နိုင်ငံတချို့နဲ့ တရုတ်ပြည်အကြား ပိုင်ဆိုင်မှုအငြင်းပွါးနေတဲ့ပြသနာကို အလေးထား ဆွေးနွေးခဲ့ကြရာမှာ ဖိလစ်ပိုင်နဲ့ ဗီယက်နမ်နိုင်ငံတွေက တရုတ်ပြည် ကို ထိထိရောက်ရောက် ဆန့်ကျင် အရေးယူဖို့ တိုက်တွန်းခဲ့ကြပါတယ်။
ဗီယက်နမ် ဝန်ကြီးချုပ်က တရုတ်ပြည်ဟာ မိမိတို့ရဲ့ ဆွေးနွေးအဖြေရှာရေး ကမ်းလှမ်းချက်ကို ဥပက္ခာပြုပြီး ကျူးကျော်ရန်စမှုတွေဆောင်ရွက်နေတဲ့ အတွက် အန္တရာယ် ပိုမိုကြီးမားလာနေပြီလို့ ပြောပါတယ်။
ဒါ့အပြင် ထိုင်းနိုင်ငံနဲ့ ပတ်သက်၍ အာဆီယံနိုင်ငံခြားရေး ဝန်ကြီးတွေ က မေလ ၁၁ ရက်စွဲဖြင့် ထုတ်ပြန် ကြေညာခဲ့ရာမှာ အာဆီယံအဖွဲ့ဝင်နိုင်ငံများအနေဖြင့် ထိုင်းနိုင်ငံရဲ့အခြေအနေတွေကို အနီးကပ် စောင့်ကြည့်လျက် ရှိကြောင်း၊ ထိုင်းနိုင်ငံမှာ ဖြစ်ပေါ်နေသည့် စိန်ခေါ်မှုတွေကို ဒီမိုကရေစီ အခြေခံမူများနှင့် တရားဥပဒေတွေကို အပြည့်အဝ လေးစားလိုက်နာခြင်းဖြင့် ငြိမ်းချမ်းစွာ ဖြေရှင်းရန် လိုလားကြောင်းနဲ့ ထိုင်းနိုင်ငံရဲ့ လက်ရှိ အခက်အခဲများကို ကျော်လွှားနိုင်ရန် အာဆီယံ ပဋိညာဉ်စာတမ်းတွင် ဖော်ပြ ထားသည့် အခြေခံမူများနှင့်အညီ သင့်လျော်သည့် ပံ့ပိုးမှု အားလုံးကို ကမ်းလှမ်းသွားရန် အသင့်ရှိကြောင်း စသဖြင့် ဖေါ်ပြထားပါတယ်။
ဒီအတောအတွင်း စင်္ကာပူဝန်ကြီးချုပ် လိရှင့်လွန်း က သူ့ရဲ့ဖေ့စ်ဘုတ် စာမျက်နှာမှာ မြန်မာပြည် ခရီးစဉ် အတွေ့အကြုံနဲ့ ပတ်သက်ပြီး မှတ်ချက်ရေးသားခဲ့ပါတယ်။ ပျဉ်းမနားနေပြည်တော်မှာ သူတွေ့မြင်ရ တဲ့ ဈေးဆိုင်တွေ အိမ်တွေ လူတွေကိုကြည့်ရတာဟာ ပြီးခဲ့တဲ့အနှစ် ၆ဝ ကျော် သက္ကရာဇ် ၁၉၅ဝ ပြည့်လွန်နှစ်တွေက စင်္ကာပူနဲ့ ပီနန်မြို့တွေက အခြေအနေ နဲ့ ဆင်တူပါပဲ၊ အဲဒီခေတ်နဲ့ မတူတာဆိုလို့ တခုပဲရှိပါတယ် ။
မြန်မာပြည်သူတွေက နောက်ဆုံးပေါ်လက်ကိုင်ဖုန်းတွေသုံးပြီး သူ့ကိုဓါတ်ပုံရိုက်ကြတယ်လို့ စင်္ကာပူ ဝန်ကြီးချုပ်က ရေးသားထားပါတယ်။
RFA Burmese
No comments:
Post a Comment