ရွှေတိဂုံစေတီတော် အနားမှာ တည်ဆောက်နေတဲ့ ဒဂုံစီးတီး ဆောက်လုပ် ရေး စီမံကိန်းကို အပြီးသတ် ရပ်ဆိုင်းလိုက်ပြီလို့ မြန်မာအစိုးရက မနေ့က ကြေညာချက် ထုတ်ပြန်ခဲ့ပါတယ်။
မဘသ သံဃာတော်တွေ အပါအ၀င် ရွှေတိဂုံစေတီတော် ကာကွယ်စောင့် ရှောက်ရေး အဖွဲ့က ဒီစီမံကိန်း ကြောင့် ရွှေတိဂုံစေတီကို ထိခိုက်မယ့် အန္တရာယ်တွေ ရှိလာနိုင်တယ်ဆိုပြီး ပြင်းပြင်းထန်ထန် ကန့်ကွက်ခဲ့ ပြီးနောက် မှာ အခုလို သမ္မတဦးသိန်းစိန် အစိုးရက စီမံကိန်းကို ရပ်ဆိုင်းလိုက်တာ ဖြစ်ပါတယ်။ ဒီအပေါ် သဘောထား၊ တုန့်ပြန်ချက်တွေကို မအင်ကြင်းနိုင်က တင်ပြထားပါတယ်။
ရန်ကုန်မြို့ ရွှေတိဂုံစေတီ ဘုရားလမ်းနဲ့ ကမ္ဘာအေးဘုရားလမ်းကြား တပ်မတော်စစ်ရုံးချုပ်ပိုင် ဧက ၈၀ လောက်ရှိတဲ့ မြေနေရာမှာ ဒဂုံစီးတီး စီမံကိန်းဆုိုပြီး အဆင့်မြင့် လူနေတိုက်ခန်း အဆောက်အအုံ တည် ဆောက်နေတဲ့ လုပ်ငန်းတွေကို ရင်းနှီးမြှုပ်နှံထားတဲ့ ကုမ္ပဏီတွေနဲ့ ညှိနှိုင်းပြီး နှစ်ဘက် သဘောတူညီချက် အရ အပြီးသတ် ရပ်ဆိုင်းလိုက်ကြောင်း အစိုးရက အင်္ဂါနေ့က ကြေညာခဲ့တာပါ။
အခုလို အစိုးရကနေ စီမံကိန်း လုံးဝရပ်ဆိုင်းလိုက်ပြီဆိုတဲ့ ကြေညာချက်ကို ကြိုဆိုကြောင်းနဲ့ အနာဂတ် မှာလည်း ရွှေတိဂုံစေတီတော်ရဲ့ အန္တရာယ်ကို ထိခိုက်စေမယ့် လုပ်ငန်းမှန်သမျှ လုံးဝလက်ခံမှာ မဟုတ်ဘူး လို့ မဘသ သံဃာတော်တွေ ဦးဆောင်ပါဝင်နေတဲ့ ရွှေတိဂုံစေတီတော် ကာကွယ်စောင့် ရှောက်ရေး အဖွဲ့ရဲ့ ဗဟိုဦးဆောင် အဖွဲ့ဝင်လည်းဖြစ်၊ မဘသရဲ့ ဗဟိုဦး ဆောင်အဖွဲ့ဝင်လည်းဖြစ်တဲ့ ဦးမောင်မောင်က ဗွီအိုအေကို ပြောပါတယ်။
“အခုရပ်ဆုိုင်းတဲ့ ကိစ္စကုိုလည်း ကျနော်တုို့က ပြည်သူအားလုံးရဲ့ ဆန္ဒကုို လုိုက်လျောတဲ့ကိစ္စ ဖြစ်တဲ့အတွက် ကျနော်တုို့ကတော့ ကျေးဇူးလည်းတင်တယ်၊ ၀မ်းလည်းသာတယ်ပေါ့နော်။ ရွှေတိဂုံစေတီတော်ကြီး ပတ်ဝန်းကျင် မှာပေါ့၊ စေတီတော်ကြီးနဲ့ သိဂုင်္တ္တရ ကုန်းတော်ကုို ထိခုိုက်မယ့် ကိစ္စတွေ အားလုံးကုို ကျနော် တုို့က ရပ်ဆုိုင်းစေချင်တာပါ။ ဒါကြောင့် အဲဒီလုို ဒဂုံစီးတီးစီမံကိန်း အပါအ၀င် တခြားစီမံကိန်းတွေ ရပ်သ လုိုပဲ၊ တခြားရွှေတိဂုံ စေတီတော်ကြီးကုို ထိခုိုက်မယ့် လုပ်ငန်းမှန်သမျှ၊ သဘာဝပတ်ဝန်းကျင် ထိခုိုက်မယ့် လုပ်ငန်းမှန်သမျှကုိုလည်း ကျနော်တုို့က ဆက်လက်ပြီးတော့ စောင့်ရှောက်သွားဖုို့၊ ကာကွယ်သွားဖုို့ ရွှေတိဂုံစေတီတော် ကာကွယ်စောင့် ရှောက်ရေးအဖွဲ့က ရည်ရွယ်ချက် ရှိပါတယ်။”
ပြီးခဲ့တဲ့ ဖေဖော်ဝါရီလမှာ ရန်ကုန်မြို့ကို ခေတ်မှီမြို့တော်အဖြစ် တည်ဆောက် ရေး ရန်ကုန်တိုင်း ဒေသကြီး အစိုးရကနေ စစ်တပ်ပိုင်မြေတွေကို ရင်းနှီးမြှုပ်နှံတဲ့ ကုမ္ပဏီတွေဖြစ်တဲ့ ရွှေတောင်၊ သုခရတနာ၊ Marga Landmark Development ကုမ္ပဏီ၊ Adventure Myanmar Tours and Incentives ကုမ္ပဏီတို့ကို လွှဲ ပြောင်းလုပ်ကိုင်ခွင့် ပေးလိုက်တာ ဖြစ်ပါတယ်။
အခုလို မြို့ပြစည်ပင် ဖွံ့ဖြိုးမှုလုပ်ငန်းတွေ ဆောင်ရွက်တဲ့ နေရာမှာ စေတီပုထိုးတွေ အပါအ၀င် ရှေးဟောင်း ယဉ်ကျေးမှု အမွေအနှစ် နေရာတွေကိုတော့ ရှောင်ရှားသင့်ကြောင်း ရန်ကုန် တိုးရစ်ဂိုက်တဦးဖြစ်သူ မညိုဇွန်နိုင်ဝင်း က ပြောပါတယ်။
“ရန်ကုန်မြို့ တုိုးတက်ရေးစီမံကိန်းက ရန်ကုန်မြို့က အကျယ်ကြီးပဲ။ အကျယ်ကြီးဆုိုတော့ ဒီဘုရားနား တ၀ုိုက်လေး၊ ဒီဧကနည်းနည်းလေး လောက်မှာ မဆောက်ပဲနေလုို့ ရတယ်လေ။ ပြီးတော့ ဘုရားနားမှာ ကားတွေက နဂုိုကတည်းက အခုဆုိုရင် ကျပ်နေတာ။ ဒီဘက်က ကန်တော်မင်ပန်းခြံနဲ့ ဘုရားနဲ့ကြားမှာဆုို တော်တော်ပိတ်တယ်။ အဲဒီတော့ အဲဒီအနားမှာ အဲဒါသာ ထပ်ဆောက်လုိုက်လုို့ရှိရင် အဲဒီအနားမှာ ကားတွေပုိုကျပ်သွားမှာ။ အဲဒီတော့လည်း အဆင်မပြေဘူး။ ရန်ကုန်မြို့ တုိုးတက်အောင် တခြားနေရာမှာ လုပ်လုို့ရတယ်။ ရန်ကုန်မြို့ကြီးက အကျယ်ကြီးပဲလေ။ ဒီဘုရားနားလုပ်မှ ဖြစ်မှာမှမဟုတ်တာ။ နောက်ပြီး တော့ အဲဒီအနားက အပင်တွေဘာတွေ ခုတ်လုိုက်တာ တအားနှမျောဖုို့ကောင်း တယ်။”
ရွေးကောက်ပွဲ နီးကပ်လာချိန်မှာ သမ္မတဦးသိန်းစိန် အစိုးရက အများပြည်သူ ဆန္ဒအရ ဒီစီမံကိန်းကို ရပ် ဆိုင်းလိုက်တာ ဖြစ်တယ်ဆိုတဲ့ ကြေညာချက်ဟာ လူထုရဲ့ ထောက်ခံမှုလိုချင်လို့ ဆောင်ရွက်တာလည်း ဖြစ်နိုင်တယ်ဆိုပြီး သုံးသပ်သူတွေလည်း ရှိပါတယ်။ ဓာတ်ပုံသတင်းထောက် ကိုစိုးဇေယျ ရဲ့ အမြင်ကတော့ -
“ပြောရရင်တော့ ရပ်ဆုိုင်းကြောင်း ကြေညာချက်နဲ့ ပတ်သက်လုို့ရှိရင်တော့ သူတုို့အစကတည်းက သူတုို့ ဖာသာသူတုို့ စခဲ့ကြတယ်ပေါ့။ အဲဒီလုိုစခဲ့ကြပြီး တဲ့ အချိန်မှာပဲ ဒီပရောဂျက်ကြီးက အန္တရာယ်ရှိပါတယ် ဆုိုပြီးတော့မှ အဲဒီလုိုမျိုး အပြင်ကုို ထွက်လာတယ်ပေါ့။ ထွက်လာတယ်ဆုိုတဲ့ ဥစ္စာမှာလည်း အဲဒီလုိုမျိုးပေါ့ နော်၊ ပညာရှင်တွေ အမျိုးမျိုးနဲ့ သုံးသပ်ချက်တွေ အမျိုးမျိုးနဲ့ သူတုို့ထွက်လာကြတယ်။ ထွက်လာတဲ့အ ချိန်မှာ တချို့ပညာရှင်တွေကလည်း ထောက်ပြကြတာပေါ့။ အဲဒီရွှေတိဂုံဘုရား ပတ်ဝန်းကျင်မှာ ၆ ထပ်ထက် မြင့်တဲ့ အဆောက်အဦးတွေ အများကြီးရှိတယ်။ အဲဒီအတွက်ကြောင့်မုို့လုို့ ဒီရွှေတိဂုံဘုရားကြီးက ထိခုိုက်စ ရာ အကြောင်းမရှိဘူးပေါ့။ တချို့ကကြ တော့လည်း အဲဒီလုိုမျိုး ထိခုိုက်မယ်ပေါ့။
ဘယ်လုိုပဲဖြစ်ဖြစ်ပေါ့နော် အဲဒီလုိုမျိုး သုံးသပ်ချက်တွေ အများကြီး အမျိုးမျိုးနဲ့ ထွက်လာတယ်။ ထွက်လာပေ မဲ့လည်း အဲဒီရဲ့ စီမံကိန်းကြီးက မှားတယ်မမှား ဘူး ဆုိုတာကတော့ ပညာရှင်တယောက် မဟုတ်တဲ့အတွက် ကြောင့်မုို့လုို့ မှားတယ်၊ မှန်တယ် ဆုိုတာတော့ ပြောလုို့မတတ်ဘူးပေါ့။ ဒါပေမဲ့ စဉ်းစားမိ တာတခုက ဘာလဲ ဆုိုတော့ ရွေးကောက်ပွဲ နီးလာတာနဲ့အမျှ တဖြည်းဖြည်းနဲ့ အဲဒီလုိုမျိုး သမ္မတကုိုယ်တုိုင်က ပြောထားတယ်။ ပြည်သူတွေကနေ အလုိုရှိလုို့ရှိရင် သူကနေပြီးတော့မှ လာမယ့် သမ္မတသက်တမ်းကုို ဆက်ပြီး အရွေးချယ်ခံ မယ်ပေါ့။ ဒါကြောင့် ပြည်သူတွေ ဆီကနေပြီးတော့မှ ထောက်ခံမှုရဖုို့အတွက် သူ့ရဲ့ပုံမှန် process တခုပဲလုို့ အဲဒီလုိုပဲ မြင်ပါတယ်။”
ဒဂုံစီးတီးစီမံကိန်းလိုမျိုး အဆောက်အဦးကြီးတွေ တည်ဆောက်လာမယ် ဆိုရင် ရွှေတိဂုံစေတီတော်ရဲ့ အောက်ခံမြေကြီးအတွက် အန္တရာယ် ရှိလာနိုင်တာမို့ ပညာရှင်တွေက ဆွေးနွေးတင်ပြလာတဲ့အပေါ် စီမံ ကိန်းကို ရပ်ဆိုင်းပေးဖို့ ပြီးခဲ့တဲ့ ဇွန်လဆန်းပိုင်းကတည်းက ရန်ကုန်တိုင်း လွှတ်တော်အတွင်း လွှတ်တော် အမတ် ဒေါက်တာညိုညိုသင်းက အဆိုတရပ် တင်သွင်းခဲ့ ပေမဲ့ ပယ်ချခံခဲ့ရပါတယ်။
ဒါပေမဲ့ ဇွန်လ ၂၀ ရက်နေ့က သံဃာတော်တွေ အများစုနဲ့ ပါဝင်ဖွဲ့စည်းထား တဲ့ ရွှေတိဂုံစေတီတော် ကာကွယ်စောင့်ရှောက်ရေး အဖွဲ့ကို ရန်ကုန်တိုင်း အစိုးရ နယ်စပ်ရေးရာနဲ့ လုံခြုံရေးဝန်ကြီး ဗိုလ်မှူးကြီး တင်ဝင်းနဲ့ ရန်ကုန်တိုင်း တိုင်းမှူး ဗိုလ်ချုပ်ထွန်းထွန်းနောင် တို့က ဖိတ်ကြားတွေ့ဆုံပြီး ဒဂုံစီးတီးစီမံ ကိန်းကို ရပ်ဆိုင်းသွားမယ့်အကြောင်း နှုတ်ကတိ ပေးခဲ့ပြီးနောက် ဇူလိုင်လ (၇) ရက်နေ့မှာ အစိုးရရဲ့အမိန့်ကြေညာ ချက် ထုတ်ပြန်ခဲ့တာ ဖြစ်ပါတယ်။
VOA
No comments:
Post a Comment