သူတို့ ပြည်သူကို ကျောခိုင်းသွားကြပြီလား

ပြည်ထောင်စုသမ္မတ မြန်မာနိုင်ငံတော် ဖွဲ့စည်းပုံအခြေခံဥပဒေကို ပြင်ဆင်သည့် ဥပဒေမူကြမ်း ပုဒ်မ ၄၃၆၊ ပုဒ်မခွဲ (ခ) နှင့် အကျုံးဝင်သည့် ပုဒ်မများအား ဇူလိုင် ၈ ရက်က ပြုလုပ်သော ပြည်ထောင်စုလွှတ်တော်တွင် လျှို့ဝှက်မဲလက်မှတ် စနစ်ဖြင့် မဲခွဲဆုံးဖြတ်ရာ လုံလောက်သော ထောက်ခံမဲ မရရှိသဖြင့် ပြင်ဆင်နိုင်ခြင်း မရှိဘဲ ဇယား (၂) နှင့် ဇယား (၅) တွင် ဖြည့်စွက် ချက် အသစ်များသာ ပြင်ဆင်နိုင်ခဲ့သည်။

ဖွဲ့စည်းပုံအခြေခံဥပဒေကို ပြင်ဆင်သည့် ဥပဒေမူကြမ်း ပုဒ်မ ၄၃၆၊ ပုဒ်မခွဲ (ခ) နှင့် အကျုံးဝင်သည့် ပုဒ်မ များအား ပါတီအသီးသီးမှ လွှတ်တော်ကိုယ်စား လှယ်များနှင့် တပ်မတော်သား လွှတ်တော်ကိုယ်စားလှယ် စုစုပေါင်း ၆၃ ဦးက ငါးရက်ကြာ ဆွေးနွေးခဲ့ပြီး ရွေးကောက်ခံ ကိုယ်စားလှယ်များက ဥပဒေကြမ်း ပါ ပြင်ဆင် ချက်များအပြင် ၎င်းတို့၏ ပါတီသဘောထား ပြင်ဆင်လိုသည့် ပုံစံများကို ဆွေးနွေးခဲ့သော်လည်း တပ်မ တော်သား လွှတ်တော်ကိုယ်စား လှယ်များကမူ ဇယားဖြည့်စွက်ချက်မှလွဲ၍ ကျန်ပြဋ္ဌာန်းချက် အားလုံးကို မူလအတိုင်းသာ ထားရှိရန် အစဉ်တစိုက် ဆွေးနွေးခဲ့သည်။

ပုဒ်မ ၄၃၆ (ခ) နှင့် အကျုံးဝင်သည့် ပြင်ဆင်ချက် ပုဒ်မများတွင် တိုင်းရင်းသားများနှင့် အဓိက သက်ဆိုင် သည့် တိုင်းဒေသကြီး သို့မဟုတ် ပြည်နယ်ဝန်ကြီးချုပ်အား သက်ဆိုင်ရာလွှတ်တော်မှ ခန့်အပ်နိုင်ရေး ပြင်ဆင်ချက်ပုဒ်မ ၂၆၁ ပါဝင်ပြီး အဆိုပါ ပြင်ဆင်ချက်ကို တိုင်းရင်းသား လွှတ်တော်ကိုယ်စားလှယ်များနှင့် ရွေးကောက်ခံ လွှတ်တော်ကိုယ်စားလှယ် အများအပြားက ထောက်ခံဆွေးနွေးခဲ့သော်လည်း တပ်မတော် သား လွှတ်တော်ကိုယ်စားလှယ်များက မူလအတိုင်း ထားရှိရန် ဆွေးနွေးခဲ့ကာ တိုင်းရင်းသား လွှတ်တော် ကိုယ်စားလှယ်အချို့က မဲခွဲချိန်တွင် တပ်မတော်သား လွှတ်တော်ကိုယ်စားလှယ်များ အနေဖြင့် အဆိုပါ ပုဒ်မကို ထောက်ခံပေးပါရန် မေတ္တာရပ်ခံ ဆွေးနွေးသည်အထိ ပြုလုပ်ခဲ့သော်လည်း တပ်မတော်သားများ၏ ထောက်ခံမှု မရရှိသဖြင့် ပြင်ဆင်နိုင်ခဲ့ခြင်း မရှိပေ။

ပြည်ထောင်စုလွှတ်တော် ကိုယ်စားလှယ် ၆၆၄ ဦးရှိပြီး လစ်လပ် ၃၁ ဦးနုတ်ပါကာ ၆၃၃ ဦး ရှိမည်ဖြစ်ကာ မဲခွဲဆုံးဖြတ်သည့် ဇူလိုင် ၈ ရက်တွင် လွှတ်တော်ကိုယ်စားလှယ် ၆၃၃ ဦး ရှိသည့်အနက် ၆၀၅ ဦး တက် ရောက်ခဲ့သည်။

အဆိုပါ ၆၃၃ ဦးတွင် ရွေးကောက်ခံ လွှတ်တော်ကိုယ်စားလှယ် ၄၆၇ ဦးနှင့် တပ်မတော်သား လွှတ်တော် ကိုယ်စားလှယ် ၁၆၆ ဦး ပါဝင်ပြီး မဲခွဲသည့်နေ့ တွင် ခွင့်ပျက်ကွက်သည့် ကိုယ်စားလှယ် ၂၈ ယောက် နုတ်ပါက ရွေးကောက် ခံ လွှတ်တော်ကိုယ်စားလှယ် ၄၃၉ ဦးသာ ရှိသည်။

ဖွဲ့စည်းပုံအခြေခံဥပဒေ ပြင်ဆင်ရာတွင် ထောက်ခံမဲ ၇၅ ရာခိုင်နှုန်း လိုအပ်ပြီး လွှတ်တော်ကိုယ်စားလှယ် ၆၃၃ ဦး၏ ၇၅ ရာခိုင်နှုန်းမှာ ၄၇၅ ဦး လိုအပ်သဖြင့် ပြင်ဆင်ချက်အားလုံးသည် တပ်မတော်၏ ထောက်ခံမှု တစ်စုံတစ်ရာ မပါဝင်ပါက ဆောင်ရွက်နိုင်မည် မဟုတ်ဘဲ ပုဒ်မ ၄၃၆ (ခ) နှင့် အကျုံးဝင်သည့် ပြင်ဆင်ချက် ပုဒ်မများအား မဲခွဲရာတွင် တပ်မတော်၏ ထောက်ခံမှု မရှိသဖြင့် ရှုံးနိမ့်ခြင်းဖြစ်သည်။

ထိုသို့ ပြင်ဆင်ချက်ပုဒ်မများ မဲခွဲဆုံးဖြတ်မှုအပြီး ရှုံးနိမ့်သွားသည့်အပေါ် ပြည်ထောင်စုလွှတ်တော် နာယက သူရဦးရွှေမန်းက “တိုင်းရင်းသား အများပြည်သူများ၏ အကျိုးစီးပွားအတွက် ကြိုးစားကြရမှာက ကျွန်တော် တို့ တာဝန်ပါ။ ကျွန်တော်တို့ အလုပ်ပါ။ အောင်မြင်မှု ရ၊ မရကတော့ သိတဲ့အတိုင်းပါပဲ။ ဘာပဲဖြစ်ဖြစ် တိုင်း ရင်းသား အများပြည်သူများအတွက် ဆက်လက်ကြိုးပမ်း ဆောင်ရွက်သွားကြရမှာ ဖြစ်ပါတယ်” ဟု လွှတ် တော်အစည်းအဝေး ခန်းမထဲ၌ ပြောကြားသည်။

ထို့ပြင် ယခုကဲ့သို့ အနည်းငယ် ဖြေလျှော့ထားသည့် ဖွဲ့စည်းပုံအခြေခံဥပဒေ ကို ပြင်ဆင်သည့် ဥပဒေကြမ်း အား တပ်မတော်ထောက်ခံမှု မရရှိသဖြင့် ပြင်ဆင်နိုင်ခြင်း မရှိခြင်းအပေါ် တိုင်းရင်းသား လွှတ်တော်ကိုယ် စားလှယ်များက ဝေဖန်ပြောကြားသည်။

“ပြည်သူတွေမျှော်မှန်းတဲ့ မျှော်မှန်းချက်တွေ အကုန်လုံး ရိုက်ချိုးခံရတာပေါ့။ အဲဒီတော့ ငါတို့ပေးမှ ရတယ်။ တစ်နည်းအားဖြင့် ပြည်ထောင်စုလွှတ်တော် တစ်ခုလုံးက သူတောင်းစား ဖြစ်သွားတာပေါ့။ စွန့်ကြဲမှရတဲ့ သူတောင်းစား ခွက်ထဲမှာ ငါးပြားစေ့ စွန့်ကြဲတာဆိုရင် ငါးပြားစေ့ရတာပေါ့။ ၁၀ ပြားစေ့ စွန့်ကြဲရင် ၁၀ ပြားစေ့ပဲ လက်ခံယူနိုင်တဲ့ ပြည်ထောင်စုလွှတ်တော်ဆိုတဲ့ အမြင့်ဆုံးသော အာဏာပိုင်အဖြစ် ပုံဖော်သွား တာပေါ့။ စိတ်မကောင်းစရာပဲ။ အဲဒီတော့ ပြည်ထောင်စုလွှတ်တော်သည် ဥပဒေပြုမှုမဏ္ဍိုင် အမြင့်ဆုံးဆိုရင် ပြည်သူကြိုက်တဲ့ ဖွဲ့စည်းပုံကြီးတစ်ခုကို ပြင်နိုင်၊ ပြုနိုင်၊ ဖြည့်စွက်နိုင်တဲ့ ပြည်ထောင်စုလွှတ်တော်ကြီးဖြစ်ဖို့ လိုပါတယ်။ အဲဒီလို အခင်းအကျင်းရှိမှပဲ လွှတ်တော်အသံ ပြည်သူ့အသံ ဆိုတာမျိုး၊ လျော်ညီတဲ့ ပြည်သူ ကြိုက်တဲ့ ပြည်သူ့ကိုယ်စားလှယ်တွေနဲ့ ဖွဲ့စည်းထားတဲ့ ပြည်ထောင်စုလွှတ်တော်ကြီးလို့ ပြည်သူယုံကြည်မှာ ပေါ့။ အခုတော့ ပြည်သူ့ယုံကြည်မှုကို ရိုက်ချိုးခံလိုက်ရတဲ့ ပြည်ထောင်စုလွှတ်တော်ကြီး ဖြစ်သွားတာပေါ့ ဗျာ။ ကျွန်တော်တို့ စိတ်မ ကောင်းဘူး” ဟု အမျိုးသားလွှတ်တော်ကိုယ်စားလှယ် ဒေါက်တာအေးမောင် က ပြောကြားသည်။

ယခုကဲ့သို့ ဖွဲ့စည်းပုံပြင်ဆင်နိုင်ရေး မအောင်မြင်ခဲ့ခြင်းသည် တိုင်းရင်းသားများနှင့် ဆွေးနွေးသည့် အပစ် အခတ်ရပ်စဲရေး၊ ငြိမ်းချမ်းရေး ပိုမိုဝေးသွား စေနိုင်ကြောင်း အမျိုးသားလွှတ်တော်ကိုယ်စားလှယ် ဦးဂျေ ယောဝူက ပြောကြားသည်။

“၀န်ကြီးချုပ်တွေနဲ့ ပတ်သက်ပြီးတော့ ပြောရမယ်ဆိုရင် ကိုယ့်လွှတ်တော်မှာ ကိုယ်ရွေးရမယ်ဆို ကောင်း တာပေါ့။ ဒီပုဒ်မ အတည်ပြုဖို့ မဲခွဲတော့ တပ်မတော်သား ကိုယ်စားလှယ်တွေက မဲမပေးဘူးလေ။ သူတို့က တစ်သွေးတစ်သံ တစ်မိန့်ဆိုတော့ အားလုံးက ကြက်ခြေခတ်မှာပဲလေ။ အဲဒီတော့ မရဘူးလေ။ အခုလက်ရှိ အတိုင်းပဲဆက်သွားရမှာပေါ့။ သမ္မတကြီးက ခန့်တဲ့အတိုင်းပဲပေါ့။ ဒါပေမဲ့လည်း တစ်ချိန်ချိန်တော့ ပြောင်းလဲ ရမှာပေါ့လေ။ အဲဒီအချိန်ကျမှ ပြောင်းလဲမယ်ဆိုရင်တော့ အများကြီး နောက်ကျသွားပြီလေ။ 

အခုကတည်းက ပြောင်းလဲသွားမယ်။ အခုကတည်းက စည်းလုံးသွားမယ်။ အခုကတည်းက အပစ်အခတ် ရပ်စဲနိုင်တယ်။ ပြည်သူနဲ့ နိုင်ငံအတွက် အခုကတည်းက လုပ်ပေးနိုင်ရင် အကောင်းဆုံးပဲလေ။ အခုအတိုင်း ဆိုရင်တော့ ငြိမ်းချမ်းရေး လုပ်ငန်းစဉ်တွေကို ပိုပြီးတော့ ဝေးစေတာပေါ့။ အပစ်အခတ် ရပ်စဲရေး အဖွဲ့တွေ ကလည်း စောင့်ကြည့်နေကြတာကို။ ပြောင်းများ ပြောင်းလဲလာမလားပေါ့။ တပ်က မပြောင်းလဲဘူး ဆိုရင် တော့ ဥပဒေက ပြောင်းလို့မရဘူးဆိုတဲ့ သဘောပဲ” ဟု ဦးဂျေယောဝူက ပြောကြားသည်။

ထို့ပြင် ဖြည့်စွက်ချက်အသစ်များ အတည်ပြုနိုင်ခဲ့သည့် တိုင်းဒေသကြီးနှင့် ပြည်နယ်ဥပဒေပြုစာရင်း၊ ကောက်ခံရမည့် အခွန်အခ စုစုပေါင်း ၅၄ ချက်နှင့် ပတ်သက်၍ တိုင်းရင်းသားပါတီများမှ လွှတ်တော်ကိုယ် စားလှယ်များက ဆွေးနွေးစဉ် အချိန်ကပင် “ပြည်ထောင်စုက ပြဋ္ဌာန်းသည့် ဥပဒေနှင့်အညီ ဆိုသည့်” စကားရပ် ပါဝင်နေသဖြင့် ဗဟိုချုပ်ကိုင်မှု များနေသောကြောင့် အဆိုပါစကားရပ်ကို ဖြုတ်ပေးရန် တောင်း ဆိုခဲ့သော်လည်း အတည်ပြုရာတွင် ယင်းစကားရပ် ပါဝင်နေသဖြင့် တိုင်းရင်းသားများအတွက် သိသာထူး ခြားသည့် ပြင်ဆင်မှု မဟုတ်ကြောင်း တိုင်းရင်းသား လွှတ်တော်ကိုယ်စားလှယ်များက ဆိုသည်။

“အဖြေကတော့ ထွက်ပြီးသားဆိုတော့ ရင်မခုန်တော့ဘူးလေ။ မျှော်လင့်ချက် ထားမိတာကတော့ ပုဒ်မ ၂၆၁ ပဲ။ နည်းနည်းများ လျှော့ပေးနိုင်မလား ဆိုပြီးတော့ပေါ့။ ကျွန်မ ခန့်မှန်းကြည့်မိတာကတော့ ပုဒ်မ ၂၆၁ ကို နိုင်ငံရေး ကစားကွက်အနေနဲ့ ကိုင်ထားတယ်လို့ ထင်တယ်။ တိုင်းဒေသကြီး ပြည်နယ်တွေရဲ့ Power Sharing ကို ထိန်းချုပ်ထားချင်ပြီးတော့ Resources Sharing ကိုတော့ လွှတ်ပေးချင်တဲ့ အနေအထား တွေ့ရတာပေါ့။ Resources Sharing ကိုတောင်မှ လွှတ်မပေးချင်ဘူး။ ပြည်ထောင်စုရဲ့ ပြဋ္ဌာန်းချက် အတိုင်း ဆိုပြီးတော့ ပြောတယ်လေ။ တိုင်းဒေသကြီး ပြည်နယ်တွေအတွက် လုပ်ပေးတယ် ဆိုရုံလောက်ပဲ ရှိတယ်။ စစ်မှန်တဲ့ ဖက်ဒရယ်ပြည်ထောင်စုကတော့ မဖြစ်သေးဘူးလေ။ အဲဒီအထိ ရအောင်တော့ လုပ်ရမှာပဲ။ ငြိမ်းချမ်းရေး အနေအထား အတွက်လည်း သူတို့တွေ တွက်ထားမှာပါ။ လွှတ်တော်ထဲမှာ ဆွေးနွေးတာတွေ၊ ကန့်ကွက်တာတွေကို သူတို့တွေလည်း ကြားမှာပါပဲ။ ဒီကိစ္စတွေကို သူတို့တွေလည်း တော်တော်များများ စဉ်းစားထားမယ်လို့ ယုံကြည်တယ်လေ။ ဒါပေမဲ့ တကယ့် ငြိမ်းချမ်းရေးအတွက် ဖက်ဒရယ် ပြည်ထောင်စုကို တည်ဆောက်ဖို့ဆိုရင်တော့ တိုင်းရင်းသားတွေနဲ့ ပတ်သက်တာတွေကို များများလေး လျှော့ပေးဖို့သင့်တာပေါ့။ ဒီကိစ္စတွေကို ကြည့်ခြင်းအားဖြင့် ငြိမ်းချမ်းရေးမှာ အလျှော့အတင်း အပေးအယူလေးတွေ လုပ်ဖို့ ချန်ထားတယ်လို့ ထင်မြင်မိတယ်” ဟု ပြည်သူ့လွှတ်တော်ကိုယ်စား လှယ် ဒေါ်နန်းဝါနုက ပြောကြားသည်။

Eleven Media Group