အထွေထွေရွေးကောက်ပွဲအတွက်သက်ဆိုင်ရာရပ်ကွက်၊ကျေးရွာကော်မရှင်အဖွဲ့ခွဲရုံးများတွင်ကြိုတင်မဲပေးရာတွင်အမှန်ခြစ်နှင့်တံဆိပ်တုံးထုစနစ်နှစ်မျိုးလုံးကိုခိုင်လုံမဲအဖြစ်သတ်မှတ်ကြောင်းပြည်ထောင်စုရွေးကောက်ပွဲကော်မရှင်ညွှန်ကြားရေးမှူးဦးသောင်းလှိုင်ကပြောကြားသည်။
တစ်နိုင်ငံလုံးရှိရပ်ကွက်၊ကျေးရွာကော်မရှင်ရုံးများတွင်အောက်တိုဘာလနောက်ဆုံးအပတ်မှစတင်ကာကြိုတင်မဲပေးရာတွင်တံဆိပ်တုံးထုမဲပေးရမည်ဖြစ်သော်လည်းအချို့သောရပ်/ကျေးကော်မရှင်ရုံးများတွင်အမှန်ခြစ်မဲပေးနည်းစနစ်ကိုအသုံးပြုခဲ့သောကြောင့်ယင်းသို့ပြောင်းလဲသတ်မှတ်ခြင်းဖြစ်ကြောင်း၎င်းကဆိုသည်။
“ရပ်/ကျေးနဲ့မြို့နယ်အဆင့်တွေကကော်မရှင်အဖွဲ့ခွဲတွေကနည်းနည်းအယူအဆလေးတွေလွဲသွားပြီးတော့အမှန်ခြစ်ကိုလက်ခံလိုက်တယ်၊အဲတော့ဘာဖြစ်သွားလဲဆိုတော့တံဆိပ်တုံးထုရမယ့်သူကလည်းအမှန်ခြစ်ပေးတယ်၊အမှန်ခြစ်ပေးရမယ့်သူတွေကလည်းတံဆိပ်တုံးထုတာဖြစ်ကုန်တယ်၊ကျွန်တော်တို့ကော်မရှင်ကတော့သူတို့မဲပေးပိုင်ခွင့်ရှိသူတွေရဲ့မဲပေးခွင့်ကိုမဆုံးရှုံးရအောင်နှစ်မျိုးစလုံးကိုခိုင်လုံမဲအဖြစ်သတ်မှတ်ပါလို့ညွှန်ကြားထားပါတယ်” ဟု၎င်းကဆိုသည်။
သို့သော်လည်းရွေးကောက်ပွဲဥပဒေများအတွင်းပါရှိသောနှစ်ကြိမ်အမှန်ခြစ်ခြင်းသို့မဟုတ်နှစ်ကြိမ်တံဆိပ်တုံးထုခြင်း၊မဲလက်မှတ်အစွန်းအထင်းပါရှိခြင်းစသောပယ်မဲသတ်မှတ်ချက်များကိုမဲဆန္ဒရှင်များကရှောင်ကြဉ်ရန်လိုအပ်ကြောင်း၎င်းကထပ်လောင်းပြောဆိုသည်။
ယင်းကိစ္စနဲ့ပတ်သက်ပြီးတရားလွှတ်တော်ရှေ့နေဦးကိုနီက “ အစကတည်းကမဲပေးပုံနည်းစနစ်ကိုတစ်မျိုးထဲသတ်မှတ်ရမှာ၊အခုတော့လူတွေကရောကုန်တာပေါ့ဗျာ၊တံဆိပ်တုံးထုဆိုလည်းတစ်ပြေးညီထုပေါ့၊အခုမဲဆန္ဒရှင်ပြည်သူတွေတင်မဟုတ်ဘူး၊အောက်ခြေကော်မရှင်အဖွဲ့ခွဲတွေကပါမသိဘူးဖြစ်နေတော့ခက်တာပေါ့ဗျာ” ဟုထောက်ပြပြောဆိုသည်။
ရွေးကောက်ပွဲကျင်းပမည့်နေ့ရက်မတိုင်မီရွေးကောက်ပွဲကိစ္စရပ်များဖြင့်ခရီးသွားလာရန်ရှိသောပြည်ထောင်စုအစိုးရအဖွဲ့ဝင်များအပါအဝင်အစိုးရဝန်ထမ်းများ၊လွှတ်တော်ကိုယ်စားလှယ်လောင်းများ၊သတင်းမီဒီယာများအောက်တိုဘာလ၂၉ရက်နေ့မှနိုဝင်ဘာလ၇ရက်နေ့အထိသက်ဆိုင်ရာရပ်/ကျေးကော်မရှင်ရုံးများတွင်ကြိုတင်မဲပေးနိုင်ကြောင်းပြည်ထောင်စုရွေးကောက်ပွဲကော်မရှင်ကထုတ်ပြန်ကြေညာထားသည်။
သို့သော်လည်းမဲဆန္ဒနယ်အတွင်းရှိသော်လည်းရွေးကောက်ပွဲကျင်းပသောနေ့ရက်တွင်ခရီးသွားလာရန်ရှိသူ၊အနာကြီးရောဂါစွဲကပ်နေခြင်း၊ရောဂါဝေဒနာပြင်းထန်စွာခံစားနေရခြင်း၊အသက်အရွယ်ကြီးရင့်နေခြင်း၊သားဖွားရန်ရှိသူများသည်ရွေးကောက်ပွဲမကျင်ပမီနှစ်ရက်အလို(နိုဝင်ဘာ၆ရက်နှင့် ၇ရက်)တွင်သက်ဆိုင်ရာရပ်/ကျေးရွေးကောက်ပွဲကော်မရှင်အဖွဲ့ခွဲများထံကြိုတင်မဲပေးနိုင်ကြောင်းပြည်ထောင်စုရွေးကောက်ပွဲကော်မရှင်ကထုတ်ပြန်ကြေညာထားသည်။
ပြည်ပရောက်မဲဆန္ဒရှင်များနှင့်မဲဆန္ဒနယ်ပြင်ပရောက်မဲဆန္ဒရှင်များကြိုတင်မဲပေးရာတွင်အမှန်ခြစ်စနစ်ကိုအသုံးပြုရမည်ဖြစ်သော်လည်းသက်ဆိုင်ရာရပ်/ကျေးကော်မရှင်ရုံးများတွင်ကြိုတင်မဲပေးရာတွင်မူတံဆိပ်တုံးထုမဲပေးစနစ်ကိုအသုံးပြုရန်ပြည်ထောင်စုရွေးကောက်ပွဲကော်မရှင်ကသတ်မှတ်ခဲ့သည်။
The Voice Weekly
No comments:
Post a Comment